Qoǵamdyq qabyldaý «Halyq únine qulaq asatyn memleket» tujyrymdamasy aıasynda stýdenttermen, ujymmen, qoǵammen baılanys ornatý úshin quryldy. Zamanaýı aqparattyq tehnologııalardy qoldaný – qarym-qatynastyń jańa formaty. Qoǵamdyq qabyldaý bólmesiniń ereksheligi, ótinishti offlaın rejimde ǵana emes, sonymen qatar ýnıversıtettiń barlyq oqý ǵımaratynda, jataqhanalarynda ornalasqan QR kody arqyly onlaın rejiminde de berýge bolady. Arnaıy QR kodyn skanerlep, suraýlar men usynystardy jiberý jetkilikti. Suraq avtomatty túrde qoǵamdyq qabyldaý bólmesine túsedi, jaýap onlaın rejimde keledi.
QR kod ýnıversıtette ázirlengen Smart.ENU. qosymshasyna bekitilgen. Osylaısha, EUÝ-da sıfrlyq ekojúıe belsendi qalyptasýda.
Ǵylym jáne joǵary bilim mınıstri Saıasat Nurbek atap ótkendeı, búginde elimizdiń joǵary oqý oryndarynda qoǵamdyq qabyldaýlar qurylyp jatyr. Bul rektoratqa oqytýshylardyń, stýdentterdiń, sondaı-aq beı-jaı qaramaıtyn azamattardyń barlyq másele, usynys jáne ıdeıalaryn baqylaýǵa múmkindik beredi.
«Ýnıversıtet mıssııalarynyń biri – jergilikti qoǵammen jumys isteý. Ýnıversıtettiń ǵylymı, bilim berý, tárbıelik mindetterinen basqa, zertteý ortalyǵy retinde qyzmet etý, aımaqtyń ekonomıkalyq jáne áleýmettik damýyna úles qosý úshin erekshe mıssııasy bar. Joǵary oqý oryndarynyń ákimshiligine tıimdi keri baılanys arnalaryn berý qajet. Barlyq usynys, másele ýaqtyly sheshilýi úshin «Halyqqa qyzmet kórsetý ortalyqtary» tárizdi oryndar qajet. Biz bul problemalardyń qoǵamdyq qabyldaý bólmelerinde qalmaı, tapsyrmaǵa aınalyp, tıimdi sheshimin tabýdyń algorıtmderin pysyqtap jatyrmyz», dedi S.Nurbek.
EUÝ basqarma tóraǵasy – rektory Erlan Sydyqov óz kezeginde qoǵamdyq qabyldaý bólmesiniń negizgi mindeti – ózekti máselelerdi sheshý, ýnıversıtet qyzmetin jaqsartýǵa qatysty stýdentterden, oqytýshylardan jáne qyzmetkerlerden keri baılanys alý ekenin atap ótti.
«Basty maqsat – bilim alýshylardy, qyzmetkerlerdi, ata-analardy alańdatatyn máselelerdi jyldam sheshý, ýnıversıtetti damytýda olardyń pikirin, ıdeıalaryn jáne usynystaryn eskerý. Memleket basshysy «tyńdaıtyn memleket» tujyrymdamasy aıasynda qoǵammen «baılanys kópirin» nyǵaıtý qajettigine basa nazar aýdardy. Bul baǵytta jańa formattaǵy qoǵamdyq qabyldaýdy ashýdy uıǵardyq. Sonyń nátıjesinde, qoǵammen ózara baılanystyń tıimdi jáne kópshilikke yńǵaıly joldaryn damytýǵa tyrysamyz», dedi rektor.
Qoǵamdyq qabyldaý bólmesine stýdentter de, ýnıversıtet qyzmetkerleri de ýnıversıtettiń jumysyn jaqsartý boıynsha óz usynystarymen júgine alady. Bekitilgen keste boıynsha oflaın qabyldaýdy JOO basshylyǵy júrgizedi. EUÝ qoǵamdyq qabyldaý bólmesiniń ashylýynda Ǵylym jáne joǵary bilim mınıstri Saıasat Nurbek qoǵamdyq qabyldaý bólmeleri ashylǵan elimizdiń joǵary oqý oryndarymen beınekonferensbaılanys ótkizdi.
