Kiristeri men múlki týraly deklarasııa (270.00-nysan) 2022 jylǵy 15 qyrkúıekke deıingi merzimde elektrondy túrde turǵylyqty jeri boıynsha memlekettik kirister organyna usyný qajet. Osy jyly deklarasııa tapsyrý boıynsha mindetteme kelesi sanattarǵa tıesili: jaýapty memlekettik laýazymdy atqaratyn adamdar men olardyń jubaılary (zaıyptary); memlekettik fýnksııalardy oryndaýǵa ýákilettilik berilgen adamdar men olardyń jubaılary (zaıyptary); memlekettik fýnksııalardy oryndaýǵa ýákilettilik berilgen adamdarǵa teńestirilgen adamdar men olardyń jubaılary (zaıyptary); «Qazaqstan Respýblıkasyndaǵy saılaý týraly» Qazaqstan Respýblıkasynyń Konstıtýsııalyq Zańyna jáne «Sybaılas jemqorlyqqa qarsy is-qımyl týraly», «Qazaqstan Respýblıkasyndaǵy bankter jáne bank qyzmeti týraly», «Saqtandyrý qyzmeti týraly», «Baǵaly qaǵazdar naryǵy týraly» Qazaqstan Respýblıkasynyń zańdaryna sáıkes deklarasııany tabys etý mindeti júktelgen adamdar.
2021 jyly jeke tulǵanyń aktıvteri men mindettemeleri týraly deklarasııasyn (250.00-nysan) usynǵan adamdar 2022 jyly kiristeri men múlki týraly deklarasııany (270.00-nysan) usynýǵa tıis. Bul mindetteme memlekettik qyzmetten bosatylǵan tulǵalarǵa jáne deklarasııa tapsyrýǵa mindetti azamattar sanatynan shyqqan tulǵalarǵa da qatysty.
Eger salyq deklarasııasy merziminde tabys etilmese, onda salyq organdary alǵashynda eskertýmen shekteledi. Eskertý berilgennen keıin bir jyl ishinde jeke tulǵa tarapynan qaıtalap buzýshylyq oryn alsa, on bes aılyq eseptik kórsetkish mólsherinde aıyppul salynady, ol búginde 45 945 teńgeni quraıdy.
