Ulttyq sport • 07 Qazan, 2022

Asyq atýdan álem chempıony

67 ret kórsetildi

Aǵa býynnan asyq atý oıyny týraly surasańyz, kóbine muǵalimderden jasyrynyp oınaǵandaryn aıtady. «Asyq oınaǵan – azar, dop oınaǵan – tozar. Bárinen de qoı baǵyp, quıryq jegen ozar», degen sózdi ustanym etkenderin de jasyrmaıdy. Al búginde asyqqa degen kózqaras múlde ózgergen. Ulttyq oıyndy nasıhattap, búgingi býynǵa úıretip júrgenderdiń qatarynda muǵalimder kóp.

Jýyrda Túrkistan oblysynyń Túlkibas aýdanyndaǵy mektep muǵalimi Almas Qarabaev Rýmynııada asyq atýdan ótken jarysta álem chempıony atandy. Segiz jyldan beri asyq atý sportymen kásibı turǵyda shuǵyldanyp kele jatqan Almas sporttyń bul túrinen ulttyq quramanyń kapıtany. Almaspen birge Qazaqstan quramasy atynan óner kórsetken taǵy eki sportshymyz Rýmynııa elinde ótken dodada jeńiske jetken. Qyrǵyzstan, Túrkııa, Pákistan, Moldova, Bolgarııa syndy álemniń 8 elinen kelgen sańlaqtar baq synaǵan dodada otandastarymyz jeńimpaz atandy. Sheshýshi synda Moldova quramasymen komandalyq kezdesýde úsh jigit te qarsylastaryn utty. Almas Qarabaev – Túlkibas aýdanyndaǵy A.S.Pýshkın atyndaǵy mektep-lıseıinde dene shynyqtyrý pániniń muǵalimi. Buǵan deıin basketbol, kúres syndy sport túrlerimen aınalysqan ol 2015 jyly asyq atý jarysynda baǵyn synap, kózge túsken. Iаǵnı sol jyly Qazaqstan chempıony atanyp, ulttyq quramaǵa qabyldandy. Búginde Qazaqstan kýbogi men chempıonatynyń birneshe dúrkin jeńimpazy ári júldegeri. Bıikten kóri­nip júrgen shákirtteri de az emes. Bıyl 9 shákirti Qazaqstan chempıony atandy.

Almas oqýshylardyń asyq atýǵa qyzyǵýshylyǵy artyp kele jatqanyn, únemi bilmegenin surap otyratynyn aıtady. Odan bólek, qosymsha úıirme ashqan. Shákirtteri «asyq» jáne «bes asyq atý» sport túrlerinen Qazaqstan chempıonatynyń jáne ulttyq oıyndar chempıondary atanyp, senimdi aqtap keledi.

«Qazir baıaǵydaı emes, asyq atý sporty damyp jatyr. Memleket tarapynan da qoldaý bar. Tek keıbir adamdar asyq atýdy balanyń oıyny dep qabyldaıtyny qynjyltady. Nege deseńiz, bul – naǵyz sport. Asyq atý mergendikti, shapshańdyqty qajet etedi. Máselen, oıynǵa eki bala shyqty delik. Olar bir oınaǵanda 15 mınýt toqtaýsyz baq synasady. Úsh taım bolady. Sonda olar 45 mınýt júgirip, qozǵalysta júredi», deıdi Almas.

Iá, búginde asyqqa qorǵasyn quıyp, ádemi saqa etkisi keletin bala kóbeıgen. Sol salmaqty saqamen ortaǵa tigilgen asyqty shıyra atqanda búkil balanyń delebesi qozady. Ustazdyń aıtýynsha, balalardy ózara tartystyrǵan asyq utysy óte tartymdy oıynǵa aınalǵan. Balany mergendikke, jyldamdyqqa, eptilikke, tózimdilikke, uqyptylyqqa daǵdylandyratyn ereksheligimen de mańyzdy. Asyq oıyny kezinde adamnyń aıaq-qoldary, beli, moıny, tipti saýsaqtyń, bashpaıdyń ushtaryna deıin qımyl-qozǵalysqa túsip, dene súıekteriniń symbatty bolyp ósýine oń yqpal etedi. Iаǵnı asyq oınaǵan bala azbaıdy, shynyǵyp, shyńdalady, oı-órisi damıdy.

 

Túrkistan oblysy

Sońǵy jańalyqtar

Ekibastuz: Taǵy 9 úıge jylý berildi

Aımaqtar • Búgin, 21:02

Senatorlar ózekti máselelerdi talqylady

Parlament • Búgin, 14:03

ÁCh 1/8 fınalynda kimder oınaıdy?

Fýtbol • Búgin, 12:40

Bir táýlikte 173 adam koronavırýs juqtyrǵan

Koronavırýs • Búgin, 11:02

Uqsas jańalyqtar