Yntymaqtastyq forýmy

Forýmǵa elimizdiń bastaýysh kásipodaq uıymdarynyń, oblystyq kásipodaq orta­lyqtary men salalyq kásipodaq uıymdarynyń kásipodaq kóshbasshylary, halyqaralyq jáne áleýmettik áriptes­ter, sondaı-aq Parlament depýtattary qatysty.

Is-shara aıasynda kásipodaq jumysy qorytyndylandy. Sondaı-aq Kásipodaqtar federasııasynyń 2020-2025 jyldarǵa arnal­ǵan strategııasyndaǵy mindet­terdi odan ári júzege asyrýǵa qatysty maqsattar men naqty is-sharalar belgilendi.

Kásipodaqtar federasııasynyń tóraǵasy Satybaldy Dáýletalın kásipodaq qaýym­dastyǵyn Ádiletti Qazaqstandy qurý jaǵda­ıyndaǵy kásipodaqtarǵa arnalǵan jańa nusqaýlyqtarmen tanystyrdy.

«Biz búgin jańa tarıhı kezeńniń – táýelsiz Qazaqstannyń tórtinshi on jyl­dyǵynyń basynda turmyz. Kásipodaq kóshbas­shylarynyń búgingi forýmynyń for­matyn da tarıhı deýge bolady. Kásip­odaqtar federasııasy egemendik alǵannan beri óz qatarynda 16 myńnan astam bastaýysh kásipodaq uıymynan 2 mıllıonǵa jýyq eńbekkerdi biriktirip otyrǵan eń iri qoǵam­dyq uıymǵa aınaldy.

Birlik, ádilettilik, eńbek adamyna qur­met – bizdiń is-áreketterimizdiń algo­rıtmi. Eńbek adamyn qurmetteý, onyń quqyq­­tary men múddelerin qorǵaý – 26 sezde qabyl­danǵan Kásipodaqtar federasııasy qyzmetiniń strategııasynda kórinis tapqan bizdiń kásipodaq uıymdary qyzmetiniń negizgi qaǵıdasy. Biz onyń ózektiligi men ýaqtylyǵyna birqatar kóz jetkizdik jáne barlyq alańda óz qundylyqtarymyzdy nasıhattaımyz», dedi S.Dáýletalın.

Kásipodaq kóshbasshylary men áleý-mettik áriptester qazirgi zamannyń syn-qaterleri, qaýipsiz eńbekti qamtamasyz etý jáne zamanaýı kásipodaqtardyń róli máse­leleri turǵysynan áleýmettik dıalog­tiń ózekti aspektilerin talqylady.

Forým alańynda «Eńbek adamyn ulyqtaý» medıa-baıqaýynyń jáne «Úzdik tehnıkalyq ınspektor-2021» jáne «Úzdik shıpajaı» baıqaýlarynyń jeńim­pazdaryn marapattaý rásimi ótti. Kásip­odaq belsendileriniń kásipodaq qozǵa­lysyn damytýǵa qosqan úlesin kásip­odaq marapattady. Forýmǵa qatysýshylar elimizdiń kásiporyndary men uıymdary qyzmet­kerleriniń quqyqtary men múddelerin qorǵaý boıynsha kásipodaq qyzmetin damytý týraly qaýly qabyldady.