«Reseılikter bizge issaparmen nemese týrızm maqsatynda kelse, biz olarǵa shekteý qoıa almaımyz. Bul qazaqstandyqtar da Reseıge bara alatyny sııaqty ózara prosess. Sondyqtan biz ony shekteı almaımyz», dedi Máýlen Áshimbaev palatanyń jalpy otyrysynda.
Sondaı-aq Senat spıkeri olarǵa elimizde ómir súrýge ruqsat berý múldem basqa másele ekenin atap ótti.
«Eger biz Qazaqstanda ómir súrý týraly aıtatyn bolsaq, onda bul bólek másele. Kez kelgen basqa eldiń azamatynda Qazaqstanda turý úshin óz memleketiniń ruqsaty bolý kerek. Bul týraly bizdiń zańdarda anyq jazylǵan», dep túsindirdi M.Áshimbaev.
Budan soń, turǵylyqty turýǵa yqtııarhat alý úshin ótinish berýshiniń shyǵý paraǵy jáne zańda kózdelgen basqa da qujattary bolýy kerektigi aıtyldy.
«Saıası baspana – bul basqa másele. Saıası baspana berý, bosqyn dep taný jáne bosqyn mártebesin berý basqa dúnıe. Olar halyqaralyq kelisimdermen jáne BUU bekitken tıisti qujattarmen retteledi. Bul múlde basqa áńgime, qazir bul týraly sóz qozǵalǵan joq», dep qosty spıker.
Eske sala keteıik, keshe Reseı prezıdenti Vladımır Pýtın Reseıde ishinara jumyldyrý týraly jarlyqqa qol qoıǵan edi.
