Toptan shyǵý qıyn bolǵaly tur

Bıylǵy álem chempıonatynda Darko Dobreskov jetekshilik etetin Qazaqstan quramasy «S» tobynda AQSh (Tokıo Olım­pıadasynyń jeńimpazy), Ser­bııa (2018 jylǵy álem chempıo­ny), Germanııa (Eýropa chem­pıonatynyń eki dúrkin kúmis júldegeri), Bolgarııa (Eýropa chempıony) jáne Kanada (Pa­namerıka oıyndarynyń qola júldegeri) sekildi azýly qu­ramalarmen bir topqa túsken edi. Bizdiń toptaǵy AQSh pen Serbııa quramasy mamandar tarapynan tek «S» tobynyń ǵana emes, osy jylǵy álem birinshiliginiń negizi favorıt­teri ekeni aıtylyp jatyr.

Voleıboldan álem chempıo­natynyń tarıhyna kóz jú­girter bolsaq, Qazaqstan qyz­dar qu­ramasy baıraqty bá­sekege 2006 jyldan beri tu­raq­ty túrde qatysyp keledi. Ázir­ge eń úzdik kórsetkishi – 15-oryn (2014 jyl). Bıylǵy chem­pıonatta el namysyn myna oıynshylar qorǵap jatyr: Mádına Beket, Tomırıs Sa­ǵym­baeva, Krıstına Be­lova, Sábıra Bekisheva, Dınara Qo­jan­berdına, Naılıa Nıg­ma­tý­lına, Elızaveta Meıs­ter, Mar­garıta Belchenko, Eka­terı­na Mıhaılova, Tatıana Nı­kı­tına, Iаna Petrenko, Na­talıa Smır­­nova, Valerııa Chý­mak jáne Anas­­­tasııa Kolomoes.

Álem chempıonatynyń ere­jesi boıynsha 24 qurama birinshi aınalymda alty-alty quramadan tórt topqa bólinip, bir retten bir-birimen oınap shyǵady. Bul kezeńdegi oıyn­dardyń bári Arnhem qala­syndaǵy «Gel­­redom» stadıonynda ótip jatyr.

Alǵashqy aınalym aıaqtalǵan soń, ár toptaǵy úzdik 4 qurama 2-aınalymǵa joldama alady. A jáne D tobyndaǵy tórt komanda E tobyna túsip, Nıderlandta oınaıdy. Al V men S kvartetiniń úzdikteri F sebetine túsip, Pol­shada sheberlik baıqasady. Mun­da 1-aınalymda oınaǵan qu­ra­malardyń joly qaıta túıis­­­peıdi. Ol úshin alǵashqy ke­zeńnen soń reıtıng túziledi. Nátı­jesinde, 2-aınalymda ár toptan 4 ujym sheshýshi syn­ǵa joldama alady. Munda olar shı­rek fınaldan bas­tap olım­pıadalyq júıemen kim myqtyny anyqtaıdy.

Bıylǵy chempıonattyń birin­shi aınalymynda Qazaqstan qu­ramasy eń alǵash azýly AQSh voleıbolshylarymen sheberlik baıqasyp, 3:0 esebimen jeńilip qaldy. Qazaqstandyq qyzdar alǵashqy kezeńde qarsylastaryna 16:25 esebimen jol berse, keıingi eki sette 13:25 jáne 22:25 esebi­men utylyp qaldy. Ekinshi týrda Germanııamen kezdesken jer­lesterimiz bul joly da dál sondaı eseppen qarsylastaryna ese jiberdi – 15:25, 18:25, 21:25.

О́zge toptaǵy nátıjelerge toq­talar bolsaq, úsh týrdan keıin «A» tobynda Italııa, «V» tobynda Domınıkan Respýblıkasy jáne «D» tobynda Brazılııa men Qytaı quramalary 9 upaımen kósh bastap keledi.

Keshe Kanada quramasymen kezdesken otandastarymyz búgin Serbııamen, erteń sońǵy týrda Bolgarııa voleıbolshylarymen oınaıdy.