Astana qalasynyń polısııa departamenti kóshi-qon qyzmeti basqarmasynyń basshysy Arman Baımuhambettiń málimetinshe, jyl basynan beri elordada 29 myńnan asa shetel azamaty tirkelgen.
– Onyń 4 myńy – Reseı azamaty. Osy ýaqytqa deıin kóshi-qon zańnamasyn buzǵany úshin 5 myńnan asa shetel azamaty jaýapkershilikke tartylyp, 867 adam elden shyǵaryldy. Sheteldikterdi shaqyryp, olardyń elde bolý talaptaryna nemquraıdy qaraǵan, ıaǵnı tıisti erejelerdi saqtamaǵan 1083 adam ákimshilik jaýapkershilikke tartyldy. Sheteldik azamattardy jumysqa tartyp, jumysqa paıdalaný erejelerin buzǵany úshin 93 jumys berýshi anyqtaldy. Tirkeý jáne qujattandyrý erejelerin buzǵany úshin 2 866 azamat ákimshilik jaýapkershilikke tartyldy. Shetel azamattarynyń el shekarasyna enýi týraly aqparat mindetti túrde quqyq qorǵaý organdaryna habarlanýǵa tıis, – dedi A.Baımuhambet.
«Azamattarǵa arnalǵan úkimet» memlekettik korporasııasy KeAQ Astana qalasy boıynsha fılıaly dırektorynyń orynbasary Dınara Qýanyshevanyń aıtýynsha, shetel azamattary tarapynan ótinishtiń kóp túsýine baılanysty Saýran kóshesi, 7 mekenjaıy, «Nurly jol» vokzalynyń ǵımaratynda kóshi-qon qyzmetin usynatyn qosymsha sektorlar iske qosylǵan.
Qalalyq jumyspen qamtý jáne áleýmettik qorǵaý basqarmasynyń basshysy Ilıa Skýbtyń málimdeýinshe, bosqyn mártebesin alý úshin 96 adam ótinish bildirgen. Onyń ekeýi – Reseı azamaty. О́tinishti qarastyrý 3 aıǵa sozylady. «Búginde portalda 6 myńnan astam bos jumys orny bar. Ázirge jumys suraǵan Reseı azamtary joq», deıdi I.Skýb.
