Dychko – jeńimpaz

Qazaqstandyq bylǵary qolǵap sheberi Ivan Dychko álem chempıonatynan keıin rıngke qaıta oralyp, О́zbekstannyń Tashkent qalasynda ótken Sıdneı Djaksondy eske alýǵa arnalǵan halyqaralyq týrnırdiń jeńimpazy atandy. Ol fınalda О́zbekstan koman­dasynyń nómiri birinshi boksshysy, birqatar halyqaralyq týrnırlerdiń jeńimpazy Mırzohıdjon Abdýl­laevpen qolǵap túıistirip, 2:1 esebimen jeńiske jetti. Osy týrnırde Qazaqstan ulttyq quramasy aǵa jattyqtyrýshy Nurlan Safıýllınniń jetekshiligimen bes salmaqta kúsh synasty. Oǵan Dych­kodan basqa Zakır Safıýllın (60 kg), Almasbek Orynǵalıev (69 kg), Saparbaı Aıdarov (75 kg) pen Nur­dáýlet Jarmanov (81 kg) qatys­ty. Jalpy, týrnırge Qazaqstan, О́zbek­stan, Ázer­baıjan, Reseı, Iran, Túrkııa, Qyrǵyzstan, Qytaı men Túrikmenstannan barlyǵy 150-den astam boksshy qatysyp, synǵa tústi. Bokstan Qazaqstan komandasynyń taǵy bir quramy da elge jeńispen oraldy. Jaqynda Alba­nııa­nyń Shkoder qalasynda ótken Vlaznıany eske alýǵa arnalǵan HI halyqaralyq týrnırde bizdiń boks­shylar úsh altyn jáne bir kúmis medaldi jeńip aldy. Onda Birjan Jaqyp (49 kg), Janbolat Tilegenuly (56 kg) men Alekseı Sevostıanov (91 kg) jeńimpaz bolsa, Erlan Támemov kúmis júldeni qanaǵat tutty. Ol fınalda Birjan Jaqyptan ese jiberdi. Osy týrnırde 64 kg deıingi salmaqta Almasbek Shymbergenov qolǵap túıistirdi. Jalpy, jarysqa jeti elden 28 boksshy qatysty. Týrnırge Qazaqstan quramasyn jattyqtyrýshy Aleksandr Strelnıkov bastap bardy. Endi qurama komanda bıylǵy jyldyń basty boks básekesi sanalatyn Jazǵy Azııa oıyndaryna daıyndalý úshin 26 mamyr men 1 maý­sym kúnderi Germanııanyń Galle qalasynda ótetin halyqaralyq týrnırge qatysady. Jýyrda osy eki týrnırden basqa Reseıdiń Habarovsk qalasynda da Keńes Odaǵynyń batyry Konstantın Korotkovty eske alýǵa arnalǵan taǵy bir úlken halyqaralyq jarys ótken bolatyn. Osy synda bizdiń qurama eki altyn, tórt kúmis jáne úsh qola júldeni jeńip aldy. Týrnırde Jánibek Álimhanuly (75 kg) men 91 kg-dan asa salmaqtaǵy Nurjan Bekzatov jeńimpaz atansa, Jomart Erjan (49 kg), Ádilet Qurmetov (52 kg), Aıdar Ámirzaqov (64 kg) pen Dáýren Eleýsinov (81 kg) kúmis medaldi, Erjan Ordabaev (56 kg), Saǵadat Rahmanqulov (69 kg), Anton Pınchýk (91 kg) qola júldeni qanaǵat tutty. Osy jarysta Qazaqstan quramasy jalpy­komandalyq esepte ekinshi oryndy ıelendi. Birinshi oryndy Reseı, úshinshi oryndy Ázerbaıjan aldy. Týrnırge 17 elden 71 boksshy qatysty. Dastan KENJALIN, «Egemen Qazaqstan».