Ortalyq klınıkalyq aýrýhanadaǵy kúrdeli otany belgili neırohırýrg, medısına ǵylymdarynyń kandıdaty Shyńǵys Shashkın bastaǵan bilikti úsh dáriger jasaıdy. Sh.Shashkın mı men julynǵa neırostımýlıator ımplantasııalaýǵa mamandanǵan elimizdegi alǵashqy neırohırýrg.
– Almatyda tegin kvota boıynsha operasııa jasalǵan alǵashqy adamnyń jasy jetpiste. Ol 8 jyl buryn aýrýdyń asqynǵan túrine shaldyqqan. Qazaqstan boıynsha mundaı aýrýmen naýqastanǵandar sany 30 myńǵa jýyqtaıdy, kóbisi egde tartqan adamdar. Degenmen, men óz tájirıbemde 25 jastaǵy naýqasty da kórdim, – deıdi ol.
Bilikti hırýrg operasııanyń qalaı jasalatynyna da jalpylama toqtalyp ótti. Ol úshin naýqastyń mıyna jińishke elektrod engizilip, buǵana súıeginiń tómengi tusynda teriniń astyna ornatylǵan neırostımýlıatorǵa qosylady. Árıne, naýqas operasııadan keıin qulantaza aıyǵyp ketpeıdi, biraq bulshyqeti istemeı qalǵan jandardyń ómiri aıtarlyqtaı jaqsaratyn kórinedi.
Aıta keteıik, dúnıe júzi boıynsha eń alǵash bıostımýlıator salý operasııasy 1987 jyly jasalypty. Qazir neırostımýlıasııa tásili AQSh-ta, Eýropa men Azııanyń birqatar elderinde qoldanylyp júr. Ol Qazaqstanda tuńǵysh ret 2013 jyly tájirıbeden ótti. Sodan beri kúrdeli operasııa Astana men Qaraǵandy qalalarynda jasalyp kelgen.
