Memleket basshysynyń Jarlyǵymen О́mirzaq Estaıuly Shókeev Túrkistan oblysynyń ákimi laýazymynan bosatyldy. Prezıdent aımaq basshysy qyzmetindegi kóp jylǵy jumysy úshin alǵys aıtty.
Túrkistanda Úkimet basshysy Álıhan Smaıylovtyń qatysýymen oblystyq máslıhat depýtattarynyń birlesken sessııasy ótti. Oblys ákimi qyzmetine qos birdeı kandıdat usynyldy. Onyń biri Qazaqstan Respýblıkasynyń О́zbekstan Respýblıkasyndaǵy Tótenshe jáne О́kiletti Elshisi Darhan Satybaldy bolsa, ekinshisi Saıram aýdanynyń ákimi Ulasbek Sádibekov.
Depýtattardyń basym bóligi Darhan Satybaldynyń kandıdatýrasyn qoldap daýys berdi. Búgin Memleket basshysynyń tıisti Jarlyǵy jarııalandy.
«Darhan Amangeldiuly Satybaldy Túrkistan oblysynyń ákimi bolyp taǵaıyndalsyn, ol Qazaqstan Respýblıkasynyń О́zbekstan Respýblıkasyndaǵy Tótenshe jáne О́kiletti Elshisi laýazymynan bosatylsyn», delingen habarlamada.
Darhan Amangeldiuly 1974 jyly Saryaǵash aýdanynda dúnıege kelgen.
S.Seıfýllın atyndaǵy Aqmola aýyl sharýashylyq ınstıtýtyn, Qazaq gýmanıtarlyq-zań ýnıversıtetin bitirgen.
Buǵan deıin Shymkent qalasynyń ákimi, Ońtústik Qazaqstan oblysy ákiminiń birinshi orynbasary, QR Premer-Mınıstri Keńsesi bólim meńgerýshisiniń orynbasary bolyp qyzmet atqardy.
Qazaqstan Respýblıkasy Parlamenti Senatynyń depýtaty bolyp Shymkentten saılanǵan.
2019 jyldan beri Qazaqstan Respýblıkasynyń О́zbekstan Respýblıkasyndaǵy Tótenshe jáne О́kiletti Elshisi bolyp qyzmet etti.
Aıta keteıik, buǵan deıin Túrkistan oblysynyń ákimi О́mirzaq Shókeev otstavkaǵa ótinish bergen bolatyn.
