26 mamyrda aýdan ákimi Baýyrjan Aıtmaǵambetov pen Tasqala aýyldyq okrýginiń ákimi Gúljan Muhambetqalıeva aýdandyq mádenıet úıinde birlesken kezdesý uıymdastyrdy. Is-sharaǵa mekeme basshylary, prokýratýra, ishki ister organy qyzmetkerleri, depýtattar, qoǵamdyq uıym ókilderi, aýyl turǵyndary, zeınetkerler qatysty. Jınalǵandar kókeılerinde júrgen saýalyn qoıyp, tushymdy jaýap aldy. Atap aıtqanda, 200 oryndyq balabaqsha qurylysy, kósheni jaryqtandyrý, «Azaly ana» eskertkishin jóndeý, zıratqa jer bólý, joldardy qalpyna keltirý, Pýshkın kóshesindegi tabanjoldy qaıta salý sııaqty mańyzdy máseleler kóterildi. Al Prezıdenttiń Jarlyǵynda osyndaı kezdesýlerden keıin jergilikti atqarýshy organdar men prokýratýra, ishki ister bólimi basshylyq quramynan, máslıhat depýtattarynan, qoǵamdyq keńes múshelerinen jergilikti zııalylarmen birlesip, azamattardy jeke qabyldaý talap etiledi.
Jalpy, aýyldarda jyldar boıy sheshimin tappaı kele jatqan kóp sharýanyń bir ushy aýyl ákimine baryp tireletini de ras. Osy oraıda bıylǵy jyldyń úshinshi toqsanynda okrýg ákimderiniń halyqpen kezdesýleri jalǵasqan bolatyn. О́kinishke qaraı, okrýg ákimi G.Muhambetqalıevanyń bul jolǵy kezdesýleri kóshelerde, aýlalarda, oıyn alańdarynda uıymdastyrylǵandyqtan, adam az jınalyp, formaldy ótti. Sondyqtan aýyl ákimine halyqpen toqsan saıynǵy kezdesýlerine aıtarlyqtaı mán berip, basqosýlardy dalada emes, barlyq quzyrly organdar basshylarynyń qatysýymen aýdandyq demalys úıinde ótkizse degen tilegimiz bar. Áıtpese, birde-bir jaýapty qyzmetker tóbe kórsetpeıtin, eki-úsh adam ǵana jınalatyn kezdesýlerden ne úmit, ne qaıyr?
Bısenbaı О́TEGENOV,
zeınetker, aýdandyq qoǵamdyq uıym múshesi
Batys Qazaqstan oblysy,
Tasqala aýdany
