«Sizderdi Qazaqstanda qarsy alǵanyma shyn júrekten qýanyshtymyn. Prokýratýra qyzmeti zańdylyq pen quqyq ústemdigin qamtamasyz etýde, ádiletti qoǵam qurýda mańyzdy ról atqarady. Osy turǵyda Qazaqstan ShYU memleketteri qadaǵalaý organdarynyń kópjyldyq yntymaqtastyǵyn joǵary baǵalaıdy. Transulttyq qylmysqa qarsy is-qımyl ShYU-nyń negizgi mindetteriniń biri sanalady. Ony sheshý óńirlik qaýipsizdikti nyǵaıtýǵa yqpal etedi», dep jazdy Prezıdent quttyqtaý hatynda.
Memleket basshysynyń aıtýynsha, búginde elden zańsyz shyǵarylǵan qarajatty qaıtarý ózekti másele bolyp otyr.
«20-shy mereıtoılyq otyrystyń kún tártibine zańsyz shyǵarylǵan qarajatty qaıtarý boıynsha tájirıbe almasý máselesi engizildi. Bul másele ShYU-ny jahandyq ekonomıkalyq platformaǵa aınaldyrý perspektıvalary salasynda erekshe ózekti bolyp otyr. ShYU aıasynda ózara tıimdi áriptestiktiń zor áleýetin tolyqqandy paıdalaný kóp jaǵdaıda transulttyq ekonomıkalyq qylmysqa qarsy kúres jónindegi birlesken kúsh-jigerdiń tıimdiligine baılanysty ekeni anyq. Búgin nátıjeli pikir almasý ótip, osy baǵyttaǵy jańa tásilder ázirlenedi dep senemin. Otyrysqa qatysýshylarǵa qoıylǵan mindetterdi sheshýde tabys tileımin», dedi Qasym-Jomart Toqaev.
