Anyqtalǵan jemqorlyq táýekelderi vagondardy berý kezindegi ákimshilik kedergilermen jáne jemqorlyq shemalarymen, tıisti sıfrlandyrýdyń bolmaýymen, temirjolshylardyń kásipkerlermen tikeleı baılanysymen, qaǵaz nysanda ótinimder berýmen baılanysty bolǵan.
«Máselen, sońǵy 5 jylda QTJ laýazymdy tulǵalary men onyń vedomstvolyq baǵynysty uıymdaryna qatysty 136 qylmystyq is tirkelgen. Olar boıynsha 52 adam sottaldy. Bul saladaǵy qylmystardyń kópshiligi paraqorlyq (70%) jáne urlyq (13%) faktilerine baılanysty. Atalǵan qylmystar oryndalǵan jumystar aktilerine qol qoıý kezinde zańsyz syıaqylar alýmen, jumysqa qabyldaýmen jáne qyzmet boıynsha aýysýmen, sondaı-aq júkterdi tasymaldaý úshin vagondar men teplovozdardy jedeldetip jáne kedergisiz berýmen baılanysty», delingen habarlamada.
Agenttik Tóraǵasynyń birinshi orynbasary Dmıtrıı Malahov óz sózinde júrgizilgen taldaýǵa sáıkes QTJ jekelegen bólimshelerinde vagondarmen aıla-sharǵy jasaý boıynsha jemqorlyq shemalary qurylǵanyn habarlady.
«Is júzinde para bergen adam óz júkterin ýaqytyly jiberedi. Bul problemalardyń barlyǵy kásipkerlerdiń dálelderimen ǵana emes, qylmystyq isterdiń naqty materıaldarymen de rastalady. Jaqynda ǵana Qostanaı oblysy boıynsha QTJ bólimshesiniń basshylary sottaldy, olar zańsyz syıaqylar úshin vagondar berý jónindegi qylmystyq shemany uıymdastyrǵan», dedi Dmıtrıı Malahov.
Sondaı-aq «Qaztemirtrans» Qostanaı fılıalynyń burynǵy basshysy Ýsabekovke qatysty qylmystyq is boıynsha oǵan vagondardy berý nemese bas tartý máselesin óz betinshe sheshýge múmkindik bergen jasyryn prosester anyqtaldy.
«Ýsabekov lobbızm jasaǵan kásipkerler táýlik boıy óz vagondaryn tapshylyq kezeńinde de aldy, al basqalary óz kezegin birneshe apta kútýge májbúr bolǵan. B.Ýsabekov jasaǵan qylmystary úshin 6 jylǵa bas bostandyǵynan aıyryldy, al para berýshi fırmaǵa 24 mln teńge kóleminde aıyppul salyndy», dep jazdy ANTIKOR baspasóz qyzmeti.
Keńes qorytyndysy boıynsha Dmıtrıı Malahov aıtylǵan usynymdar Sybaılas jemqorlyqqa qarsy qyzmettiń qatań baqylaýynda bolatynyn aıtyp, QTJ-ny atalǵan máselelerdi dereý sheshýge shaqyrdy.
