Qazaqstan Respýblıkasy men Túrkııa Respýblıkasy arasyndaǵy aýyl sharýashylyǵy óniminiń taýar aınalymy 2022 jylǵy qańtar-tamyz aralyǵyndaǵy kezeńde 181,1 mln dollar boldy. Sonyń ishinde eksport – 106,3 mln dollar, ımport – 74,7 mln dollardy qurady. Bul 2021 jyldyń sáıkes kezeńimen salystyrǵanda 2,5 ese kóp. Negizgi eksport mynadaı taýarlarǵa tıesili: bıdaı – 28,9 mln, kúnbaǵys maıy – 28,6 mln, burshaq daqyldary – 16,0 mln, zyǵyr – 13,2 mln dollar. 2022 jyly Qazaqstan 2021 jyly Túrkııaǵa áketilmegen kúnbaǵys maıynyń eksportyn qalpyna keltirdi.
Budan basqa, ımport kólemi 1,5 ese ósti. Importtyń basym bóligin myna ónimder quraıdy: kúnbaǵys tuqymy – 12,9 mln, shokolad – 10,2 mln, qus jumyrtqasy – 7,1 mln, kondıterlik ónimder – 5,5 mln dollar.
«Atameken» Ulttyq kásipkerler palatasy men Túrkııa Respýblıkasy arasynda tyǵyz yntymaqtastyq ornatylǵan. 2022 jyly Túrkııa vıse-prezıdenti Fýat Aqtaýdyń jumys sapary aıasynda Qazaqstan-Túrkııa bıznes-forýmy ótti. Oǵan 250-den astam kásipker, sondaı-aq memlekettik organdar men kvazımemlekettik sektor ókilderi qatysty.
«Kezdesý sátti ótti, yntymaqtastyq týraly 10 kelisim jasaldy. Olardy iske asyrý aıasynda ınvestorlar birqatar kásiporyn salýǵa nıetti. Atap aıtqanda BQO jáne Aqtóbe oblystarynda avıakargo bar kólik-logıstıkalyq ortalyqtar, Almatyda farmasevtıkalyq zaýyt, medısınalyq buıymdar, maskalar men respıratorlar shyǵaratyn kásiporyn, tot baspaıtyn bolat, metall bolat konstrýksııalardan jasalǵan ónimder shyǵaratyn zaýyt, elordada saýda-oıyn-saýyq ortalyǵy salynady», dep atap ótti «Atameken» QR UKP Tóralqa tóraǵasy Raıymbek Batalov.
