Ádiletti memleket. Birtutas ult. Berekeli qoǵam – bul biz úshin qasterli úshtaǵan. Eldiktiń úshtaǵany. О́ser eldiń, órkenin keńge jaıar jurttyń, qapysyz qoǵamdyq damýdyń, ómirsheń ulttyq ustyn men ustanymdardyń belgisi. Búgingi Joldaýdyń saıası salmaǵynyń basymdyǵy, aýqymynyń keńdigi, máni men maǵynasynyń tereńdigi de osy qasterli úshtaǵan – úsh uǵymnan anyq kórindi. Ádildik qaǵıdaty, birtutastyq ıdeıasy, bereke baılamy – bizdiń barymyz da, narymyz da osy. Bular bar jerde – biz barmyz, eńsesi bıik, erteńi jarqyn, muraty naq, maqsaty anyq halyq bar. Úmitsiz ult, armansyz adam bolmaıdy. Memlekettiń uly úmiti de osynda.
Berekeli qoǵam – besiginde perzenti ýildegen, qazanynda asy, dastarhanynda nany, qoımasynda qory, qorasynda maly bar, tatýlyǵyn tý etken, yntymaǵy yrysqa ulasqan, bir atanyń balasyndaı mámileli de ymyraly jurttyń qoǵamy emes pe. Mundaı qoǵam eń jaýapty kezeńde ekiudaı bolyp jarylyp, bólinýge emes, birigýge beıim, bir týdyń astynda turýǵa yntaly. Bir maqsat, bir tilekke jumylýǵa qulyqty. Osyndaı qoǵam ǵana birtutas ulttyń, birtutas ulttyq múddeniń jolyna qyzmet etedi. Al osy ekiniń biri bolmasa, ekinshisi de – tul. Birtutas ult berekeli qoǵam jasaıdy, berekeli qoǵam birtutas ultqa aınalady. Birtutas ult qana ádiletti memleket qura alady. Birine-biri baılanǵan, birine-biri aınalǵan, birinsiz biri joq osy úshtaǵan – bizdiń ulttyq ıdeıamyz.
Prezıdent Joldaýyndaǵy úshtaǵan uǵym jáne onyń jaqyn jyldar bederinde júzege asýǵa tıis bes baǵdary: jańa ekonomıkalyq saıasat, naqty sektordy damytý, el bolashaǵyna arnalǵan strategııalyq ınvestısııa, barshaǵa teń múmkindik, ultyń tabysyn teń bólý, memlekettik basqarý isin qaıta jańǵyrtý, zań ústemdigi – Jańa Qazaqstandy qurý úshin jasalǵan jalpyulttyq referendýmnan keıin iske asqan batyl reformalardyń sabaqty jalǵasy dep bilemiz. Osy reformalar áleýmettiń áleýetin arttyrýǵa, azamattyq qoǵam men zań ústemdigi saltanat quratyn ádiletti Qazaqstan qurýǵa naqty qadamdar boldy.
Prezıdent Joldaýynda kópshiliktiń kókeıinde kóp ýaqyttan beri júrgen kóp máseleni qozǵady. Jasyryp, jaba toqymaı tarqatyp aıtty. Halyq ıgiligi úshin ıgerilmegen ıesi kóp ıen jerdiń, suraýy kóp sýdyń, ekonomıkamyzdyń kúretamyry – joldyń jaıy sóz boldy. Reformalar el ómiriniń birde bir qajetinen aınalyp ótken joq. Túıtkildi máseleler tasada qalmady. Ulttyq baılyqty teń bólý men barshaǵa birdeı múmkindik berýden bastap otbasy ómiri, densaýlyq saqtaý, bilim berý, zeınetaqy júıesi men zeınet jasy, jer qoınaýyn ıgerý, agroónerkásip, bári-bári qamtyldy. Joldaýdan keıin ár taqyryp talapshyl ortada talqyǵa tústi. Sonda baıqaǵanymyz, eldi qýantqan eń mańyzdy jańalyq – eńbekaqyny naryqtyq jaǵdaıǵa saı ósirý, ulttyq qordan urpaqqa beriler enshi, bilim alýǵa beriletin jeńildetilgen nesıe jáne bir jyl ishinde júz myń jasty jumysqa ornalystyrý boldy. Munyń bári de el ishinde kópten aıtylyp júrgen kúrdeli máseleler edi. El Prezıdentiniń Halyq únine qulaq asatyn memleket tujyrymdamasynyń naqty jumys istep turǵanyn halyq sezine bastady. Joldaýda Memleket basshysy el birligi men ult tutastyǵyn basa aıtty. Osy qundylyq – ulttyń baılyǵy, qoǵamnyń qazynasy.
Qasiretti qańtar oqıǵasy ishtegi biteý jaradaı bolmaýǵa tıis. Halyqty qýantqan taǵy bir jaıt – Memleket basshysynyń qańtar oqıǵasyna qatysýshylarǵa qatysty bir rettik raqymshylyq jarııalaıtyndyǵy. Kezdeısoq qurbandar men óz kinásin túsingen kóp jastyń bolashaǵyn qorǵaý – meıirli memlekettiń qamqorlyǵy. Dana halqymyz «adasqannyń aıyby joq, aınalyp úıirin tapqan soń» deıdi. Arandap qalǵan azamattarǵa raqymshylyq jasaý – parasattylyq belgisi dep túsinemiz.
Árıne, Joldaýda aıtylǵan eń basty másele – Prezıdent saılaýy. Aldyńǵy Joldaýynda Memleket basshysy kóp artyqshylyqtan bas tartqan edi. Endi Memleket basshysy prezıdent mandatyn uzaqtyǵy 7 jyldyq bir merzimmen shekteýdi usyndy. Bul, bizdiń paıymdaýymyzsha, demokratııanyń dańǵyl jolyna jasalǵan úlken qadam.
Biz bárimiz – osy memlekettiń bólshegimiz. Ádiletti kezeńniń jańa paraǵy ashylǵanda sergektik pen jaýapkershilik tanytýymyz kerek. О́sken el, óreli jurt ekenimizdi kórsetýge tıispiz. О́ıtkeni el men jerdiń taǵdyry, ulttyń bolashaǵy – óz qolymyzda.
