Almatydan kelgen erikti Jandos Tálipovtiń aıtýynsha, mundaı jaǵdaıda shette qalýǵa bolmaıdy. «Zardap shekkenderge jaı sózben ǵana emes, ispen de kómekteskim keledi. Men barsha qazaqstandyqtardy zardap shekkenderge kómek kórsetýge shaqyramyn, Qostanaı, biz birgemiz!», dedi ol.
«Dál osyndaı ýaqytta biz eldigimizdi, aýyzbirshiligimizdi kórsetýimiz kerek. Sebebi ózgeniń basyna túsken qıyndyqqa beıjaı qarap, qol qýsyryp otyrýǵa bolmaıdy. Biz zardap shekkenderge múmkindiginshe tezirek qalypty ómirge oralýǵa jaǵdaı jasap, kómektesýimiz kerek», dedi óskemendik erikti Marlen Ábýbákir.
Aıta keteıik, qazirdiń ózinde qazaqstandyqtar joldaǵan alǵashqy kómek jıyn pýnkterine kelip túsýde.
Al partııanyń «Jastar Rýhy» jastar qanaty Qostanaı oblysynda órtten zardap shekkenderge kómek kórsetý úshin volonterler toptaryn jasaqtady. Túrkistan oblysynan kelgen volonterler alǵashqylardyń biri bolyp qalpyna keltirý jumystaryna qatysýǵa daıyn ekenderin bildirdi.
Belsendi Oljas Mamyrdyń aıtýynsha, Túrkistan oblysynyń jastary mundaı qıyn jaǵdaıdyń halyqqa qanshalyqty aýyr ekenin jaqsy biledi.
«Biz Arys pen Maqtaaraldaǵy oqıǵalardan keıin turǵyndarǵa kómektestik. Ol kezde elimizdiń túkpir-túkpirinen eriktiler oblysymyzǵa kelip, qalpyna keltirý jumystaryna tikeleı qatysty, qajetti ónimderdi jiberdi. Túnde «Jastar Rýhymen» habarlasyp, birge ekenimdi jetkizdim jáne meni eriktiler qataryna qosýdy suradym. Mine, tań ata salysymen eriktilermen alǵashqy gýmanıtarlyq kómekti jınaýǵa kiristik. Aldaǵy ýaqytta Qostanaı oblysyndaǵy órt shalǵan orynǵa Ońtústiktiń amanatyn jetkizemiz. Biz el azamattarymen birgemiz jáne oılanbastan Qostanaı oblysyna jol tartamyz», dep atap ótti Oljas Mamyr.
Qazirgi ýaqytta volonterler partııa fılıaldary janynan ashylǵan gýmanıtarlyq kómek jınaý pýnkterinde jumysyn jalǵastyrýda.
