Qazir ashyq zaman. Ashyq qoǵam. Qazaq qaı dáýirde bolsa da tarıhyn umytpaǵan. Qınalǵanda da, qýanǵanda da ata-baba rýhyna súıengen: osy ejelgi dástúr búgingi zamanda jalǵasyn taýyp jatyr. Prezıdenttiń Qoja Ahmet Iаsaýı babamyzdyń basyna baryp medet suraǵany tekten tek nárse emes, munda qazaqtyń handary men bıleri, batyrlary men bekteri máńgi meken tapqan!
Prezıdentimiz Túrkistan oblysy turǵyndarymen kezdesip, eldegi jáne álemdegi jaǵdaıdy túgel saralap aıtyp berdi.
Birikken Ulttar Uıymynyń tórinen sóz alǵanda Qazaq eliniń terrıtorııalyq tutastyǵy men egemendigin qorǵaý men saqtaýdyń amalyn negizge alǵanyn atap ótti. Mekkege barǵan saparynda eldiń amandyǵy men ıgiligi úshin arnaıy duǵa jasaǵanyn da qaperge saldy.
Taıtalasqan zaman. Dúnıeni dúnıe bılegen dáýir. Alpaýyttar aıqasy júrip jatyr. Qazaq eli osyndaı alaǵaı da bulaǵaı qansha kezeńdi basynan ótkerdi. Bul – úlken synaq. Bilimiń men biligińe súıenbeseń, Abaı aıtqandaı «Aqylyń men qaıratyńa, eńbegińe júginbeseń, kóringen kúshtiniń qanjyǵasyna bókterilip ketý ońaı». Yntymaq pen birlik – halqymyzdyń qýaty men qalqany! Memleket basshysynyń Qasıetti Túrkistanǵa táý etýi – ejelden qalyptasqan eldik dástúrdi ustanýy. Munda úlken maǵyna bar.
Prezıdent aýqymdy reformalardy qolǵa aldy. Keıbireýler «qańtardan beri ne ózgerdi, bári baıaǵy qalypta» degendi aıtady. Júıeli reforma bir kúnde jasalmaıdy. Osyny túsingen abzal. IT mamandarynyń tilimen aıtar bolsaq, matrısany jańalaý, ıaǵnı qoǵamda úlken «perezagrýzka» júrip jatyr. Eń myqty degen sýper kompıýterdiń ózine «qaıta tynystaý» qajet bolatynyn eskersek, qazaq qoǵamyna da sondaı kezeń týǵanyn túsiný qajet.
Prezıdenttiń sózine qulaq túreıik: «Prezıdenttik laýazymǵa kóp jyl boıy bir ǵana adam ıe bolmaýy kerek. Álemde bolsyn, bizdiń elimizde bolsyn kóp jyl boıy bir ǵana adam eń joǵary laýazymǵa ıe bolsa, mundaı jaǵdaı elge de, memleket basshysyna da abyroı ákelmeıdi. Biz bolashaqqa nyq senimmen qarap, adal, daryndy saıasatkerlerge jol ashýymyz kerek».
Barynsha aıqyn. Meılinshe naqty. Eshteńeni jaba jasyryp, búrkemelep otyrǵan joq. Sondyqtan eldiń bútindigi men berekesin oılaıtyn zerdeli azamattar memleketshildik baǵyttan jańylmaı, ýaıymǵa salynbaı, qaıratyna qaırat, aıbatyna aıbat qossa deımiz.
Nurtóre JÚSIP,
Senat depýtaty
