«Qazaqstan Respýblıkasy Ulttyq bankiniń Aqsha-kredıt saıasaty komıteti bazalyq mólsherlemeni +/– 1,0 p.t. paıyzdyq dálizimen jyldyq 14,5% deńgeıinde belgileý týraly sheshim qabyldady. Tıisinshe, ótimdilikti usyný jónindegi turaqty qol jetkizý operasııalary boıynsha mólsherleme 15,5%-dy, al ótimdilikti alý jónindegi turaqty qol jetkizý operasııalary boıynsha mólsherleme 13,5%-dy quraıdy», delingen Ulttyq banktiń baspasóz qyzmeti taratqan habarlamada.
Sheshim qalyptasqan ekonomıkalyq jaǵdaıdy, táýekelder teńgerimin, sondaı-aq Ulttyq banktiń jańartylǵan boljamdaryn eskere otyryp qabyldandy. Logıstıkalyq qyzmetter qunynyń ósýinen, saýda áriptesi sanalatyn elderdegi joǵary ınflıasııadan jáne teńge baǵamynyń rýblge qatysty álsireýinen týyndaǵan syrtqy sektor tarapynan qysym saqtalýda. Degenmen álemdegi azyq-túlik baǵasy tómendep keledi.
Baǵanyń ósýine túrtki bolǵan ishki qozǵaýshy kúshter arasynda álemdik naryqtardan keıin azyq-túlik baǵasynyń tómendeýin tejeıtin jáne orta merzimdi perspektıvada suranys tarapynan joǵary qysym kórsetetin yntalandyrýshy fıskaldyq serpindi atap ótýge bolady.
Joǵary ınflıasııa ishki baǵalardyń syrtqy baǵa ózgeristerine beıimdelýine negizdelgen, bul qazirgi kezeńde aqsha-kredıt talaptaryn qosymsha qataıtýdy talap etpeıdi. Budan basqa, 2022 jyldyń basynan bastap bazalyq mólsherlemeniń aıtarlyqtaı artýynyń ekonomıkaǵa áseri áli de bolsa sońyna deıin baıqalmaı otyr jáne sharalardy túzetý úshin keıinnen tıisti baǵalaý júrgizý qajet.
Inflıasııalyq kútýler joǵary deńgeıde qalyp otyr. 2022 jylǵy tamyzdaǵy ınflıasııanyń medıanalyq baǵasy 16,5%-dy qurady.
«2022 jyly Ulttyq banktiń Qazaqstandaǵy ekonomıkanyń ósýine qatysty boljamdary iskerlik belsendiliktiń baıaýlaýy aıasynda qaıta qaraldy. Bıylǵy jyldyń qorytyndysy boıynsha, iri ken oryndarynda kútiletin josparly jóndeý jáne Kaspıı Qubyr Konsorsıýmynda saqtalyp otyrǵan belgisizdik aıasynda JIО́ dınamıkasy 2,5-3,5%-ǵa deıin baıaýlaıdy», delingen habarlamada.
Orta merzimdi baǵalaý 2023-2024 jyldary munaı óndirýdiń ósýi aıasynda eksporttyń óte jyldam ósýin kórsetedi. Memlekettik shyǵystardyń ósýi jaǵdaıynda tutynýshylyq suranystyń joǵary dınamıkasy qosymsha yntalandyrý kózderine aınalady. Sonymen birge, fıskaldyq yntalandyrýdyń saldary bolatyn ımporttyń joǵary dınamıkasy ishki suranystyń ósýin ishinara teńestiredi. 2023 jyly JIО́-niń ósý qarqynynyń 4-5%-ǵa deıin jedeldeýi boljanyp otyr. 2024 jyly JIО́ ósimi osyndaı deńgeıde bolady.
Qazirgi alǵysharttardy eskere otyryp, 2022 jyldyń sońyna taman ınflıasııa 16-18% aralyǵynda boljanady.
QR Ulttyq bankiniń Aqsha-kredıt saıasaty komıtetiniń bazalyq mólsherleme jónindegi kezekti josparly sheshimi 2022 jylǵy 24 qazanda Nur-Sultan ýaqytymen 14:00-de jarııalanady.
