Mereıtoı aıasynda birqatar mańyzdy ǵylymı-zertteý, mádenı jáne qoǵamdyq is-sharalar uıymdastyryldy. Jyl sońyna deıin Ahmet Baıtursynulynyń 12 tomdyq eńbekter jınaǵyn basyp shyǵarý jáne ony elimizdiń kitaphanalaryna taratý josparlanǵan. Sondaı-aq mereıtoı aıasynda uly aǵartýshynyń ómiri men qyzmeti týraly tolyqmetrajdy kórkem fılm túsirilimi josparlanyp otyr.
«Búginde biz ult ustazy, qazaq til biliminiń atasy, tól álipbıimizdiń negizin qalaýshy Ahmet Baıtusynulynyń 150 jyldyǵyn atap ótýdemiz. О́kinishke qaraı, kıeli Torǵaıdaǵy búgingi torqaly toı tilsiz jaýdyń kesirinen toqtatylyp otyr. Kesheli beri Qostanaı halqyna qol ushyn sozyp jatqan jandardyń sany artyp keledi. Bul – birligimiz ben yntymaǵymyzdyń belgisi. Halqymyz qandaı qıyndyqty da osyndaı birlikpen eńsergen. Eń bastysy, el aman bolyp, uly toıdyń qaıta jańǵyrýyna tilektespin», dedi Eýrazııa ulttyq ýnıversıtetinde ótken «A.Baıtursynulynyń ǵylymı murasy jáne jańa Qazaqstannyń zııatkerlik sabaqtastyǵy» atty ǵylymı-praktıkalyq konferensııa aıasynda QR Mádenıet jáne sport mınıstri Dáýren Abaev.
Aıta ketý kerek, jyl basynan beri Ahmet Baıtursynulynyń esimi respýblıkamyzdaǵy 1 aýylǵa, 200-den astam kóshege jáne 39 mektepke, 1 áýejaıǵa, 1 mýzeıge berilgen. Sondaı-aq shetelde is-sharalar josparlanǵan. 2021 jyly IýNESKO-nyń Bas konferensııasynda qazaq pedagogynyń mereıtoılyq kúnin osy uıymnyń ataýly kúnderiniń halyqaralyq kúntizbesine engizý týraly sheshim qabyldanǵan.
Sonymen qatar búgin elordadaǵy Jazýshylar alleıasynda «Alash qaıratkerleri» eskertkishine gúl shoqtaryn qoıý rásimi ótti.
