Teatr dırektory Ashat Maemırov búginde jazýshynyń shyǵarmalary ózektiligin joǵaltpaı áli kúnge deıin kóptegen qazaq teatrynyń sahnasynda qoıylyp júrgenin, sonymen qatar Mýzykalyq jas kórermen teatry eń alǵashqy shymyldyǵyn «Abaı-Toǵjan» mýzykalyq dramasymen ashyp, ony jyl saıyn ádetke aınaldyrǵanyn atap ótti. Sondaı-aq jańa maýsymda teatr ujymy kórermenge tyń týyndylardy usynatynyn, halyqaralyq festıvalderge qatysatynyn habarlady.
Úshinshi maýsymnyń ashylýyna Qazaq KSR Eńbek sińirgen ártisi, qazaqtyń «Qyz Jibegi» Merýert О́tekesheva, Qazaqstannyń eńbek sińirgen qaıratkeri, ánshi-kompozıtor Donedil Qajymov, basqa da elordalyq zııaly qaýym men jýrnalıster qatysty.
– Búgingi jańa maýsymnyń ashylýymen barshańyzdy quttyqtaımyn. Sonymen qatar bıyl qazaq ádebıetiniń klassıgi, ulttyq dramatýrgııanyń alyby Muhtar Áýezovtiń týǵanyna 125 jyl tolǵaly otyr. Buıyrsa, qazaq elinde úlken toı bolady. Sol toıdyń bastamasy retinde Muhtar Áýezovtiń qoıylymymen bastaý alǵandaryńyz barlyǵymyzdy qýantady. Búgingi qoıylymdaǵy Abaı men Toǵjannyń kirshiksiz mahabbatty – náp-názik ińkárliktiń belgisi. Ol ińkárlik adamǵa bir jylýlyq, tazalyq syılaıdy. О́nerdiń de bar qudireti osy emes pe?! Kórermenniń janyn jylytý, sezimin qozǵaý. Sahnadaǵy ártister de óz sheberlikterimen jastardyń sanasyn bir silkintti dep oılaımyn, – dedi Merýert О́tekesheva.
Adamzat tarıhyndaǵy birtýar tulǵalardyń bolmys-bitimindegi jasampaz rýh – balalyq shaqtan bastaý alady. «Abaı-Toǵjan» mýzykalyq dramasy – búginge deıingi uly aqyn jaıly qoıylǵan shyǵarmalardan bolmysy bólek, beınesi erek jańa týyndy. Balalar men jasóspirimderdiń dúnıetanymyna, talǵamyna, rýhanı bolmysynyń qalyptasýyna áser etetin bul qoıylym Abaı ǵumyrynyń bozbala kezeńinen kórinis beredi.
Jas Abaıdyń júreginde oıanǵan alǵashqy mahabbaty, kókireginde týǵan tuńǵysh jyry áýezdi ánge aınalyp, ishki sezim tebirenisterin alasapyran kúıge salady. Toǵjanǵa degen ińkár sezim – ómirge degen qushtarlyqqa ulasyp, Abaıdyń adamzatqa degen asqaq mahabbatynyń temirqazyǵyna aınaldy. Qunanbaıdaı ákeniń ónegesi, Uljandaı ananyń tárbıesi, qorshaǵan ortanyń tylsym syry, ǵashyqtyqtyń ǵalamaty, dos pen baýyrdyń qadiri jas kórermenniń janyna rýhanı lázzat syılap, sanasyna kórkem kózqaras qalyptastyrýǵa yqpal etedi. Abaı poezııasyndaǵy oıly jyrlar men esti ánder oryndalatyn qoıylymda ultymyzdyń qundylyqtary sahna bıigine kóteriledi.
Aıta keteıik, mýzykalyq dramanyń ınssenırovka avtory – Mıras Ábil, rejısseri – Ashat Maemırov, mýzykalyq keńesshi – Dımash Qudaıbergen, qoıýshy-sýretshi – Alma Syrbaeva, kompozıtory – Baýyrjan Aqtaev, baletmeısteri – Shyryn Mustafına, hormeısteri – Ǵalymjan Berekeshev.
Al Abaıdyń rólinde Dinıslam Nurmaǵambetov, Toǵjan – Arelana Amangeldıeva, Qunanbaı – Altynbek Amanqulov, Uljan – Samal Eslıamova, Ospan – Jasulan Abdrahman.
Ár jańa maýsym – kez kelgen óner ujymy úshin jańa beles. Teatr repertýaryn túrli baǵyttaǵy spektaldermen túrlendirip, talaı dodada top jarǵan ónerli ujymnan bıylǵy maýsymynda da jaqsy jańalyqtar kútemiz.
