Ámbebap oqý ortalyǵy

Aqtóbe oblysynda bir jaǵy­nan orta mektep baǵdar­la­masyn oqytyp, ekinshi jaǵynan UBT-ǵa daıar­laıtyn repetıtorlyq orta­­lyq­tyń qajettigi seziletin. Aýdan mektepteri úshin osy máse­le tip­ti ózekti kúıinde qalyp otyr.

Byltyr Aqtóbede ashylǵan 125 High school mektebi qala mektepteriniń 10-11 synyptarynan 185 oqýshyny sheteldik jáne qazaqstandyq joǵarǵy oqý oryndaryna daıarlaı bastady. Osy mekteptiń dırektory Erbol Telemısovtyń aıtýynsha, 185 oqýshynyń 92-si memlekettik grant­qa qol jetkizse, 6 oqýshy elimizdiń iri JOO-nyń arnaıy grantyna ıe boldy. Sondaı-aq 27 túlek Túrkııa, Reseı, Italııa, Polsha, Ispanııa, Be­larýs, AQSh joǵarǵy oqý oryn­daryna bakalavrıatqa oqý­ǵa túsken. Aıta ketý kerek, byltyrǵy Aqtóbe oblysy bo­ıynsha UBT-dan eń joǵarǵy upaı jınaǵan Baǵdat Narqyz – osy mekteptiń túlegi. Narqyz búginde M.Ospanov atyn­da­ǵy Aqtóbe memlekettik medısına ýnıversıtetinde stomatologııa bóliminde 1 kýrsta oqıdy.

«Osy oqý jylynda 10-11 synyptarda 335 oqýshy oqıdy, olarǵa 20 pán muǵalimi sabaq beredi, 12 mentor jumys is­teıdi. Qazaq mektebi bolsaq ta, sheteldik JOO-na daıyndaıtyn SAT synybyn ashtyq. Bul synyp N.Nazarbaev ýnıversıtetine jáne she­teldik ýnıversıtetterge oqýǵa túskisi keletin oqýshylar úshin ashylǵan. Mektebimizge 9 synypty bitirgen oqýshylar qabyldanady. Oqý aqysy onsha qymbat emes, ortasha kýrstyń baǵasy sııaqty. Jalpy bilim beretin mektepterden kóp aıyr­ma­­shylyǵy da joq. Bizde UBT-nyń negizgi bes páni, fızıka-matematıka, hımııa-bıologııa, dú­nıe­júzi tarıhy, aǵylshyn ba­­ǵytynda tereńdetilip oqy­ty­lady. Mentorlar balany tańerteńgilik kútip alyp, kún uza­ǵyna sabaqqa qatysýyn qada­ǵa­laıdy, oqýshynyń úı jumy­syn tekseredi, ata-anamen baılanys jasap, ártúrli is-sharalar ótkizedi. Bizde balanyń basqa sabaqtarmen basy qatpaıdy. Túske deıin negizgi sabaqtardy oqysa, tústen keıin qosymsha sabaqtar bastalady, úı tapsyr­ma­syna daıyndalady. Ár apta­nyń sońynda pánder boıynsha aptalyq test alynady, aı saıyn oqýshy UBT-nyń 140 sura­ǵy­nan baıqaý synaǵyn tapsyrady», deıdi 125 High school mek­tebiniń dırektory Erbol Telemısov.

Bilim ınvestısııaǵa aınalyp kele jatqan qazirgi jaǵdaıda balanyń bastaýyshtan bastap bilimi durys qalanbasa, joǵary synypqa aýysqanda aldynan kedergi bolyp shyǵady.

Elimizdiń joǵarǵy oqý oryndaryna grantqa túsýge kepildik beretin 125 High school mektep jelisi tuńǵysh ret 2019 jyly Taraz qalasynda ashyldy. Osy mekteptiń negizin qalaǵan Álibek Esenov tıimdi bilim ádistemesin jetildirdi. Basqa qalalarda da osy mektep jelileri kóptep ashyla bastady. Balanyń bi­lim­di bolýy ustazdan desek te, oqý­shy­lardyń sabaq úlgerimin bir deńgeıde ustap turý ońaı emes. Balanyń sabaqqa degen yntasyn oıata bilý de óte mańyzdy. Osy jaǵynan 125 High school mektebiniń ereksheligi nede degen suraǵymyzǵa dırektor bylaı dep jaýap berdi: «Mektebimizdiń birneshe artyqshylyǵy bar. Birinshiden, pán muǵalimderi tek sabaq oqy­ta­dy jáne qosymsha sabaq­ta­ryn ótkizedi. Ekinshiden, bizde eki mektep psıhologi men arnaıy kásibı baǵdar berýshi maman bar. Psıholog óz baǵytynda ju­mys atqarady. Kásibı baǵdar berýshi ár oqýshynyń qandaı mamandyqqa oqýǵa túsýge bola­ty­­nyn, Qazaqstanda qandaı ma­­­man­dyqqa suranys bar eken­digin kórsetip, balamen keshendi túrde jumys júrgizedi. Olar ba­lanyń qabiletin, qaı salaǵa beıimdiligin anyqtap, baǵdar beredi. Úshinshiden, bizde mentor qyzmeti bar. Mentorlar oqý­shynyń úı tapsyrmasyn qa­da­ǵalap, ata-anasymen baılanys ornatady».

Osy mektepte taqyrypty meńgerý úshin sabaqtardyń ár túrli ortada ótkizý tájirıbesi engizilgen. Máselen, birneshe kúnnen beri bıologııa, tarıh, matematıka, aǵylshyn tili pánderi ortalyq saıabaqta jáne mektep aýlasynda ártúrli format­ta ótip jatyr. Tabıǵat aıasynda ótken sabaqty bala tez uǵynady. Ár balanyń qabyldaýy ár túr­li, minez ereksheligi taǵy bar. Sondyqtan sabaq kezindegi ser­gitý sharalary oqýshynyń taqy­ryp­ty jaqsy meńgerýi úshin qajet. Jetkinshektiń ózine degen se­nimdiligi joǵary bolsa, ómir jolynda kezdesetin qıyn­shy­lyqtardy jeńe biledi. Túpki nátıje – ózindik pikiri bar, oıyn ashyq aıta alatyn, tulǵalyq ja­ǵy­nan qalyptasqan jaqsy aza­­mat tárbıeleý. Elimizdegi orta bilim salasynda óz ornyn aı­qyndap úlgergen 125 High school mektebiniń basty baǵyty da osy.

Aqtóbe oblysy