ELBASYTANÝ – ELTANÝ

«Nursultan Nazarbaev. О́mirbaıan»  kitaby arab tilinde jaryq kórdi

Birikken Arab Ámirlikteri qa­zirgi tańda álemdegi eń áleýetti el­derdiń birine aınalǵany bar­shaǵa belgili. El astanasy Ábý Dabıde ne kóp kórme kóp, ne kóp festıval kóp, ne kóp jarys kóp. Bári de halyqaralyq kórme­ler, halyqaralyq festıval­der, halyqaralyq jarystar. Tek mádenıetke, sportqa qatys­ty­laryn aıtqannyń ózinde kórkem fotografııa kórmesi, trıatlon jarysy, óner festıvali, sý sporty festıvali, ańshylyq pen at sporty kórmesi, Grand-prı Formýla-1 rallıi, túıeler fes­tıvali, Ábý Dabı Art búgingi óner kórmesi, golf chempıonaty degen sııaqty birinen biri qyzyqty is-sharalar jyl boıy jalǵasady da jatady. Olardyń bárine birdeı mınıstrdiń ózi qatysa qoıýy qıyn. Onyń ústine Mádenıet, jas­tar isi jáne qoǵam damýy mı­nıstri qyzmetindegi sheıh Nahaıan ben Mýbarak Al Nahaıan el Prezıdenti sheıh Halıfa ben Zaıd Al Nahaıannyń týǵan baýyry bolsa, mınıstr qatysatyn is-sharanyń básin ózińiz baǵalaı berińiz. Mádenıet, jastar isi jáne qoǵam damýy mınıstri sheıh Nahaıan ben Mýbarak Al Nahaıan Ábý Dabı halyqaralyq kitap jármeńkesiniń ashylý rásimine ózi keldi. Sórelerine 600 myńnan astam kitap ónimderi qoıylǵan Ulttyq kórme ortalyǵynda dál sol kúni Elbasymyz Nursultan Nazarbaevtyń ómirbaıany týraly jazylǵan Mahmut Qasymbekovtiń «Nursultan Nazarbaev. Qazaqstan Respýblıkasynyń Tuńǵysh Pre­zıdentiniń ómirbaıany» degen atpen (túpnusqadaǵy ataýy – «Nursultan Nazarbaev. О́mir­­baıan») arabsha basylǵan kita­by­nyń tusaýkeseri ótkizildi.

Biz Prezıdent Keńsesiniń bas­tyǵy, saıası ǵylymdar doktory Mahmut Qasymbekovtiń Elba­sy­myz Prezıdent Nursultan Na­zar­baev týraly jazylǵan kitap­tarynyń shetelderdegi tusaý­ke­ser­lerine munan buryn da qatys­qanbyz. 2012 jyly Ystambuldan, 2013 jyly Beıjińnen joldanǵan materıaldarda negizinen sol el azamattarynyń Qazaqstan týraly, Elbasymyz týraly, Prezıdent jaıynda jazylǵan kitap týraly pikirleri keltirilgen. Bul joly da solaı etpekpiz. «Syrt kóz – synshy» deıdi halqymyz.

«Nursultan Nazarbaev. О́mir­baıan» atalatyn kitap qolǵa alǵash tıgen kezde sol saparlardyń birindegi oqıǵa eske túsken. Elbasy jaı­ynda jazylǵan kitaptyń túrik tilindegi basylymynyń tusaý­keserinde, sonaý Ystambulda aıtyl­ǵan áńgime edi ol. Túrik baýyr­larymyzdyń biri Qazaqstan Prezıdenti týraly eńbektiń – Mahmut Qasymbekov kitabynyń sonshalyqty tolymdylyǵyna súısinis bildire kelip, ótken ǵasyrdyń sekseninshi jyldarynda óz eliniń ekonomıkalyq reformalaryn jańa jaǵdaıda, jańa sıpatta tabysty bastap bergen asa kórnekti tulǵa – Tur­ǵyt Ozal qyzmetiniń kezinde du­rys­tap hatqa túspeı qalǵanyn, sodan da kóptegen qundy qyrlary áli kúnge ashylmaı jatqanyn óki­nishpen aıtqan. Sol azamat: «Munyń bir sebebi bizde ol kezde Mahmut Qasymbekov sııaq­ty adamnyń bolmaǵandyǵy» degen edi. Qazaqstan Respýb­lıkasy syndy jas memlekettiń qa­zir­she qysqa ǵana táýelsizdik sheji­resiniń ózinde el kóshbas­shy­synyń qadir-qasıetin bilý, Elbasynyń ár qadamy, ár sózi jańa tarıhtyń paraqtary eke­nin parasattylyqpen paıymdaý anyq baıqalatynyna razylyq­tan shyqqan sóz sol kezdesýde qatysqan bizdi de bir marqaı­typ tastaǵan. Sondaı maqta­nysh sezimin Beıjińde de bastan keshkenbiz. Birikken Arab Ámir­lik­terinde de dál solaı boldy.

Sóz basynda bul kitaptyń arab tilinde jaryq kórýine osy­dan biraz buryn Birikken Arab Ámirlikterinde Qazaqstan elshi­si bolǵan, búginde Qazaqstan Res­pýb­lıkasy Syrtqy ister mınıs­trliginiń jaýapty hatshysy qyzmetindegi ardaqty azamatymyz Asqar Mýsınovtiń etken eńbegin erekshe aıtyp alǵymyz keledi. Asqar Ahmetuly elshi kezinde kitapty arabshaǵa aýdartý jumysyn bastap, uıymdastyrý sharýalarynyń birqataryn sheship ketken eken, qalǵan istiń bárin qazirgi elshimiz Qaırat Lama Shárip jaqsylap jerine jetkizipti.

Joǵaryda aıtqanymyzdaı, biz bul joly da shetelde Elbasymyz týraly jaryq kórgen kitap jaı­yn­­daǵy pikirlerdi negizinen sol el­diń azamattary bergen baǵalarǵa súıe­nip jetkizbekpiz. О́z tarapymyzdan qosyp aıtarymyz mynaý ǵana.

Memleket basshysynyń resmı ómirbaıanyn túzý dástúri búkil álem­ge tán. О́rkenıetti mem­leket­terdiń bárinde de prezı­dentter men korolderdiń, monarhtardyń, el jetekshileriniń ómir joly qandaı da bir eleýli oqıǵa nazardan qaǵys qalmaı­tyndaı tııanaqtylyqpen zert­te­ledi, árqıly adamdardyń ártúr­li paıymdaýlarynan ele­nip-ekshelip, kúmán keltiril­meıtin, daý týǵyzbaıtyn aqı­qattar arshylyp alynady da, bú­gingi jáne keler urpaq udaıy us­ta­natyndaı buljymas ǵumyr­baıan jazylyp shyǵady. Ádette avtorlyq ujymnyń atsalysýy­men, memlekettik jáne jeke arhıv­terdiń baı qazynasyn paıda­lanýmen dúnıege keletin mundaı kitaptarǵa baıandalatyn oqıǵalarǵa emosııalyq baǵa berý, bárin jiktep-jiliktep, barynsha baıyptap tastaý tán bolmaıdy. El basshysynyń júrip ótken joly men atqarǵan qyzmetin resmı zert­teýdiń jalpyǵa ortaq bul talaby Mahmut Qasymbekovtiń «Nursultan Nazarbaev. О́mir­baıan» kitabynda jaqsy saqtalǵan.

Ábý Dabı halyqaralyq kitap jármeńkesiniń aıasynda ótkizilgen tusaýkeser rásiminde Qazaqstan Respýblıkasy Syrtqy ister mınıstrliginiń jaýapty hatshysy Asqar Mýsınov, Qazaqstan Respýblıkasynyń Birikken Arab Ámirlikterindegi elshisi Qaırat Lama Shárip, osy joldardyń avtory sóz sóıledi.

Qazaqstan Prezıdenti Nur­sultan Nazarbaev týraly arab ti­lindegi kitaptyń tusaýkeser rásimine qatysý men úshin úlken mártebe bolyp tabylady, dep bas­tady tusaýkeserdegi sózin «ál-Fajr» gazetiniń bas redaktory Sherıf ál-Basel. Mahmut Qa­symbekovtiń Qazaqstan bas­shy­synyń ómirbaıany týraly bul kitaby damý men órkendeýge umtylǵan jastar úshin mańyzdy eńbek dep sanaımyn. Eńbekten Qazaqstan damýynyń bas­ty kezeńderi týraly jan-jaq­ty ári senimdi derekterdi kez­destirýge bolady. Nursultan Na­zar­baevtyń ómirbaıanyn oqyǵan adam Prezıdenttiń kúres pen tabysqa toly ómir jolymen tanysa alady, ıaǵnı eshbir qoldaýsyz, óz kúshi men qabiletine ǵana súıene otyryp, eń bıik shyńǵa kóterilgen tulǵany tanıdy. Kitapta Nursultan Nazarbaevtyń kóptegen bastamalary týraly tolyq málimet keltirilgen, onyń ishinde Qazaqstan halqy Assambleıasyn qurý týraly sheshimin erekshe atap ótý kerek. Atalǵan bastamanyń álemdik deńgeıde mańyzy úlken ekenin atap ótken jón. Sonymen qatar, kitapta Nursultan Nazarbaevtyń eldiń jastaryna arnap «Bolashaq» baǵdarlamasyn júzege asyrǵany jóninde málimetter bar. Osy baǵdarlama aıasynda kóptegen jastar sheteldegi eń bedeldi joǵary oqý oryndarynda bilim alyp, eldiń damýyna eleýli úles qosqanyn da kitaptan bile alamyz. Nursultan Nazarbaev óziniń kóregen saıasatynyń arqasynda Qazaqstandy álemdegi mańyzdy da bedeldi elderdiń qataryna qosa bildi. О́z basym Qazaqstanda birneshe márte boldym, barlyq jetistikterdi kórip-bildim. Qysqa ýaqyt ishinde uly isterdi tyndyrǵan tulǵanyń óz otany men halqy úshin jasaǵan eńbegi óz baǵasyn alady dep senemin, dep túıindedi óz pikirin Sherıf ál-Basel.

Mahmut Qasymbekovtiń bul kitaby arab tilinde bir elde jaryq kórgenimen, onyń bú­kil arab álemine ortaq basylym ekenin basyn asha aıtýdy jón kóremiz. Sondyqtan da, Ábý Dabıdegi tusaýkeserge Saýd Ara­bııasy Koroldiginiń Islam jáne vakýftar isteri mınıstrleri konferensııasynyń Bas hatshysy, Qazaqstan týraly, Elbasymyz Nursultan Nazarbaev týraly júıeli jazyp júrgen bedeldi qalamgerlerdiń biri Majıd át-Týrkıdiń qatysýy óte oryndy shyqty. Kezinde onyń Nursultan Nazarbaev týraly arab tilinde «Qazaqstandaǵy bılik nury» atty kitaby jaryq kórgen.

Majıd át-Týrkı tusaý­ke­serdegi sózinde óziniń kitabynda Nursultan Nazarbaevtyń kóptegen izgi bastamalary týraly baıandap, arab álemindegi oqyrmandardy Qazaqstannyń saıası jáne áleýmettik-ekonomıkalyq jetistikterimen tanystyrǵanyn aldymen aıtyp ótti. Osy rette, Qazaqstan Prezıdentiniń As­tanada Álemdik jáne dás­túrli dinder lıderleriniń sezin ótkizý týraly bastamasyn erekshe atap ótkim keledi, atalǵan jıyn halyqaralyq qoǵam­dastyqta beıbitshilik pen kelisimdi nyǵaıtýǵa úlken úles qosyp otyr. Arab tilinde jaryq kórgen «Nursultan Nazarbaev: Qazaqstan Respýblıkasy Tuńǵysh Prezıdentiniń ómirbaıany» atty kitap arqyly oqyrmandar Qazaqstan basshysy jáne jalpy el damýy týraly qundy málimetter tabady dep oılaımyn, dedi ol.

Kelesi tusaýkeser bes kúnnen keıin Dýbaıda, sondaǵy el elıtasy jıi bas qosatyn bedeldi oryn – Mádenıet saraıynda ótkizildi. Onda da Elbasymyz týraly Mahmut Qasymbekov eńbeginiń arab jurtshylyǵynyń kóńilinen shyqqanyna taǵy kóz jetkize tústik. Bul joly da arab aǵaıyndar aqtaryla sóıledi, Nazarbaevtyń musylman dúnıesindegi óte bedeldi el basshysy retindegi abyroıyn asqaqtata aıtty. Qazaqstan Respýblıkasy Syrtqy ister mınıstrliginiń jaýapty hatshysy Asqar Mýsınovtiń, Birikken Arab Ámirlikterindegi elshimiz Qaırat Lama Sháriptiń oıly sózderin dál sol kúnderi sátimen Dýbaıǵa bara qalyp, tusaýkeserdiń habaryn sondaǵy qazaqtardan (aıtqandaı, Dýbaıda qazaq degenińiz qaptap júr, sol qaladan úı-jaı satyp alyp, talaı jyldan beri turyp jatqandary da jetkilikti) estip jetken tanymal tulǵa, Elbasynyń sonaý bala jigit shaǵynan bergi dosy Maqsut Nárikbaevtiń estelik áńgimesi ádemi árleı tústi. Maqsut Sultanulynyń óz sózin Prezıdenttiń el basshysy retindegi qymbat qyrlarynan góri dostyqqa adal, joldastyqqa berik azamat retindegi adamdyq qasıetterine kóbirek beıimdep qurǵany, jarty ǵasyrdan astam ýaqyt boıy sol bala jigit kezindegi dostarymen syılastyǵyn saqtap kele jatqanyn dámdi mysaldarmen aıtqany áserli shyqty.

Tusaýkeserde sóz sóılegen Dý­baı mádenıet jáne óner qaýym­dastyǵynyń atqarýshy dırek­tory Saıd Muhammed al-Nabý­da kitaptan alǵan áseri Qazaq­stan jaıyndaǵy tanym-túsini­gin tolyqtyra túskenin, Elbasy­myzdyń el eńsesin bıiktetý jolyn­daǵy jemisti jumysynyń ba­ǵa­syn tolyqtyratynyn rıza­shy­l­yqpen jetkizdi.

Mahmut dosymyzdyń saıasatker retindegi, ǵalym retindegi, qalamger retindegi talassyz tabysy bolyp tabylatyn bul eńbek jónindegi oılarymyzdy biz de ortaǵa saldyq.

Orysshadan arabshaǵa aýdarýshy jáne Qazaqstan jónindegi beldi maman retinde tanymal Imad Mahmýd Tahıneh  keńinen kósile sóıledi. Bul sózdi qazaq oqyrmandaryna barynsha tolyǵyraq jetkizgen jón dep oılaımyz.

«Qazaqstan Respýblıkasynyń Tuńǵysh Prezıdenti Nursultan Nazarbaev týraly oı-pikirlerimdi bildirýge múmkindik berilgenine óte qýanyshtymyn», dep bastady ol óz sózin. Tusaýkeserdiń tanystyrý materıaldarynda uly lıderdiń ómir joly týraly jan-jaqty aqparat berilgen. «Nursultan Nazarbaev. Qazaqstan Respýblıkasynyń Tuńǵysh Prezıdentiniń ómirbaıany» dep atalǵan irgeli eńbekte Nursultan Nazarbaev ómiriniń sanqyrly sátteri egjeı-tegjeıli ári áserli baıandalǵan.

Sóz joq, Nazarbaev búgingi zamannyń kórnekti álemdik lı­derleriniń biri bolyp tabylady. Ol óziniń ómiri men kúsh-jigerin Otanynyń jahan kartasynda laıyqty oryn alýyna jumsady...

Osy zamannyń tarıhynda az ǵana ýaqyttyń ishinde óz eliniń jaǵdaıyn nasharlatyp, tipti túbine jetken basshylardyń attary az emes, sonymen birge tarıh betterin óz elin jasampazdyqtyń, progress pen órkendeýdiń keń aıdynyna alyp shyǵa alǵan lıderlerdiń esimderi jaınatyp turatyn sátter de az emes.

Meniń sana-sezimimde Qazaq­stan­nyń tuńǵysh Prezıdenti Nur­sultan Nazarbaevtyń bet-beınesi sonshalyqty aıshyqtalyp qalǵan, óıtkeni sońǵy bes jyldyń ishinde Qazaqstan Respýblıkasynyń arab elderindegi elshilikteri men konsýldyqtary úshin orysshadan arabshaǵa aýdarma jasaýmen kelemin. Osy kezeńde Qazaqstan týraly paıym-biligim barynsha tereńdeı tústi. Men Qazaqstannyń tarıhı turǵydan óte qysqa merzim ishinde álemdik arenadaǵy bas­ty ári belsendi oıynshylardyń birine aınalǵanyn aıqyn ańǵara aldym.

Aýdarmashylyq qyzmetimde men Prezıdent Nazarbaev pen bir­qatar arab elderi lıder­leriniń arasyndaǵy joldaý­hat al­ma­­sýlardy, sondaı-aq Qazaq­stan basshysynyń halyqqa birne­she jylma-jylǵy Joldaý­laryn tárjimeledim. Sol aýdar­malarym­nyń arasynda «Balalyq shaǵym­nyń aspany» fılminiń máti­nin arabshalaýymnyń orny bólek­she, óıtkeni osy arqyly men uly lıderdiń jeke basynyń qasıet­terimen jete tanysa aldym.

Men myna álemde eldiń aty onyń lıderiniń atymen astasyp ketken jalǵyz ǵana mysal bar ekenine kóz jetkizdim. Qazaqstan – Nazarbaev. Lıderdiń sózi Otany úshin strategııaǵa aınalýy óte qısyndy.

Nursultan Nazarbaev tul­ǵa­synyń munshalyqty kóńil bólýge laıyqty ekendigi nelikten?

Tarıhqa kóz júgirtip kó­reı­ikshi...

Keńes Odaǵy ydyrasymen onyń qolshatyrynyń astynda HH ǵasyr boıynda ómir súrip, ıdeologııasymen tynystap kelgen elder burynǵy odaqtyń aýyr saıası, ıdeologııalyq, áleýmettik jáne ekonomıkalyq saldarlarynyń salmaǵynan qutylýdyń joldaryn izdedi, sondaı-aq óz birdeıliginiń ulttyq jáne ıdeologııalyq erekshelikterin aıqyndaýǵa umtyldy. Ol elderdiń keıbireýleri áli kúnge deıin óz jolyn izdeýdegi túsinbestikter men adasýshylyqtardan zardap shegýde, etnostyq jáne óńirlik janjaldardyń ýly tyrnaqtary olardyń tánine jazylmas jara salýda. Basqa bir elder keńestik kezeńdegiden ozyp turǵany shamaly táýeldilikti tańdady. Tek Qazaqstan Respýblıkasy ǵa­na óz tańdaýynda biregeı bola bildi – bolashaqqa joldy qalyp­tas­tyrýda táýelsizdikten taımady.

Shamalǵan jaqtaǵy Úshqońyr jaılaýynda, jer men aspan tap-taza bulttar arqyly astasyp jatatyn taý shyńynda dúnıege kelgen uly tulǵanyń alysty kózdeıtin qasıeti bolmaǵanda Qazaqstannyń tarıhı tańdaýy júzege aspaıtyn arman kúıinde qala berer edi... Myna jaıdy aıta keteıin: ol týǵan shildeniń jazǵy kúninde taýǵa qar túsip, betkeıde jańbyr jaýǵan eken. Qazaqtar mundaı qubylysty «nur jaýdy» dep ataıdy (Imad Mahmýd Tahıneh «nur jaýdy» degen sózdi osylaısha, qazaqsha aıtty – S.A.).

Nursultan Nazarbaev týǵan asý asqar onyń sana-seziminde bıiktikke... jaqsylyqqa qaraı samǵaı ushýmen astasyp jatqan edi. Qazaqstannyń tuńǵysh Prezıdenti bolǵan soń onyń qııaǵa qalyqtaý armany naqtylyqqa aınaldy, ol arman búginde Qazaqstan maqtan etetin tańqalarlyq jetistikter men tabystarǵa ulasty...

Nazarbaevtyń danalyǵy keı­bir jaǵdaılarda adam qııalynyń aýma­ǵynan asyp ketetin batyl­dyqpen úılesimdi qabysyp jatady... Onyń batyldyǵy qazirgi tańda Qazaqstannyń dańqy men ilgerileýiniń arqaýyn jasap jatqan tarıhı bastamalar men sheshimderden kórinedi.

Onyń 1991 jyldyń 29 tamyzynda qol qoıǵan Semeı ıadrolyq synaq polıgonyn jabý jáne álemdegi eń negizgi ıadrolyq arsenaldardyń birinen óz erkimen bas tartý týraly № 409-shy batyl Jarlyǵy ıadrolyq qarýdy taratýǵa qarsy búkil álemdik qozǵalysty qoldaý isine úlken yqpal jasady. Qazaqstannyń osy kesimdi qadamy Birikken Ulttar Uıymy Bas Assambleıasynyń 2009 jylǵy 2 jeltoqsanda №64/35 qarar qabyldap, 29 tamyzdy Iаdrolyq synaqtarǵa qarsy halyqaralyq is-qımyl kúni dep jarııalaýyna negiz boldy. Sóıtip, Qazaqstan ıadrolyq qarýdy taratýǵa qarsy álemdik qozǵalystyń lıderine aınaldy.

Nazarbaevtyń kelesi batyl qadamy – 1992 jyly Azııadaǵy ózara yntymaqtastyq jáne senim sharalary jónindegi keńes shaqyrý jónindegi usynysy. AО́SShK-niń birinshi sammıti 2002 jyly Qazaqstanda ótkizildi. AО́SShK búgingi tańda halqynyń jalpy sany úsh mıllıard adamnan asyp ketetin Azııa elderiniń basym kópshiliginiń yntymaqtastyqqa, beıbitshilik pen qaýipsizdikke umtylǵan kúsh-jigerin biriktirip otyr.

2003 jyly Qazaqstan Res­pýb­lıkasynyń Prezıdenti Nur­sultan Nazarbaevtyń basta­ma­shyl­dyǵymen alǵash ret shaqyrylǵan Álemdik jáne dástúrli dinder lıderleriniń sezi – álemdik din­der ókilderiniń ózinshe bir júıeli bas qosyp turatyn ún­­qa­tysý alańy.

Prezıdent Nursultan Nazar­baevtyń taǵy bir batyl ıdeıasy – Qazaqstannyń jańa, osy zamanǵy astanasyn ornatýy. Astanany Almatydan Aqmolaǵa aýystyrý jónindegi sheshimdi Qazaqstan Respýblıkasynyń Joǵarǵy Keńesi 1994 jylǵy 6 shildede qabyldaǵan. 1998 jylǵy 6 mamyrda Prezıdent Jarlyǵymen Aqmola qalasy Astana bolyp ataldy. Jańa astananyń halyqaralyq tusaýkeseri 1998 jylǵy 10 maý­symda ótkizildi. Astana búgingi tańda álemdegi eń osy zamanǵy jáne eń jedel damýshy astanalardyń biri, qala óziniń josparlanýymen, ǵımarattarymen, eskertkishterimen maqtana alady, olardyń kóbiniń bastamashysy el lıderi bolyp tabylady.

Nursultan Nazarbaev el bas­shysy retinde óziniń berik senim­derine arqa súıeıdi. Ol jaýap­kershilikten kúsh-qýatty, san túrlilikten birlikti, kelisimnen erkindikti, ıgilikten qasıetti, ashyq­tyqtan qaýipsizdikti, áriptestikten táýel­sizdikti, bú­gin­gi kúnnen bolashaqty kóre biledi.

Prezıdent Nursultan Nazar­baevtyń ámbebap saıası-ekono­mıkalyq kózqarasynyń arqasynda Qazaqstan Respýblıkasy álemniń talaı elderi zardap shegip jatqan kóptegen qıyndyqtarǵa urynbaı ótti. Qazaqstan óz qoǵamymen birge progress jolymen senimdi ári turaqty túrde alǵa basyp keledi. Bul qoǵamda ártúrli etnostyq toptardyń arasynda tynyshtyq pen kelisim jarasym quryp tur, bul qoǵamda eń aýyr álemdik daǵdarystarǵa qarsy tura alatyn ártaraptandyrylǵan ekonomıka bar, bul qoǵamda Dúnıeniń tórt buryshyna birdeı ashyq kóp vektorly dıplomatııa bar.

Imad Mahmýd Tahıneh osylaı dedi. Bul sózderdi ol bastan-aıaq qolyndaǵy qaǵazdan oqyp berdi. Jalpy, arab aǵaıyndar sóz­ge óte sheshen keledi, qaı-qaı­sysy da qolyna mıkrofon tıisi­men  maqamdy únimen aǵytyla jó­neledi. Osy oılaryn ol qaǵazǵa qara­maı-aq jatyq tilmen josyl­typ shyǵara alaryna biz de kúmán­danbaımyz. Imad Mahmýd Tahı­nehtiń Nursultan Nazarbaev týraly kitap jóninde sóıleıtin sózin aldyn ala qaǵazǵa jazyp ke­lýi onyń bizdiń Elbasymyzǵa bó­lek­she qurmetiniń kelisti kóri­nisi, mańyzdy taqyrypqa arnal­ǵan kitapqa pikir bildirýdiń jaýap­ker­shiligin sergek sezinýi dep bildik.

Bizdiń Birikken Arab Ámir­lik­terine bul jolǵy issaparymyz tek osy eki tusaýkesermen shek­telip qalǵan joq. Eldegi eń kóp taralymdy basylym «ál-It­tıhad» gazetiniń bas redaktory Muhammed ál-Hamadımen kezdesip, suhbattastyq, Ábý Dabıde Birikken Arab Ámirlikteriniń Ulttyq Me­dıa Keńesiniń Bas dırektory (qyzmet reti bizdegi Baılanys já­ne aqparat agenttiginiń tóraǵa­sy deńgeıinde) Ibrahım ál-Abed­tiń, Dýbaıda «TESOM Media Cluster» medıa kompanııasynyń bas dırektory Muhammed Abdallanyń qabyl­daýynda boldyq. Olarda da Pre­zıdent týraly Mahmut Qasym­bekov kitabynyń qadir-qasıeti aýyq-aýyq aıtylyp otyrdy.

Tusaýkeserlerden,  kezdesýlerden túıgen eń basty oıymyz – Elbasytanýdyń eltanymnyń enshi bólinbes bóligi retinde ornyǵa bastaǵandyǵy, bul jumystyń endi halyqaralyq aýqymǵa aýysqandyǵy. Er joly – el joly. Álem Nursultan Nazarbaevtyń ómirine barynsha qanyqqan saıyn, onyń taǵdyryna qatysty naqty málimetterdi kóbirek bilgen saıyn Qazaqstannyń keshegisin, búgingisin, bolashaǵyn burynǵydan baıyptyraq baǵamdaı túsedi, bizdiń elimizdiń bolmys-bitimin bilip, jıyrma jyldan jańa asqan táýelsizdik tarıhynyń qadir-qasıetine qanyǵa túsedi, munyń ózi elimizdiń halyqaralyq arenadaǵy abyroıyn asqaqtatady. Arab aǵaıyndarsha aıtsaq, ınshalla!

Saýytbek ABDRAHMANOV.

Astana–Ábý Dabı– Dýbaı–Astana.