Oblys ákiminiń aıtýynsha, 7 aıdyń qorytyndysy boıynsha aımaqtyń negizgi makroekonomıkalyq kórsetkishterinde oń dınamıka baıqaldy. Atap aıtqanda, byltyrmen salystyrǵanda tartylǵan ınvestısııalar kólemi 111,5 paıyzǵa, óndeý ónerkásibiniń kólemi 105,5 paıyzǵa ósken.
Nurlybek Nálibaev munaı qorynyń sarqylýy saldarynan munaı óndirý kóleminiń kemýiniń ornyn toltyrý úshin seısmıkalyq barlaý jáne gaz qorlaryn ıgerý jumystary qolǵa alynǵanyn habarlady.
«Investorlarmen jumys qarqyn alyp keledi. Siz júktegen tapsyrmaǵa sáıkes, quny 215 mıllıard teńgeni quraıtyn, qýaty 240 megavatt jańa jylý elektr ortalyǵy salynyp, 2025 jyly tapsyrylady. Sonymen qatar jeke ınvestor esebinen 11,8 mıllıard teńgege Qyzylorda qalasy áýejaıynyń jańa termınaly 2024 jyly halyq ıgiligine beriledi degen jospar bar», dedi ákim.
Oblys ákimi Syrdarııa ózeniniń joǵarǵy aǵysynda ornalasqan memleketter arasyndaǵy kelissózder nátıjesinde sý kólemi byltyrǵy deńgeıden artqanyn jetkizdi. Aımaqta sýdy az qajet etetin maıly jáne jemdik daqyldar alqaptaryn ulǵaıtýǵa basymdyq berilip, baqsha jáne kókónis alqaptarynyń kólemi kóbeıgen. Onyń aıtýynsha, óńirde kúrish salasyn damytýdyń jańa baǵdarlamasy ázirlenedi.
Memleket basshysy óńirdegi eńbek daýlaryn sheshý máselesine nazar aýdardy. Aımaqtaǵy iri 49 kásiporynmen memorandýmǵa qol qoıyldy. Aldaǵy ýaqytta qyzmetkerlerdiń eńbekaqysyn kezeń-kezeńimen arttyrý kózdelgen.
Aıta ketsek, bıyl oblysta 9 mektep, 1 Oqýshylar úıi, 2 balabaqsha paıdalanýǵa berilip, 11 dene shynyqtyrý kesheni, 6 mádenı nysannyń qurylysy júrip jatyr.
Qasym-Jomart Toqaev oblys ákimine óńirdegi turaqty áleýmettik-ekonomıkalyq damýdy qamtamasyz etýdi tapsyrdy.
