Mektepte sapaly bilim berý úderisi úshin qolaıly jáne qaýipsiz jaǵdaı jasalǵan. Interaktıvti qural-jabdyqtarmen qamtylǵan keń kabınetter, eki kompıýterlik synyp, yńǵaıly sheberhana, kitaphana, tolyq jabdyqtalǵan ashana jáne sport zaly bar.
Sonymen qatar bilim oshaǵynyń janynan mektepke deıingi bilim berý standartyna sáıkes 40 oryndyq shaǵyn ortalyq ashyldy. Aýdan ortalyǵyndaǵy jańa bilim nysanynyń ashylý saltanatyna oblys ákimi Arhımed Muhambetov arnaıy kelip qatysyp, mektep ujymy men oqýshylardy quttyqtady. Aımaq basshysynyń aıtýynsha, oblys aýmaǵyndaǵy basqa da bilim oshaqtaryn jańǵyrtý, olardyń materıaldyq-tehnıkalyq bazasyn nyǵaıtý jalǵasa bermek. Bıyl óńirdegi 30 aýyl mektebi jańa avtobýstarmen qamtamasyz etiledi. Al Qarabalyq aýdanyndaǵy mektepterge 5 jańa avtobýs beriledi. Búginde oblystaǵy 455 mektepte 113 myńǵa jýyq oqýshy bilim alady. Sonyń 11 734-i bıyl birinshi synyp tabaldyryǵyn attaǵan.
– Memleket basshysy Qasym-Jomart Toqaev Qazaqstan halqyna Joldaýynda «Orta bilimniń sapasy – tabysty ult bolýdyń mańyzdy sharty. Árbir oqýshynyń bilim alyp, jan-jaqty damýy úshin qolaıly jaǵdaı jasalýǵa tıis» dep bilim salasyna erekshe kóńil bóldi. Bıyl 150 jyldyǵy atap ótilip jatqan ult ustazy Ahmet Baıtursynuly «Halyqty aǵartý baladan, mektepten bastaý alady», dep bilimniń tiregi mektep ekenin aıryqsha atap ótken. О́ńirde Balalar jyly aıasynda bilim berý sapasyn arttyrý úshin barlyq qajetti shara qabyldanyp, taǵy birneshe zamanaýı mektep boı kóteredi. Qazirgi tańda Qostanaı qalasyndaǵy «Bereke», «Qonaı» shaǵyn aýdandarynda 2 mekteptiń qurylysy júrip jatyr. Al Qostanaı aýdanynyń Eńbek aýylynda quny 1,2 mlrd teńge bolatyn 100 oryndyq bilim oshaǵy salynady. Qarabalyq aýdanynyń Gýrıanov aýylynda 1,3 mlrd teńgege 100 oryndyq taǵy bir mekteptiń qurylysy bastalmaq. Jalpy, 2025 jylǵa deıin oblystyń Qostanaı, Arqalyq, Rýdnyı, Tobyl qalalary men Áýlıekól, Jitiqara, Qarabalyq, Qostanaı aýdandarynda 9 120 oqýshyǵa arnalǵan jańa 14 qazaq mektebi ashylady, – dedi aımaq basshysy.
Qostanaı oblysy
