Úkimettiń 6 maýsymdaǵy №370 qaýlysyna sáıkes jazýshy esimin enshilegen orta mekteptiń saltanatty sharasyna Jetisý oblystyq máslıhatynyń hatshysy Gúlnar Qojaǵulqyzy, jazýshynyń qaryndasy Maıra Saparǵalıqyzy, Taldyqorǵan qalalyq máslıhatynyń hatshysy Temirbolat Janbolatuly shaqyrylyp, kezekpen sóz alyp, oqýshylardy alǵashqy qońyraýmen quttyqtady.
Aldymen Qazaqstan Respýblıkasynyń Memlekettik Gımnine tik turyp qurmet kórsetken kópshilik mektep oqýshylary daıyndaǵan konserttik baǵdarlamany tamashalap, jas ónerpazdardyń ónerine rızashylyq tanytty. Odan soń 1-synyp oqýshylaryna bilim kiltin tabystaǵan 11-synyp oqýshysy, «Altyn belgige» úmitker Nuraı Nurqaparova artynan ergen ini-sińlilerine júrekjardy tilegin arnady. Odan keıin ardager ustazdar aq tilegin arnap, jańa oqý jylynyń bastalǵanyn habarlady.
Qalamger esimin ıelengen №9 orta mekteptiń saltanatty ashylý rásimine oraı kelgen qonaqtar lenta qıyp, oqý ornynyń otandyq bilimge ólsheýsiz úles qosýyna tilektestik tanytty. Qonaqtardy shashýmen qarsy alǵan ájeler de shara shyraıyn kirgizdi.
Mektep dırektory Láılá Sembaevanyń aıtýynsha, jazýshy Saıyn Muratbekovtyń aty berilgen orta mekteptiń 1-synybyna 238 oqýshy barypty. Odan bólek, mektepte 1 797 oqýshy bilim alady. Ustazdyq qyzmetti atqaratyn 137 muǵalimniń 60 paıyzy jańa testileýden ótip, bilimi joǵary ekendigin dáleldegen. Mektep túlekteri bıyl Ulttyq biryńǵaı testileýdiń nátıjesi boıynsha 86 paıyzdy kórsetken.
Jetisý oblysy
