Dossor, Maqat – dańqty munaıshylar mekeni «Embimunaıgaz» AQ ǵasyrlyq qyzmetiniń qorytyndysyn shyǵardy

«Embimunaıgaz» AQ jetekshileri qazaqstandyq halyqaralyq «Munaı jáne Gaz» kórmesiniń aıasynda BAQ ókilderimen kezdesip, jýrnalısterdiń saýaldaryna jaýap berdi. Áriptesterimiz kompanııanyń áleýmettik jaýapkershiliginen bastap, pandemııadan keıingi munaı óndirisi, ınnovasııalyq tehnologııalar, aınaladaǵy geosaıası ahýal tóńireginde saýaldar qoıdy. Qazirgi tańda «QazMunaıGaz» UK AQ kompanııalar tobyna kiretin «Embimunaıgaz» AQ quramynda «Jaıyqmunaıgaz», «Jylyoımunaıgaz», «Qaınarmunaıgaz», «Dossormunaıgaz» kompanııalarmen birge «О́ndiristik-tehnıkalyq qamtý jáne jabdyqtarmen komplektasııalaý» men «Embimunaıenergo» basqarmalary da bar. Kompanııa basshysy Esen Qaıyrjan áýeli óndiristik tehnologııalar qaryshtap damyp jatqan qazirgi kezeńde munaı óndirisin de ozyq tehnologııalarmen qamtamasyz etý ózekti ekendigin aıtty. О́ıtkeni Embi munaıy óndiristik turǵyda kúrdeli ken ornyna jatady. Degenmen kompanııa ýaqytpen úndese jumys istep otyr deýge bolady. Máselen, «Qaınarmunaıgaz» munaı-gaz óndirý basqarmasynyń ÝAZ ken ornynda engizilgen «Intellektýaldy ken alańy» qanatqaqty jobasy ózin ózi aqtap, qazir kompanııanyń ózge munaı-gaz óndirý basqarmalaryna da engizilip jatyr. Al «Saparlardy basqarý» jobasy bıylǵy qyrkúıek aıynda Astanada ótken «QazMunaıGaz» UK» AQ bas dırektorlarynyń VII forýmynda kólik qaýipsizdigi salasyndaǵy úzdik joba retinde tanylǵanyn atap ótken jón. Qazirgi tańda kompanııa teńgeriminde 46 ken orny bar bolsa, onyń ıgeriletini – 32, barlanatyny – 4, al 10 ken orny konservasııada tur. О́tken jyly EMG 2,5 mln tonna munaı óndirilgen. Al bıylǵy jeti aıda – 1,5 mln tonna «qara altyn» alynǵan. Sóıtip júz jyl ishinde 188 mln tonnadan astam munaı óndirilgen. Qalaı desek te, memleket qorjynyna salyqtyń bes túrin quıyp otyrǵan «Embimunaıgaz» AQ Qazaqstannyń iri salyq tóleýshileriniń qataryna kiredi.

«Embimunaıgaz» 2012 jyly aksıoner­lik qoǵam bolyp qaıta qurylǵaly Ulttyq qor, respýblıkalyq jáne jergilikti bıýd­jetke salyq tólemderi retinde 1 trln 303 mlrd teńge tólegen. Bul týraly Bas dırektordyń ekonomıka jáne qar­jy jónindegi orynbasary Rysty Tasma­ǵam­betova: «2018 jyldan beri kompanııa mem­leket qazynasyna 491 mlrd 695 mln teńge tóledi. 2022 jyly 155 mlrd 730 mln teńge somasynda salyq tóleý jos­parlanyp otyr», dedi. Buǵan qosa EMG sońǵy on jylda Atyraý oblysy­n­yń ınfra­qurylymyn damytýǵa 5,7 mlrd teń­ge jáne demeýshilik pen qaıyrym­dy­lyq is-sharalaryna 3,9 mlrd teńge jumsaǵan.

«Pandemııaǵa deıin kompanııamyzdyń kórsetkishteri jaqsy edi, indet kezinde basqa salalar sııaqty, bizdiń kompanııa da shyǵynǵa batty. Al 2018-2021 jyldardyń aralyǵynda «Embimunaıgazdyń» taza tabysy 280 mlrd teńgeni quraǵan bolatyn. Mysaly, 2020 jyldy 18 mlrd teńge shyǵynmen aıaqtadyq. Sebebi kompanııanyń negizgi aktıvteri qunsyzdandy. Biraq kelesi jyly qaýyrt jumys atqaryp, pandemııaǵa deıingi kórsetkishke qaıta qol jetkizdik», deıdi Rysty Tasmaǵambetova.

Búginde álemde bolyp jatqan alasapyran, hám geosaıası ahýal munaı óndirisine qalaı áser etedi degen saýalymyzǵa «Embimunaıgaz» AQ Bas dırektory Esen Qaıyrjan óndirilgen munaıdyń ishki na­ryqpen qatar, eksportqa qalaı jónel­tiletinine toqtala kele: «Sońǵy ýaqytta kórshi elderde bolyp jatqan oqıǵalar men geosaıası jaǵdaılardyń ázirge munaı óndirisine tikeleı áseri baıqala qoıǵan joq. Alaıda bul – basshylyqty ǵana emes, barlyq munaıshyny únemi alań­datyp otyrǵan kókeıkesti suraq. «Embi­munaıgaz» tek munaı óndiredi, al eks­port, ónimdi satý jáne jetkizýmen saıası qa­rym-qatynas máselelerimen arnaıy meke­meler aınalysady. Árıne, óz tarapymyz­dan biz de bul oqıǵalar kompanııanyń qar­jy­lyq kórsetkishterine teris áser etpeýin qamtamasyz etýge tyrysamyz», dedi.

Orta eseppen alǵanda, kompanııa jylyna 2-2,5 mln tonna munaı óndiretin bolsa, qazir barlanǵan munaı qory shamamen 80 mln tonna. Kompanııa ókilderiniń aıtýynsha, bul qor áli 30 jylǵa jetedi. Iаǵnı «munaı qory taýsylyp, kompanııa shyǵynǵa ushyraıdy dep alańdaýǵa sebep joq», deıdi kompanııa basshylary. О́ıtkeni jýyrda taǵy 2-3 jańa ken ornyn iske qosý josparlanyp otyr.

ALMATY