«Qasym-Jomart Toqaev álemdegi jáne Amerıkadaǵy iri kompanııalardyń, zertteý ortalyqtarynyń basshylarymen kezdesti. Olardyń qatarynda Goldman Sachs, Grupo Los Grobo, JPMorgan Chase & Co., Eurasia Group, S&P Global jáne ERAM systems, Coursera syndy kompanııa ókilderi bar», dep jazdy Rýslan Jeldibaı Feısbýktegi paraqshasynda.
Bul kezdesýlerde ekijaqty ortaq jobalar, keıbir kompanııalardyń Qazaqstanda óndiris oryndaryn ashý, mamandardy oqytý jáne basqa da máseleler talqylanǵan.
«Sondaı-aq Memleket basshysy Dúnıejúzilik ekonomıkalyq forýmnyń negizin qalaýshy Klaýs Shvabpen, USAID jetekshisi Samanta Paýermen jolyqty. Shvab myrza Prezıdentti 2023 jyly qańtarda Davosta ótetin kezekti álemdik ekonomıkalyq forýmǵa qatysýǵa shaqyrdy. Budan bólek, jahandyq konsaltıng kompanııalardyń ókilderimen, bedeldi sarapshylarmen mazmundy kezdesýler ótti», dedi ol.
Prezıdent mamandarmen álemde bolyp jatqan ózgerister, jańa trendter men qaýip-qaterler jaıynda pikir almasqan.
«Al túske qaraı AQSh-ta IT salada qyzmet etip júrgen qazaq jastarymen jolyqty. Digital Nomads qaýymdastyǵy – búginde 400-ge jýyq jastyń basyn qosatyn irgeli uıym. Jas mamandar elimizde IT sektordy damytý joldaryna qatysty óz usynystaryn aıtty. Prezıdent jerlesterimizge zor tabys tilep, olar elimizdiń damýy men órkendeýine eleýli úles qosatynyna senim bildirdi», dep túıindedi jazba sońyn Rýslan Jeldibaı.
Aıta keteıik, Prezıdenttiń tústen keıingi kezdesýleri jaıly saıtymyzdan oqı alasyzdar.
