Oqıǵa 8 qyrkúıek kúni Sharbaqty aýdanyndaǵy №2 orta mektebinde oryn alypty. Balalar kelesi kúni jergilikti emdeý mekemesine qusý, ishtiń qurysýy men ótýi boıynsha shaǵymdanyp, keıbirinde dene qyzýy 39 gradýsqa deıin kóterilgen. Sanıtarlyq-epıdemıologııalyq qyzmet mamandarynyń boljamynsha, oqýshylar mektep ashanasynda ýlanýy múmkin.
Oqýshylardyń tórteýi oblystyq balalar aýrýhanasyna jetkizilgen. Barlyq balalardyń ishinde úsh qyzdyń ekeýi 2-synypta, bireýi 9-synypta, bir ul 4-synypta oqıdy, ózgesi 6-synypta bilim alýda.
Mektep ashanasynda jospardan tys tekserý júrgizilip, sanıtarlyq dárigerler birqatar kemshilikti anyqtady. Aıtýlarynsha, tońazytqysh jabdyqtary termometrmen qamtamasyz etilmegen, tamaqtardyń táýliktik synamalary durys saqtalmaıdy, taǵam tasýǵa arnalǵan tabaqshalary jarylǵan, al tamaq ishýge arnalǵan ydystary eski ári mújilgen. Tipti aspazdarda jumysqa kirisýge dárigerlik ruqsaty qaǵazy bolmaı shyqqan.
Oblystyq densaýlyq saqtaý basqarmasynyń málimetinshe, aýrýhanaǵa jatqyzylǵan balalardyń barlyǵy búgin shyǵarylyp, úılerine jiberildi. Jaǵdaılary qalypty dep tanylǵan.
Aýdandyq bilim berý bóliminiń málimetinshe, mekteptegi ashana qyzmetin «Abýev» jeke kásipkerligi uıymdastyrady. Tekserý nátıjesi boıynsha jaýapty tulǵalarǵa shara qoldanylatyn bolady.
