Atalǵan qor basshysynyń aıtýynsha, halyqaralyq kompanııalar boıynsha óndiristik salada da, aldyńǵy qatarly ınvestısııalyq holdıngterde de tereń taldaý júrgizilgen.
«Kompanııanyń mıssııasy – halyq múddesi úshin aktıvterdiń saralanǵan portfeli men bıznes portfelin tıimdi basqarý arqyly ekonomıkanyń turaqty damýyna yqpal etý. Biz bıznes úshin ekojúıe quratynymyzdy jarııaladyq. Negizgi basymdyqtar retinde ornyqty damý, aktıvter portfelin tıimdi jáne belsendi basqarý negizge alynady. Bul rette «Samuryq-Qazynanyń» Qazaqstan ekonomıkasyndaǵy úlesi 2032 jylǵa qaraı 5%-ǵa deıin tómendeıdi, sondaı-aq atmosferaǵa kómirqyshqyl gaz shyǵaryndylaryn 10%-ǵa azaıtamyz», dep atap ótti A.Sátqalıev.
Sonymen qatar taza aktıvterdiń qunyn arttyrýdyń negizgi mindetteri belgilendi. Sonyń ishinde eńbek ónimdiligin arttyrý, joǵary tehnologııalyq óndiristerdi damytý, qarjylyq turaqtylyqty qamtamasyz etý, aktıvterdi jańǵyrtý, portfeldik kompanııalar basshylarynyń derbes jaýapkershiligin arttyrý aıqyn maqsat etip qoıyldy.
Buǵan qosa, qor strategııalyq aktıvterdegi baqylaý úlesterin saqtaıdy. 2025 jylǵa deıin IPO-ǵa QMG, AirAstana, SamrukGreenCo, QazaqGaz, QTJ kompanııalaryn shyǵarý josparlanyp otyr.
«Qor ekonomıkanyń negizgi sektorlaryn baqylaý úshin jetkilikti majorıtarlyq paketke ıe ınvestorǵa aınalady dep jarııalandy. Bul rette kompanııalardy aýqymdy jekeshelendirý júrgiziledi. Biz Úkimet bekitken, jetkilikti deńgeıde teńdestirilgen baǵdarlama ázirledik. Nátıjesinde, básekeles ortaǵa beriletin kompanııalardyń kólemi 105-ten 254-ke deıin ulǵaıtyldy. Dálirek aıtsaq, «QazMunaıGaz» kompanııasynda jergilikti bırjalardaǵy IPO úshin jetkilikti túrde belsendi daıyndyq jumystary júrgizildi. Qyrkúıektiń ekinshi jartysynan bastap Qazaqstan qalalarynda halyqtyń biraz bóligin qamtamasyz etý jáne tartý úshin rodshoý ótkizý josparlanyp otyr. AirAstana kompanııasy IPO-ǵa daıyn, halyqaralyq IPO-ny targetteý kózdelgen. Halyqaralyq naryqtar qalpyna keltirilgennen keıin qajetti qarajatty tartý úshin osy kompanııamen shyǵýǵa daıyn bolamyz. «Samuryq-Energo» ekige bólinedi. Birinshisi – SamrukGreenCo-da barlyq «jasyl» aksııa shoǵyrlanady. Bul – JEK, GES obektileri. Ekinshi kompanııada elektr energııasyn óndirý úshin tabıǵı qazbalardy paıdalanýǵa baılanysty barlyq aktıv toptastyrylady. SamrukGreenCo kompanııasy IPO-da Qazaqstandaǵy basqa da aktıvterdi jınaqtaıdy dep josparlap otyrmyz», dedi spıker.
Buǵan qosa, KEGOC boıynsha Úkimetpen básekeles ortaǵa beriletin aksııalar kólemin ulǵaıtý kelisildi. Qazirgi ýaqytta IPO-ǵa daıyndyq, mámile qurylymyn qalyptastyrý jáne zańnamalyq ózgerister pysyqtalyp jatyr. QazaqGaz kompanııasy boıynsha kompanııany IPO-ǵa shyǵarý jónindegi Jol kartasy túzildi. QazaqAir qarjylyq turaqtylyqty qalpyna keltirý, qaryzdardy qaıta qurylymdaý boıynsha jumys júrgizip jatyr. Jalpy, ınvestorlarǵa arnalǵan kompanııalar týraly tolyq aqparat ipo.sk.kz saıtynda jarııalanǵan.
Sondaı-aq «Qazaqstan temir joly» kompanııasy tolyqqandy logıstıkalyq korporasııa bolyp qaıta qurylady. A.Sátqalıevtiń aıtýynsha, fýnksıonaldyqty ózgertý, QTJ quzyretin kúsheıtý, onyń geografııasyn keńeıtý josparlanýda.
«Qazaqstan temir joly» – negizgi logıstıkalyq óńirlik hab. Sondyqtan tranzıttik tasymaldardyń ósý qarqynyn saqtap, kóliktik qyzmetterdiń álemdik naryǵyndaǵy básekege qabilettiligin arttyryp, servıs sapasyn jaqsartyp, saraptamalyq-tranzıttik áleýetti iske asyrý qajet. Osy maqsatta QTJ quzyretin kúsheıtý mańyzdy. Onyń ishinde taldaý jumysyn jaqsartý, logıstıka boıynsha quzyretter ortalyqtaryn qurý, kompanııanyń qatysý geografııasyn keńeıtý, ıaǵnı shetelde logıstıkalyq qyzmetterdi ilgeriletý, negizgi termınaldardyń jumysyn kúsheıtý, seriktestermen, kóliktiń basqa túrlerimen – ıahtalarmen, avıamen, teńiz kóligimen kollaborasııa jasaý, ınstıtýttyq negizdi damytý, qoldanystaǵy uıymdyq qurylymdy jáne bıznes prosesterdi ózgertý josparlanyp otyr. Bul rette kompanııanyń jekelegen qurylymdyq bólimshelerin jekeshelendirý qarastyrylǵan», dedi qor basshysy.
Sonymen qatar «Samuryq-Qazyna» qory Qazaqstandaǵy 16 jańa basym ınvestısııalyq jobalardyń tizimin usyndy. Qor 13 basym jobanyń birinshi paketin 2022 jyldyń kókteminde jarııalady. Oǵan Almaty JEO-ny gazdandyrý, Batys Qazaqstandy sýmen jabdyqtaý, jańa gaz qubyrlary men temir joldar salý sııaqty bastamalar kirgizildi. Al 16 jobanyń jańa tiziminde – munaı-gaz hımııasy, Ulttyq elektr jelisin jańǵyrtý, bazalyq qýat kózin salý, jańartylatyn energııa kózderin damytý jobalary, 5G ınternet jelisin ornatý, jańa temirjoldardy salý jáne basqa da jobalar qamtylǵan.
Jobalar Qazaqstan halqynyń ómir súrý sapasyn jaqsartýǵa baǵyttalǵan. Jumys oryndaryn ashýǵa baılanysty tikeleı áser etýden basqa, jobalar janama uzaq merzimdi áserlerge ıe. Naqty aıtqanda, olar – eńbek jaǵdaılary men ekologııalyq ahýaldy jaqsartýdyń, tirshilik etý deńgeıin arttyrýdyń, áleýmettik ınfraqurylymdy damytýdyń, bıznesti ilgeriletýdi yntalandyrýdyń jıyntyq nátıjesi.
Reformalar nátıjesinde «Samuryq-Qazyna» Prezıdent aıqyndaıtyn asa mańyzdy jobalarǵa ǵana teń ınvestor retinde qatysady.
Brıfıng barysynda jýrnalıster saýalyna jaýap bergen A.Sátqalıev elimizde atom elektr stansasyn salý jobasy aıasyndaǵy jumys bastalǵanyn málimdedi.
«Boljamdy energetıkalyq teńgerim 2023 jylǵa qaraı qýaty 2 400 megavatqa deıingi atom elektr stansasyn salý qajettigin kórsetti. Bizdiń qor Úkimettiń basshylyǵymen atalǵan jobany iske asyrýǵa kiristi. Bul baǵyttaǵy jumys týraly múddeli tulǵalar, jýrnalıster jáne jalpy qoǵam aldynda baıandap otyramyz», dedi spıker.
Sondaı-aq qor basshysy qaıyrymdylyq baǵyttary boıynsha atqarylatyn jumystar jóninde de aıtyp berdi.
«Memleket basshysy qor paıdasynyń 7%-y «Qazaqstan halqyna» qoryna jiberiletinin aıtty. 2018 jyldan bastap qor aksııalarynyń memlekettik paketinde dıvıdendter 13 ese ósti. Bıyl atalǵan kórsetkish 170 mlrd teńge bolady. Sonymen qatar shamamen 183 mlrd teńge qaıyrymdylyqqa jáne aksıonerlerdiń paıdasyna, ózge de bólýge baǵyttalady. Qordyń qaıyrymdylyq baǵdarlamasy bar. Bul jumysty «Samuryq-Qazyna trast» kompanııasy júzege asyrady», dedi ol.
