Birqatar baǵdar boıynsha óz oıymdy aıta keteıin. Aýyldyq jerde mal sany artqan saıyn jer daýy jıileı bastady. Jaıylymnyń tarlyǵy, shabyndyqtyń joqtyǵy kún tártibinen túspeıtin másele. Mine, búgingi Joldaýda Prezıdent jer máselesine nazar aýdardy. Álbette, ıgerilmeı bos jatqan jerlerdi memleket menshigine qaıtaryp, sharýashylyqpen shyndap aınalysyp otyrǵan azamattarǵa úlestirip berý qajet. Áıtpese, on sıyry bar azamat jer tappaı júredi de, bir tuıaq maly joq azamat júzdegen gektardy ıelenip otyrady. Ádildik qaıda? Jyl sońyna deıin 5 mln gektar jer qaıtarylý kerektigin aıtty. Ol úshin jergilikti jerlerdegi komıssııa jumys isteýi tıis.
Sondaı-aq Prezıdent jol qurylysyndaǵy sapasyzdyqty tilge tıek etti. Basqany bilmeımin, Shyǵys Qazaqstannyń joldary ábden tozdy. Salynyp jatqan Omby – Maıqapshaǵaı kúre joly saǵyzdaı sozylyp ketti. Joldaýdan keıin jol jóndeler dep bir túıip qoıdyq. Aıtqandaı, bıtýmnyń tapshylyǵyn da sóz etti Prezıdent. Kádimgi bıtým máselesin Memleket basshysy Joldaýyna qosyp otyrǵan soń jergilikti jerdegi ákimderden ne suraımyz?!
Joldaýda aýyl sharýashylyǵyna da nazar aýdaryldy. Sýbsıdııa alǵandarǵa baqylaý kúsheıtilý kerek dep qosty. Ras, sýbsıdııany alýyn alyp, eńbeginen nátıje kórsetpeı otyrǵan sharýalar joq emes.
Iá, áıelderdiń zeınet jasynyń 2028 jyly 61 jasqa deıin túsetinin aıtyp qýantty, balalarǵa qor ashylatynyn aıtyp taǵy qýantty. Bilim salasynda da jaqsy jańalyqtar bolatyn kórinedi. Bárine toqtalmaı-aq qoıaıyn, biraq tárbıeshilerdiń jalaqysy kóterilip, attestasııadan ótetindigi týraly dóp basyp aıtty. Iá, jalaqyny kóterý kerek. Biraq bala tárbıesine, bilimdi, bilikti tárbıeshi qajet. Ol úshin mindetti túrde synnan ótýi tıis. Áıtpese, balabaqshalarda beınekameraǵa túsip qalǵan tárbıeshilerdiń tárbıesizdigin kórip jaǵamyzdy ustaǵan edik.
Joldaýda jańalyq kóp. Endi onyń bári júzege asýy úshin biz jumys isteýimiz kerek. Joldaýdy uıyp tyńdap alyp, Prezıdentke qarap otyrýdy qoıý kerek. Júzege asyratyn ózimiz. Ras, sózden iske kóshý kerek.
Ádil Saılaýbek,
Qoǵam belsendisi, saıasattanýshy
