Úkimet • 06 Qazan, 2022

Álıhan Smaıylov «Kaspıı bestigi» elderin ekologııalyq baǵdarlamany jańǵyrtýǵa shaqyrdy

32 ret kórsetildi

Qazaqstan Premer-Mınıstri Álıhan Smaıylov Máskeýde ótip jatqan ekinshi Kaspıı ekonomıkalyq forýmynyń plenarlyq otyrysynda sóz sóıledi, dep habarlaıdy Egemen.kz Úkimettiń baspasóz qyzmetine silteme jasap.

Úkimet basshysy Kaspıı óńiriniń tarıhy tereńde jatqanyn, onyń alýan túrli mádenıeti men mol tabıǵı qorlary bar ekenin atap ótti. Sonymen qatar geografııalyq ornalasýy jáne biregeı tranzıttik áleýeti jaǵynan Kaspıı teńizi halyqaralyq saýdany damytýda mańyzdy ról atqarady.

«Qazaqstannyń Soltústik-Ońtústik jáne Shyǵys-Batys kólik dálizderiniń áleýetin arttyratyn transshekaralyq habtardy qalyptastyrý boıynsha úlken josparlary bar. Bul – Aqtaý jáne Quryq teńiz porttary, «Qorǵas» qurǵaq porty, «Ortalyq Azııa» halyqaralyq ónerkásiptik kooperasııa ortalyǵy jáne basqalary», dedi Álıhan Smaıylov.

Mundaı ınfraqurylymdyq toraptar Kaspıı mańyndaǵy elderge jáne halyqaralyq naryqtarǵa saýda tasymaldaryn keńeıtýge yqpal etetinin eskere otyryp, Premer-Mınıstr Memleket basshysynyń Kaspıı mańy azyq-túlik habyn qurý týraly bastamasyna nazar aýdardy.

Sonymen qatar Úkimet basshysy óńiraralyq saýdanyń áleýetin tolyq ashý úshin óńirdiń kólik baılanysyn jaqsartý qajet ekenin atap ótti. Máselen, Aqtaý porty «Úndistan – Parsy shyǵanaǵy elderi – Iran – Qazaqstan – Reseı» baǵyty úshin torapqa aınalýy múmkin.

Oǵan qosa, Álıhan Smaıylov Eýropa, Ortalyq Azııa jáne Qytaı arasyndaǵy júk tasymalyn keńeıtý úshin Transkaspıı halyqaralyq kólik marshrýtyn odan ári damytý jáne kedergilerdi birlesip eńserý qajettigin málimdedi.

«Búgin biz bastama usyndyq: áriptesterimizben bul jumysty qazirden bastaımyz dep kelistik. Tıisti jol kartasyn ázirlep, tranzıttik marshrýttarymyzdyń áleýetin keńeıtýge kirisemiz», dedi ol. 

Premer-Mınıstr yntymaqtastyqtyń taǵy bir mańyzdy qyry retinde aımaqtyq energetıkalyq qaýipsizdikti qamtamasyz etý ekenin aıtty. Bul baǵytta munaı men gazdy tereń óńdeý basymdyq bolyp tabylady.

«Búginde Qazaqstan zańnamalyq bazany jetildirip, jer qoınaýyn paıdalanýǵa ınvestısııalar tartý úshin neǵurlym qolaıly jaǵdaılar jasap jatyr. Jyl sońyna deıin qurlyqtaǵy jáne teńizdegi kúrdeli munaı-gaz jobalary úshin fıskaldyq jáne retteýshilik artyqshylyqtardy kózdeıtin jaqsartylǵan modeldik kelisimshart engiziletin bolady», dedi Á.Smaıylov.

Sonymen qatar Úkimet basshysynyń aıtýynsha, munaı-gaz hımııasyndaǵy keleshegi bar jobalardy iske asyrý úshin qolaıly jaǵdaılar jasalǵan. Atap aıtqanda, Atyraý oblysyndaǵy arnaıy ekonomıkalyq aımaq aıasynda memlekettik qoldaý men aıtarlyqtaı artyqshylyqtar kózdelgen.

Premer-Mınıstrdiń pikirinshe, ekologııa salasyndaǵy ózara is-qımyl da mańyzdy ról atqarady, óıtkeni Kaspıı jaǵalaýynda 15 mln-nan astam adam turady.

«Ekologııalyq tepe-teńdikti saqtaý – memleketterimiz úshin mańyzdy mindet. Teńiz problemalary onyń bıologııalyq resýrstarynyń sarqylýymen, shıkizat óndirý jáne júkterdi tasymaldaý saldarynan qatty lastanýymen baılanysty. Osyǵan oraı, Kaspıı ekologııalyq baǵdarlamasynyń jumysyn jandandyrýdy qoldaýǵa shaqyramyz», dedi ol.

Sońynda Álıhan Smaıylov óńir elderin týrızm salasynda birlesip, belsendi túrde áreket etýge shaqyrdy: aralas týrlardy iske qosý, krýız týrızmin damytý, vızalyq jáne kóshi-qon rejımderin yryqtandyrý jóninde sharalar qabyldaý kerek.

«Sonymen qatar Qazaqstan Úkimeti Kaspıı jaǵalaýynda týrısterge qolaıly jaǵdaı jasaý boıynsha jumys júrgizip jatyr. Atap aıtqanda, 2025 jylǵa deıin 360 mıllıon dollardan astam somaǵa 15 ınvestısııalyq jobany iske asyrý josparlanyp otyr», dedi ol. 

Premer-Mınıstr óńirlik týrızmdi damytýdyń negizgi qadamy Kaspıı teńizi jaǵalaýyndaǵy elder arasynda tıisti kelisim ázirleý ekenin aıtty.

«Oǵan tezirek qol qoıý úshin jumysty kúsheıtýdi usynamyz», dep túıindedi Álıhan Smaıylov. 

Aıta keteıik, Kaspıı ekonomıkalyq forýmy (KEF) – Kaspıı óńiri elderi yntymaqtastyǵynyń ózekti máselelerin talqylaýǵa arnalǵan iri alań, onda kóteriletin negizgi máseleler – saýda-ekonomıkalyq baılanystar men kólik-logıstıkalyq ınfraqurylymdy damytý. Forým aıasynda dóńgelek ústelder, plenarlyq otyrystar, konferensııalar jáne basqa da is-sharalar ótkiziledi.

Ekinshi KEF-ke «Kaspıı bestigi» elderinen, sondaı-aq Belarýs, Qyrǵyzstan jáne О́zbekstannan 1 000-nan astam delegat qatysyp jatyr. Delegasııalardy Reseı Úkimetiniń tóraǵasy M. Mıshýstın, Ázerbaıjan Premer-Mınıstri A. Asadov, Irannyń birinshi vıse-prezıdenti M. Mohber jáne Túrikmenstan Mınıstrler kabıneti tóraǵasynyń orynbasary H. Geldymýradov bastap bardy.

Sońǵy jańalyqtar

Reseıde zaýyt órtendi

Oqıǵa • Keshe

Uqsas jańalyqtar