Osynaý aıtýly oqıǵaǵa oraı, QR Ulttyq ulany «Ońtústik» óńirlik qolbasshylyǵy qolbasshysynyń orynbasary polkovnık Nııaztaı Álkeshev bastaǵan áskerı qyzmetshiler men Ardagerler Keńesiniń tóraǵasy, zapastaǵy polkovnık Asatýlla Qulahmetov ǵasyr kýágeriniń shańyraǵyna baryp, ǵıbratty ǵumyr ıesin quttyqtady.
Qart jaýyngerdiń qurmeti úshin 5571 áskerı bóliminiń orkestri soǵys jyldaryndaǵy ánderdi oryndady. Al ulandyq jaýyngerler óz kezeginde ardagerge qurmet kórsetip saltanatty sherýmen júrip ótti.
– Búgin biz, Ulttyq ulannyń áskerı qyzmetshileri Uly Otan soǵysynyń ardageri, aty ańyzǵa aınalǵan Panfılov dıvızııasynyń soldaty Qaıyrly Ýataıuly Jonqabaevty quttyqtaýǵa keldik. Aıaýly ardagerlerge qurmet kórsetý – dástúrimiz. Biz olardyń Otanǵa janqııarlyqpen qyzmet etýiniń, soǵys jyldaryndaǵy kózsiz erlikteriniń úlgisinde óskeleń urpaqty tárbıeleımiz. О́kinishke qaraı, jyl ótken saıyn ardagerlerimiz azaıyp keledi. Sondyqtan biz olardy nazardan tys qaldyrmaı, qamqorlyq tanytyp kóńilderin aýlaýǵa tyrysamyz, – dedi «Ońtústik» óńirlik qolbasshylyǵy qolbasshysynyń orynbasary polkovnık Nıaztaı Álkeshev.
О́skeleń urpaq úshin Qaıyrly Ýataıuly 1921 jyly 10 qyrkúıekte Shyǵys Qazaqstan oblysy Samar aýdanynda dúnıege kelgenin eske sala ketý lázim. Eńbek jolyn 1940 jyly ShQO Qulja orta mektebinde muǵalim bolyp bastaǵan búgingi ardager 1941 jyly qazan aıynda Panfılov dıvızııasynyń 23-shi gvardııalyq polkine Qyzyl ásker jaýyngeri bolyp alynady.
Qaıyrly Ýataıuly soǵysqa basynan aıaǵyna deıin qatysqan. 8-gvardııalyq atqyshtar dıvızııasy quramynda pýlemetshi bolǵan, Keńes Odaǵynyń Batyry Málik Ǵabdýllınmen bir rotada áskerı boryshyn ótegen. Belorýssııa, Polsha, Estonııany azat etýge qatysady. 1943 jyly aqpanda Rjevtegi qandy maıdanda aýyr jaralanǵan, jeńisti Drezdende qarsy alady.
Uly Otan soǵysynda kórsetken erlikteri úshin «Qyzyl Juldyz», jáne II dárejeli «Otan soǵysy» ordenimen, «Erligi úshin», «Máskeýdi qorǵaǵany úshin» sııaqty basqa da medaldarmen marapattalǵanyn aıta ketý kerek.
Soǵys aıaqtalǵannan keıin ol kisi Samar aýdandyq atqarý komıtetinde bólim meńgerýshisi qyzmetin atqaryp, ári qaraı aýdandyq Tutynýshylar odaǵy júıesinde basshylyq laýazymdarda qyzmet atqaryp, 1983 jyly qurmetti eńbek demalysyna shyǵady. Bes bala tárbıelep ósirgen ardager búginde úbirli-shúbirli áýlettiń atasy.
ALMATY
