Qoǵam • 28 Qyrkúıek, 2022

Memlekettik tildi meńgerý deńgeıin anyqtaý boıynsha komıssııa quryldy - OSK

Qazaqstan Respýblıkasy Ortalyq saılaý komıssııasy 20 qarashada ótetin kezekten tys Prezıdent saılaýyna kandıdattardyń memlekettik tildi erkin meńgerýin anyqtaý jónindegi komıssııa qurý týraly qaýly qabyldady, dep habarlaıdy Egemen.kz.

Aıana TOǴANBEK

«Qazaqstan Respýblıkasy Prezıdenttigine kandıdattyń memlekettik tildi jetik bilýi Qazaqstan Respýblıkasy Konstıtýsııasynyń 41-babyna sáıkes lıngvıstıkalyq komıssııanyń sheshimimen aıqyndalady. Osy másele boıynsha OSK-nyń quzyreti «Qazaqstan Respýblıkasyndaǵy saılaý týraly» Konstıtýsııalyq zańnyń 54-babynyń 2-tarmaǵynda kórsetilgen. Atap aıtqanda, osy bapqa sáıkes, Konstıtýtsııanyń 41-babynyń 2-tarmaǵyn resmı túsindirý týraly Konstıtýsııalyq keńestiń sheshimi boıynsha memlekettik tildi bilýdegi kandıdattyń biliktiligin anyqtaý Ortalyq saılaý komıssııasynyń sheshimimen aıqyndalady. QR Konstıtýsııasynyń 41-baby 2-tarmaǵyn resmı túsindirý týraly Konstıtýsııalyq keńestiń 1998 jylǵy 9 qazandaǵy №280 qaýlysyna sáıkes, QR Konstıtýsııasynyń 41-baby 2-tarmaǵy normasynyń memlekettik tildi erkin meńgergen degen bóliginde «qazaq tilinde saýatty túrde oqıdy, jazady, óz oıyn qınalmaı ońaı jetkizedi jáne kópshilik aldynda sóıleı alady», dep túsindirdi Qazaqstan Respýblıkasy Ortalyq saılaý komıssııasynyń hatshysy Muhtar Erman OSK otyrysynda.

Baıandamashy sondaı-aq Qazaqstan Respýblıkasy Prezıdenttigine kandıdattyń memlekettik tildi erkin meńgerýin anyqtaý OSK qaýlysyna sáıkes quramynda keminde 5 adamnan turatyn mamandar bar lıngvıstıkalyq komıssııanyń qorytyndysymen aıqyndalatynyn atap ótti.

«Qazaqstan Respýblıkasy Prezıdenttigine kandıdattyń memlekettik tildi erkin meńgerýin belgileý tártibi týraly OSK-nyń 2005 jylǵy 31 tamyzdaǵy No 12/26 arnaıy qaýlysy bar. Memlekettik tildi erkin meńgergendigin anyqtaý úshin Qazaqstan Respýblıkasynyń Prezıdenttigine kandıdat lıngvıstıkalyq komıssııa usynǵan taqyryp boıynsha kólemi 2 betten aspaıtyn jazbasha tapsyrma oryndaıdy. Ekinshi tapsyrma boıynsha, lıngvıstıkalyq komıssııa usynǵan 3 betten aspaıtyn mátindi oqıdy. Úshinshiden lıngvıstıkalyq komıssııa usynǵan taqyryp boıynsha 15 mınýttan kem emes ýaqyt ishinde kópshilik aldynda sóz sóıleıdi», dep qosty Muhtar Erman.