Qazirgi kezde qos qandasymyzdyń da aıaqalysy óte jaqsy. Ásirese Shavqat Rahmonovtyń qarqyny qýantady. 27 jastaǵy sportshymyz aralas jekpe-jek jarystarynda kúsh synasyp júrgen segiz jylǵa jýyq ýaqyt aralyǵynda 16 kezdesý ótkizip, barlyǵynda aıqyn jeńiske qol jetkizdi. Sol básekelerdiń teń jartysynda qarsylastaryn uryp jáne teýip qulatsa, qalǵanyn sabmınsh ádisimen utty. Rahmonov toǵyz jekpe-jekti birinshi raýndta-aq aıaqtasa, alty aıqas ekinshi kezeńde toqtatyldy. Qazaqtyń ór minezdi ulymen tek bir ǵana faıterdiń úsh raýnd judyryqtasýǵa shamasy jetti. Ol – tájikstandyq Farýdın Adılov. Biraq tájik te ońbaı taıaq jep, aqyrynda jeńilgenin moıyndady. Dál osyndaı kórsetkishimen maqtana alatyn sportshylar Jer-jahanda kemde-kem.
UFC-de Shavqat tórt jekpe-jek ótkizip, barlyǵynda aıqyn basymdyq tanytty. Sonyń arqasynda qazirgi kezde ol jartylaı orta salmaqtaǵylardyń reıtınginde 11-oryndy ıelenýde. Endi bir-eki básekede jeńiske jetse, úzdikter tiziminiń aldyńǵy legine shyǵatyny anyq. Tipti chempıondyq belbeý úshin talasýy da múmkin. Biraq bul salmaqtaǵy myqtylardyń kóbiniń qazaq faıterimen kúsh synasýǵa júrekteri daýalamaıdy. Máselen, osydan biraz ýaqyt buryn Rahmonov Stıven Tompsonmen kezdesýge tıis edi. Alaıda reıtıngte jetinshi orynda turǵan amerıkalyq apaıtós bizdiń jigitpen judyryqtasýdan úzildi-kesildi bas tartty. AQSh-tyń TOP-10-dyqtaǵy taǵy bir ókili Shon Bredıge de usynys túskende ol da at-tonyn ala qashty.
Qaısarlyq qazaqtyń qanynda bar. Dál qazir Shavqatty kimmen shyǵarsa da onyń aıanbaı aıqasatyny anyq. Tipti osy salmaqtyń chempıony, 31 jastaǵy ulybrıtanııalyq Leon Edvars nemese taıaýda ǵana tuǵyrdan taıǵanyna qaramastan reıtıngte birinshi orynda turǵan 35 jastaǵy amerıkalyq Kamarý Ýsmanmen de jekpe-jekke shyǵýdan bas tartpaıdy. Biraq olardyń kelise qoıýy ekitalaı. О́ıtkeni qazirgi kezde ekeýiniń de dańqy dúrkirep tur. Eger UFC-diń basshylary «Mindetti túrde mynamen judyryqtasasyń» dep qatań talap qoımasa, Edvars pen Ýsmannyń táýekelge bara qoımasy anyq. Olar úshin aqshadan góri abyroı qymbat.
Reıtıngte ekinshi jáne úshinshi oryndarda turǵan Kolbı Kovıngton men Hamzat Chımaevtyń da tegeýrinderi óte kúshti. 34 jastaǵy AQSh sportshysy 20 kezdesýdiń úsheýinde ǵana jeńildi. Shvesııanyń týy astynda óner kórsetetin 28 jastaǵy cheshen jigiti 12 básekeniń barlyǵynda basymdyq tanytyp, 11-in merziminen buryn aıaqtady. Ol da dál Shavqat sekildi qarsylastaryn qoǵadaı japyryp keledi. Hamzattyń ekpindi shabýylyna Gılbert Berns qana shydas berdi. Asa shıelenisti básekede Brazılııanyń betkeustary shvesııalyq faıterden upaı sanymen ǵana utyldy. Sol sebepti de san mıllıon jankúıer kúni búginge deıin eshkimnen jeńilmegen Rahmonov pen Chımaevtyń aıqasyn kórýge aıryqsha qulyqty. Biraq UFC-diń óz esebi bar. Olar ekeýin tóbelestirýge asyǵatyn emes. Atalǵan promoýshenniń basshysy Dana Ýaıt: «Bul bir keremet jekpe-jeke bolatyny anyq. Biraq, asyqpańyzdar. Áli ýaqyty keledi», dep el-jurtty odan ármen qyzyqtyryp qoıdy.
Reseıdiń Orynbor oblysynda týyp-ósken 31 jastaǵy Damır Ismaǵulovtyń da osy sport túrin serik etkeli segiz jylǵa jýyqtady. 2015 jyly ol Ingýshetııanyń Nazran qalasynda ótken jarysta jergilikti sportshy Ramazan Esenbaevqa upaı sanymen ese jibergen edi. Bul – Ismaǵulovtyń karerasyndaǵy jalǵyz jeńilis. Al ol qalǵan 24 jekpe-jektiń barlyǵynda jeńiske jetti. 13 básekede aıqyn basymdyq tanytty. Qandasymyz UFC-de 2018 jyldyń jeltoqsan aıynan bastap óner kórsetýde. Sol aralyqta bes kezdesý ótkizip, barlyǵynda upaı sanymen jeńis toıyn toılady. Damır kúni keshe ǵana jeńil salmaqtylardyń reıtınginde birden úsh satyǵa joǵarylap, búginde 12-oryndy ıelenýde.
Qazaq faıteri kúsh synasyp júrgen salmaqta kil myqtylar jınalǵan. Charlz Olıveıra (Brazılııa), Dastın Pore (AQSh), Djastın Geıdjı (AQSh), Islam Mahachev (Reseı), Maıkl Chendler (AQSh) jáne Beneıl Darıýshtyń (Iran) qaı-qaısysyn alsańyz da, naǵyz dúleı kúsh ıeleri. Barlyǵynyń da dańqy órlep, ataqtary alysqa jaıylǵan.
Sol tizimde jetinshi orynda turǵan Rafael Fızıevtiń de qarqyny óte kúshti. Bul kúnderi Ázerbaıjannyń týy astynda óner kórsetip júrgen 29 jastaǵy mýaı-taıdyń has sheberi Qazaqstanda dúnıege keldi. Keıinnen uzaq ýaqyt boıy Qyrǵyzstanda turdy. Sondaı-aq Rafael Dos Anos (Brazılııa), Mateýsh Gamrot (Polsha), Arman Sarýkıan (Reseı) jáne Konor Makgregor (Irlandııa) syndy myqtylar UFC reıtınginde bizdiń Damır Ismaǵulovtyń aldyn orap tur.
Mine, búgingi tańda aralas jekpe-jekti serik etken sańlaqtarymyzdyń arasyndaǵy eń myqtylary osylar. UFC-de Shavqat pen Damırden bólek, Jalǵas Jumaǵulov, Sergeı Morozov, Marııa Agapova jáne Qytaıda týyp-ósken bir-eki qandasymyz bar. Sondaı-aq jerlesterimiz ACA, ON FC jáne taǵy basqa beldi uıymdarda tabysty óner kórsetip júr. Olardyń da erteńgi kúni álemniń eń beldi promoýsheninde kúsh synasatyny anyq. Sondyqtan da qazaq jigitteriniń atoı salatyn kúnderi alda dep nyq senimmen aıta alamyz.
