Qazirgi ýaqytta arnaıy bólingen 12 ga aýmaqta 91 úı salynyp jatyr, árqaısysynyń aýdany – 100 sharshy metr. Sondaı-aq úılerdiń mańaıyndaǵy jer ýchaskelerine barlyq qajetti ınfraqurylym – gaz, sý, elektr energııasy júrgiziledi. Úılerge aparar joldarǵa asfalt salynady.
Oblys ákiminiń birinshi orynbasary Ǵaýez Nurmuhambetovtiń aıtýynsha, QazQSǴZI jobalaý ınstıtýty turǵynjaılardy sý basýdyń aldyn alý maqsatynda geologııalyq izdenister negizinde irgetastardy jerasty sýlarynan 2,5 m qashyqtyqta ornatý boıynsha joba ázirledi. 7 qyrkúıekte 13 merdigerlik uıym qurylys jumystaryna kiristi. Búgingi tańda barlyq úılerge arnap qazanshuńqyrlar qazyldy, 55 ýchaskede irgetas quıylyp, ekeýinde irgetas bloktaryn ornatý aıaqtaldy.
Premer-Mınıstrdiń tapsyrmasy boıynsha alańda ornatylǵan beınekameralardyń arqasynda qurylys barysy onlaın rejımde baqylanyp otyr. Premer-Mınıstrdiń aıtýynsha, barlyq qajetti jumystardy júrgizý úshin Úkimet 2,2 mlrd teńgeden astam qarajat bólgenin atap ótti.
«Qazir ákimdik pen merdigerlerdiń aldynda qurylys jumystaryn belgilengen merzimde – 2 aıda sapaly aıaqtaý mindeti tur. Bul másele Memleket basshysy men Úkimettiń erekshe baqylaýynda. Sondyqtan tapsyrmaǵa asa jaýapkershilikpen qaraý kerek», dedi Álıhan Smaıylov merdiger kompanııalardyń ókilderine.
Sodan keıin Premer-Mınıstr Áýlıekól aýylyndaǵy mektep bazasynda qurylǵan evakýasııalyq pýnktke baryp, zardap shekkendermen kezdesti.
«Turǵyndardyń alapat tabıǵı órtterdiń saldarynan qandaı qıyn jaǵdaıǵa tap bolǵanyn bilemiz. Osyndaı qıyn sátte memleket barlyq qajetti qoldaýdy jyldam kórsetti. Bul jumys jalǵasady», — dedi Álıhan Smaıylov. Úkimet basshysy Prezıdenttiń tıisti tapsyrmalar berip, jaǵdaıdy jeke baqylaýyna alý úshin oqıǵa ornyna arnaıy kelgenin atap ótti. «Osyndaı qıyn-qystaý kezeńde sabyrlyq tanytqandaryńyz úshin alǵys aıtamyn. Sondaı-aq halqymyzdyń birligin kórsetip, otandastaryna qol ushyn sozǵan barlyq qazaqstandyqtarǵa da alǵys bildirgim keledi», dedi Álıhan Smaıylov.
О́z kezeginde qaýipsiz jerlerge kóshirilgen turǵyndar memlekettiń nazar aýdaryp, qoldaý kórsetkeni úshin alǵys aıtty.
