Maqsat – sapa men tıimdilik

Vedomstvo basshysynyń aıtýyn­sha, Prezıdent Qasym-Jomart Toqaev halyqqa arnaǵan Joldaýynda mı­nıstrliktiń aldyna birqatar mańyzdy mindet qoıǵan. Qazirgi ýaqytta vedomstvoda atalǵan mindetterdi iske asyrýdyń negizgi tetikteri pysyqtaldy. 

– Atap aıtqanda, Qala qurylysy kodeksin qabyldaý úshin jol kartasy ázirlenip, bekitildi. Sonymen birge quqyqtyq jáne taldamalyq monıtorıng júrgizý úshin jumys toby quryldy. Onyń quramyna Qazaq qurylys jáne sáýlet ǵylymı-zertteý jáne jobalaý ıns­tıtýty, Turǵyn úı-kommýnaldyq sharýa­shylyǵyn jańǵyrtý men damytýdyń qazaqstandyq ortalyǵy, «QazjolǴZI», «Atameken» ulttyq kásipkerler palatasy jáne bıznes-qoǵamdastyq ókilderi kirdi, – dedi Q.О́skenbaev.

Mınıstrdiń aıtýynsha, memlekettik qala qurylysy kadastrynyń aqpa­rat­tyq júıesi bazasynda árbir iri qala bo­ıynsha jer ýchaskeleriniń fýnksıo­nal­dyq ınteraktıvti kartalaryn jáne kom­mýnaldyq jelilerdiń shema­laryn qurý josparlanyp jatyr. О́ner­ká­siptik maqsattaǵy ýchaskelerdiń karta­lary Kólik jáne kommýnaldyq ınfra­qu­ry­lymnyń ózekti shemalarymen tolyq­tyrylady.

Júıe jergilikti atqarýshy organdar bergen málimetterdi eskere otyryp, 514 myń gektar aýmaqtan ınfraqurylymdyq derekterdiń 65 paıyzyn qamtıdy. Bazaǵa 191 bas jospar jáne 661 egjeı-tegjeıli josparlaý jobasy sıfrlandyrylyp, engizilgen. Jelilerdiń qalǵan 35 paıy­zyn 2024 jylǵa deıin sıfrlandyrý jos­parlanyp otyr.

– Joldaýda avtomobıl joldarynyń qurylysy, onyń ishinde jergilikti mańyzy bar avtomobıl joldaryn salý sapasyna qatysty másele aıtyldy. Osyǵan baılanysty eń aldymen jos­parlaý tıimdiligi artty. Atap aıtqanda, avtojol salasynyń barlyq jobasynda «FIDIC» halyqaralyq erejeleriniń ERSM sharttaryn kelisimshartqa engizý usynylady. Bul shara jumystardyń sapasyn qamtamasyz etip, materıaldar qunynyń qymbattap ketý táýekelderin azaıtýǵa múmkindik beredi, – dep naq­ty­lady mınıstr.

Sondaı-aq qurylys prosesi men sapany baqylaýdyń barlyq qatysýshysynyń derbes jaýapkershiligi artyp, tehnıkalyq jáne avtorlyq qadaǵalaý fýnksııalaryn biriktirý boıynsha zańnamalyq aktilerge túzetýler ázirlengen. Sonymen birge normatıvtik bazany jetildirý jáne jol-qurylys materıaldary men jańa tehnologııalardyń elektrondyq bazasyn engizý joldardyń sapasyn baqylaýdyń biryńǵaı respýblıkalyq júıesin engizý usynylady. Jobalardyń tehnıkalyq jaǵy Ulttyq sapa ortalyǵymen keli­siledi. Jol ınstıtýty jobany ázirleý kezeńinde jańa tehnologııalar men materıaldardyń qoldanylýyna saraptama júrgizedi. Budan basqa, avtojoldardy salý prosesi E-qurylys platformasynda tolyq avtomattandyrylmaq.

Vedomstvo basshysynyń aıtýyn­sha, ındýstrııalyq sektordyń ınves­tı­sııa­lyq tartymdylyǵyn arttyrý úshin jer qoınaýyn ıgerýge ınves­tısııalar tartýdyń zańnamasy men rá­simderin ońaılatý, onyń ishinde bıznes-prosesterdi reınjınırıng jáne avtomattandyrý jónindegi sharalar usynylady.

– Osy aıda «Kaz-Nedra» aqparattyq júıesi sheńberinde qanatqaqty jobada qatty paıdaly qazbalardy barlaýǵa lısenzııalar berýdi iske qosýdy josparlap otyrmyz. Sıfrlandyrýdy eskere otyryp, ınvestorlar úshin barlyq bıznes-prosess pen normatıvtik talaptar qaıta qaralyp, jeńildetiledi, – dedi Q.О́skenbaev.

Indýstrııalyq sektordyń ınves­tı­sııalyq tartymdylyǵyn arttyrý úshin vedomstvo sondaı-aq arnaıy ekono­mıkalyq aımaqtardyń qyzmetin jetildirý, jumys istep turǵan kásip­oryndar taýarlarynyń óndirisi men nomenklatýrasyn keńeıtý, jańa taýarlar óndirisin iske qosý jónindegi sharalardy josparlaıdy.

– Arnaıy ekonomıkalyq aımaq qyz­metiniń tıimdiligin arttyrý úshin myna­daı jańa sharalar engiziledi: barlyq ınvestısııalyq mindettemeni adal oryn­daǵannan keıin jeńildikter berýdiń saralanǵan tásilin, aralas rejimdi jáne jer ýchaskesin satyp alý múmkindigin engizý qarastyrylǵan, – dedi mınıstrlik basshysy.

Aıta keterligi, eldiń tranzıttik áleýe­tin nyǵaıtý úshin Aqtaýda konteınerlik hab qurý jáne Transkaspıı dálizin damy­tý sııaqty iri jobalardy iske asyrý bastaldy. Jobalar 2025 jylǵa deıin «Qýatty óńirler – el damýynyń draıveri» ulttyq jobasy sheńberinde PSA, Abu Dhabi Ports, Adani Group, CMA CGM, Maersk syndy áleýetti ınvestorlarmen birlesken kásiporyn formatynda iske asyrylady.

Sondaı-aq qazirgi tańda «Qazaqstan temir joly» ulttyq kompanııasyn tolyq­qandy kólik-logıstıkalyq korporasııaǵa aınaldyrý modelin qalyptastyrý bo­ıynsha jumys júrgizilip jatyr.

– «Qazaqstan temir joly» ulttyq kompanııasynyń transformasııasyn PSA, DBShenker, CoscoShipping, DPWorld sekildi álemdik kólik-logıs­tı­kalyq kompanııalarmen kooperasııa, kólik dálizderin sıfrlandyrý jáne syrtqy termınaldyq jelilerdi qurý sııaqty baǵyttar boıynsha júzege asyrý usynylady, – dep málimdedi mınıstr.