Qys kezeńine jan-jaqty daıyndyq

Máselen, Abaı aýdanyna qaras­ty Yntymaq-2 shaǵyn aýdany­nyń Batys bóligin alyp qaraýǵa bolady. Bul eldi mekende resmı derek boıynsha 2 071 úı ornalasqan. Qala shetinde bolǵandyqtan osy kún­ge deıin ınfraqurylymmen qamtý máselesi óte ózekti bolyp keldi. Jer­gilikti ákimdik josparyna sáıkes qazirgi tańda munda gaz, sý, jol, jaryq máselesin birjolata sheshý maqsatynda qurylys jumystary qarqyndy júrgizilýde. Atqarylyp jatqan jumysty naqty kózben kórý úshin shahar basshysy M.Áıtenov atalǵan eldi mekenge arnaıy baryp, nysandardaǵy qurylystyń sapasyn tekserdi. Sonymen birge jergilikti turǵyndarmen kezdesip, olardyń kommýnaldyq jáne basqa da máseleleri boıynsha ótinish-tilek­terin tyńdady. Aıta ketý kerek, eldi mekendi sapaly elektr qýatymen qamtý jumystary joǵary qarqynmen atqarylýda. Osy maqsatqa oraı merdiger kompanııa «Týran Energo grýpp» JShS elektr energııasymen qamtamasyz etý baǵytynda qurylysty qolǵa alyp, kestege saı óz ýaqytynda aıaqtaýdy josparlap otyr. Al taǵy bir merdiger kompanııa «Energo resýrs Shymkentgaz» JShS bolsa, eldi meken aýmaǵynda gaz qubyrlaryn tartýmen aınalysýda. Atalǵan eki nysannyń da qurylys jumystary jyl sońyna deıin aıaqtalady dep kútilýde. Sodan soń jospar boıynsha abonentteý jumystary bastalady. Mine, osylaısha ınfraqurylymmen qamtý isi tolyǵymen aıaqtalǵannan keıin atalǵan shaǵyn aýdan turǵyndary sapaly gaz ben elektr qýatyna qol jetkizedi.

Al shaǵyn aýdannyń kóshelerin asfalttaý jumystary kelesi jyldan bastap kezeń-kezeńimen boıynsha júzege asyrylady. Qazir onda 22 kóshe bolsa, sonyń 4-i ǵana asfalttalǵan, qalǵandarynan 15 jolǵa tas tóselse, 3-i topyraq jol. Shaǵyn aýdanda turatyn halyq balalaryn osyndaǵy 1 mektepte oqytsa, baldyrǵandar 3 balabaqshada tárbıelenedi. Endigi rette eldi mekenniń Batys bóliginen 900 oryndy záýlim mektep salý úshin 2,46 gektar jer teliminiń qujaty resimdeldi. Munymen qosa qazir jobalyq-smetalyq qujattamasy da ázirlený ústinde. О́tken jyly tur­ǵyndardyń paıdalanýyna 1 sport alańshasy berilgen. Ákimmen bolǵan kezdesýde turǵyndar shaǵyn aýdanda biraz jyl problema bolyp kelgen keıbir turmystyq másele­lerdiń sheshimi tabylǵany úshin shahar basshysyna alǵysyn bildirip, ózge de máselege qatysty aryz-shaǵymdaryn jetkizdi.

Máselen, aýyl bıi Á.Balǵabaı­uly­nyń aıtýynsha, burynǵy kezde belsendi retinde turǵyndardyń muń-muqtajyn joǵary jaqqa jetkizý úshin kóp jerge barypty. Alaıda nátıje­si az bolatyn. Tek sońǵy eki jyl­dan beri jergilikti ákimdikpen tyǵyz qarym-qatynas ornatyp, birge qoıan-qoltyq jumys isteýdiń nátıjesinde halyqtyń ótinishi eskerilip, talap-tilegi der kezinde oryndala bastady. Sonyń bir aıǵaǵy, qolǵa alynyp jatqan ınfraqurylymdyq ju­mystar. Endigi jerde shaǵyn aýdan tur­ǵyndaryna joldar asfalttalyp, sapaly elektr energııasyn tutynatyn kún de jaqyn qaldy.

Osy rette halyqty mazalaǵan máselelerdiń taıaý arada oń sheshimin tabýy úshin ákimdik tarapynan arnaıy hattama toltyrylyp, olardy oryndaý tikeleı tıisti sala basshylaryna tapsyrma retinde júkteldi.

Sonymen birge Shymkenttegi Abaı aýdanyna qarasty Kókbulaq eldi mekenin ınfraqurylym júıeleri­men qamtamasyz etý baǵytynda da jumystar qarqyn alǵan. Mundaǵy atqarylyp jatqan qurylys jumys­taryn qala ákiminiń ózi baryp arnaıy kórip qaıtty.

Aıta ketý kerek, turǵyn alabyna byltyr tolyq optıka jelisi tartylyp, sonyń nátıjesinde sapaly ınternetpen qamtyldy. Budan bólek ótken jyly turǵyndar aýyz sý men jaryqqa júz paıyz qosyldy. Al «kógildir otynmen» osy jyldyń aıaǵyna qaraı qamtylatyn bolady. Búgingi tańda qurylys jumystarynyń 90 paıyzy bitip qoıǵan. Eki myń adamnan astam halyq turatyn Kókbulaqtaǵy taǵy bir ózekti máseleniń biri – joldyń jaǵdaıy bolyp keldi. Jóndeý jumys­tarynyń nátıjesinde qazirgi tańda 9 kósheniń beseýine tas tóselip, tórt kóshe asfalttaldy. Jalpy, ótken jyly 6 shaqyrym jolǵa shaǵal tas tóseldi.

Endi kelesi jyly Aǵybek ata, Úrkinbaı ata, Jomart ata sekildi kóshe­lerge asfalt jol túsedi. Al 2024 jyly Mańlaı ata men Jangeldi batyr kósheleri asfalttalǵan, taq­taıdaı tegis jolǵa aınalady. Qoǵam­dyq kólik máselesi sheshilip qoıdy. Búgingi tańda №146 jáne №180 mar­shrýt­taǵy avtobýstar eldi mekenge qatynap júr. Budan bólek, byltyrǵy men bıylǵy jyldy qosqanda 3 balalar alańshasy paıdalanýǵa berildi. Turǵyndardyń ótinishi boıynsha osy jyly Esbol qajy kóshesiniń 800 metri jaryqtandyryldy.

Sonymen birge Shymkent qala­­­sy­nyń ákimi M.Áıtenovtiń tóraǵa­­lyǵymen ótken jıynda shahar­dyń jylý berý maýsymyna daıyndyq jumystary pysyqtaldy. Málimet boıynsha megapolıste ornalasqan «3-Energoortalyq» AQ-daǵy 2 týrbına men 3 qazandyq aǵymdaǵy, al tranformatorlar kúrdeli jóndeýden ótkizilipti. Qalǵan 3 boılerdi kúrdeli jóndeý 82%, qosalqy jabdyqtar­dy aǵymdaǵy jóndeýi 95%-ǵa iske asyrylǵan. Osyǵan baılanysty qal­ǵan jumystar 10 kún ishinde to­lyq aıaqtalmaq. Sonymen birge «Qýat­jylýortalyq-3» MKK-ǵa qaras­ty 15 jylý qazandyǵy 13-i qysqy jylý berý maýsymyna saqadaı-saı. 2 qazandyqty mekeme mamandary jylý berýge ázirlep jatyr. Budan bólek 17 sorǵy stansanyń 15-i iske daıyn tursa, qalǵan ekeýin retteý jumystary áli jalǵasýda.

Jylý júıeleriniń tozý deńgeıin tómendetý maqsatynda 19,4 shaqy­rym jylý júıelerine aǵymdaǵy jóndeý júrgizilip, búginde 97%-ǵa oryndaldy. 1 987 kópqabatty turǵyn úıdiń 93,7%-y ıaǵnı 1 863 úı jylytý maýsymyna ázir. 124 kópqabatty turǵyn úıdiń jylytý júıelerin qalypqa keltirý jumystary aldaǵy kúnderi aıaqtalady. Sondaı-aq qalada 484 bıýdjettik mekeme bar. Olardyń qysqy jylytý maýsymyna ázirligi 99%-dy quraıdy. Qala turǵyndarynyń qatty otynǵa degen qajettiligi 66 myń tonna bolsa, búginge deıin 114 myń tonna kó­mir tasymaldanyp, qoımalarda onyń 25 myń tonna qory jatyr. Infraqurylym júıeleriniń de da­ıyn­dyǵy 90 paıyzǵa jetip otyr.

Jıyn qorytyndysynda qala ákim­digi tarapynan qys mezgilinde turaqty jáne sapaly jylý berýdiń mańyzdylyǵy aıtyldy. Jáne de osyǵan baılanysty tıisti sala bas­shylaryna eseptegi sandyq kórset­kishterdi jiti tekserip, isten shyǵý qaýpi bar núktelerdi anyqtaý tapsyryldy. Áli kúnge deıin jalǵasyp jatqan kúrdeli jóndeý jumystary da jiti qadaǵalaýǵa alynyp, qyrkúıektiń sońyna deıin aıaqtaý josparlanyp otyr.

ShYMKENT