Kóshpeli halyqtardyń mádenıeti men sportyn jandandyrýǵa baǵyttalǵan sporttyq is-sharalar «Bolashaqqa jiberilgen dástúrli qoltańba» uranymen ótedi. Sondaı-aq jarystar qatysýshy elder arasyndaǵy mádenı baılanystardy nyǵaıtý jolymen álemniń kóshpeli halyqtarynyń mádenıetin saqtaý jáne jańǵyrtý maqsatyn kózdeıdi.
Aldyńǵy úsh oıynda Qazaqstan quramasy belsendi qatysyp, jalpy komandalyq esepte júldeli oryndarǵa ıe bolǵan. Otandastarymyz 2014 jyly ótken alǵashqy oıyndarda 2-shi orynǵa, eki jyldan keıin 3-shi orynǵa, al 2018 jyly 2-shi orynǵa turaqtady.
Kóshpendiler oıyndary qarsańynda Qazaqstan quramasy el ishinde de, shetelde de arnaıy oqý-jattyǵý jıyndarynan ótti.
Ulttyq sport túrleri boıynsha olımpıadaǵa álemniń 100 elinen 23 sport túri boıynsha sportshylar qatysady. Kókpardan qazaqstandyq komanda quramyna Álem chempıondary Ulan Baıtóreev (komanda kapıtany), Abylaıhan Nyshanbekov jáne «Ǵasyr oıynshysy» atanǵan Qurmanbek Turǵanbek kirdi.
Palýandardyń kóshin qazaq kúresinen respýblıkalyq «Qazaqstan barysy» týrnıriniń jeńimpazy – Maqsat Isaǵabylov bastaıdy.
Túrkııada jamby atýdan ulttyq qurama músheleri, birinshi álem chempıony - Eralhan Aıqoz, álem chempıony – Abzal Týlybekov, Azııa chempıony – Baqdáýlet Babajan óner kórsetedi.
Dástúrli sadaq atýdan Dıas Ahmetov (Qazaqstan kýbogynyń jeńimpazy), Erbol Tápenov (álem Kýbogynyń kúmis júldegeri) jáne Angela Tarysa (álem kýbogynyń jeńimpazy) óz sheberlikterin kórsetedi. Sondaı-aq teńge ilý jáne aýdaryspaq boıynsha taǵy tórt sportshy qatysady.
