«Erteń Memleket basshysy Qazaqstan halqyna kezekti Joldaýyn jarııalaıdy, onda eldiń taıaý kezeńdegi áleýmettik-ekonomıkalyq damýynyń negizgi basymdyqtary belgilenedi», dep jazdy Erlan Qarın óziniń telegram arnasynda.
Onyń aıtýynsha, sarapshylar 2021 jylǵy «Halyq birligi jáne júıeli reformalar - el órkendeýiniń berik negizi» Joldaýyn iske asyrýdyń aralyq qorytyndylaryn shyǵardy.
Sarapshylardyń qorytyndysyna qaraǵanda, barlyq praktıkalyq jumystar arnaıy Jalpyulttyq jospar sheńberinde júrgizildi. Ol 103 tarmaqtan turatyn jospardyń basym bóligi iske asyryldy, al qalǵandarynyń oryndalýy Prezıdent Ákimshiliginiń baqylaýynda.
«Mańyzdy áleýmettik bastamalar arasynda azamattyq qyzmetshilerdiń jekelegen sanattarynyń jalaqysyn 2022 jyldan bastap 2025 jylǵa deıin orta eseppen 20%-ǵa kezeń-kezeńimen ulǵaıtýdy atap ótý qajet. Sondaı-aq zańnamaǵa eń tómengi jalaqyny 60 myń teńgege deıin arttyrý jáne ony salyq, áleýmettik jáne basqa da salalarda eseptik kórsetkish retinde alyp tastaý bóliginde ózgerister men tolyqtyrýlar engizildi», dep jazdy Memlekettik keńesshi.
Sondaı-aq 2025 jyldyń sońyna deıin keminde 1000 mektep salý boıynsha Jol kartasy bekitilgen. Turǵyn úı máselelerin sheshý úshin «Nurly jer» baǵdarlamasy boıynsha «Otbasy banki» arqyly jalpy somasy 230 mıllıard teńgege jýyq 20 myńnan astam jeńildikti qaryz berildi.
«Ult densaýlyǵyn nyǵaıtý úshin naqty qadamdar jasaldy. Máselen, elimizde «bıologııalyq qaýipsizdik týraly» Zań qoldanyla bastady, halyqtyń DDU-da tirkelgen koronavırýstyq ınfeksııaǵa qarsy vaksınalarǵa qol jetimdiligi qamtamasyz etildi», delingen habarlamada.
Erlan Qarınniń aıtýynsha, saıası jańǵyrý men adam quqyqtaryn qorǵaý blogy tolyqtaı derlik iske asyryldy.
«Adam quqyqtaryn qorǵaý júıesin nyǵaıtý jáne zańdylyqty qamtamasyz etý úshin asa aýyr sanattaǵy qylmystyq ister boıynsha aıyptaý aktilerin daıyndaý bóliginde prokýrorlardyń quzyreti keńeıtildi. Ýákiletti organdar 2022 jylǵa arnalǵan alaıaqtyq pen qarjy pıramıdalaryna qarsy is-qımyl boıynsha birlesken is-sharalar keshenin iske asyryp keledi. Zań shyǵarý jumysy sheńberinde bilim berý salasynda, stresti aktıvter naryǵyn damytý týraly jáne basqa da zańdar qabyldandy. Budan basqa, Qazaqstan Respýblıkasynyń 2025 jylǵa deıingi aýmaqtyq damý jospary, 2022-2026 jyldarǵa arnalǵan sybaılas jemqorlyqqa qarsy saıasat tujyrymdamasy bekitildi», dep atap ótti ol.
Erlan Qarın joǵaryda atalǵan barlyq jumystar ári qaraı jalǵasatynyn jetkizdi.
«Tutastaı alǵanda, Memleket basshysy usynǵan barlyq bastamalar dáıekti túrde praktıkada iske asyrylyp, azamattardyń ómir súrý sapasyn jaqsartýǵa jáne eldiń ornyqty damýyna tikeleı áser etetinin atap ótken jón. Osylaısha, iske asyrylǵan bastamalar jańa reformalar úshin negiz qalyptastyrady», dep qorytyndylady ol.
