Sonymen qatar tilsiz jaýdan kóbirek japa shekken úsh aýyldyń turǵyndarynyń telekommýnıkasııa qyzmetine qatysty bereshegi men ósimpuly keshiriletin boldy.
– Zardap shekkenderge múmkindiginshe tezirek qalypty ómirge oralýyna kómektesý úshin qolymyzdan kelgenniń bárin jasaýǵa daıynbyz. Osyǵan baılanysty kompanııa basshylyǵy osy jyldyń sońyna deıin baılanys qyzmetteri úshin tólemderdi toqtata turý jáne abonentterdiń qaryzdary men qyzmetterdi ýaqtyly tólemegeni úshin salynatyn ósimpuldy joıý týraly sheshim qabyldady, – deıdi «Qazaqtelekom» AQ basqarma tóraǵasy Qýanyshbek Esekeev.
Bul jerde orman órtinen zardap shekken Áýlıekól aýdanynyń úsh aýyly – Ozernoe (8 úı zardap shekken), Lesnoe (1 úı janyp ketken) jáne Amanqaraǵaı (98 úı otqa oranǵan) aýyldarynyń turǵyndaryna jeńildikter qarastyrý týraly sóz bolyp otyr. Bul rette abonentterdiń telekommýnıkasııa qyzmetine bereshegi men ósimpuly tolyqtaı keshiriledi. Sondaı-aq órt saldarynan zaqymdanǵan barlyq klıenttik jabdyqtar esepten shyǵarylady jáne qajet bolǵan jaǵdaıda kompanııanyń esebinen osy eldi mekenderdiń abonentterine óteýsiz aýystyrylady. Sonymen qatar «Qazaqtelekom» mamandary osy úsh eldi mekendegi baılanys jelilerin qalpyna keltirý máselesimen aınalysýda. Sebebi tilsiz jaýdan jeliler júretin tirekter de zardap shekken.
– Amanqaraǵaı jáne Ozernoe aýylynda órt saldarynan turǵyn úılerdiń janynda ornalasqan 50-ge jýyq baılanys jelileriniń tirekteri janyp ketken. Jalyn 3 shaqyrymǵa jýyq syıymdylyǵy ártúrli kabelderdi jaramsyz etken. «Qazaqtelekom» AQ qyzmetkerleri qutqarý jumystaryna tikeleı qatysty jáne orman órtterinen zardap shekken eldi mekenderdi jalpy qalpyna keltirý sharalary bastalǵan kezde baılanys jelilerin jóndeý jumystaryn júrgizýge daıyn. Qostanaı oblysynda áli de orman órtteri jalǵasyp jatqanyn túsiný kerek. Sondyqtan biz ázirge órt toqtatylǵan eldi-mekenderdegi shyǵyndardy ǵana baǵalaı alamyz. Baılanys jelilerin qalpyna keltirý boıynsha jumystar óńirde budan da aýqymdy bolýy múmkin, – deıdi «Qazaqtelekom» AQ «Jeli» dıvızıony birlestiginiń sapa jónindegi dırektory Shyńǵys Qusqambasov.
