Kollajdy jasaǵan Qonysbaı ShEJIMBAI, «EQ»
«Áleýmettik medısınalyq saqtandyrý qory» KeAQ elorda fılıaly baspasóz qyzmetiniń habarlaýynsha, Ulttyq neırohırýrgııa ortalyǵyna Almaty oblysynan kelgen 6 jasar qyzdyń ata-anasy medısınalyq kómekke júgindi. Ata-ana kishkentaı naýqastyń qoly men aıaqtarynyń álsiz, qozǵalysy shekteýli jáne moınyn óz betinshe ustaı almaıtyny jóninde shaǵymdaryn jetkizdi.
MRT-da dárigerler moıyn-jelke omyrtqalarynyń damýyndaǵy týabitken aýytqýdy anyqtady. Neırohırýrgııa ortalyǵynyń dárigerleri konsılıým ótkizip, emdeýdiń odan ári taktıkasy men ádisin anyqtady. Jaǵdaıdyń kúrdeliligi sol, qyzdyń birneshe omyrtqa deneleriniń bolmaýynan, bala basyn tolyq ustaı almaı, basy aldyna qaraı yǵysyp ketip qalady.
Julyn neırohırýrgııasy, shetki júıke júıesiniń patologııasy bólimshesiniń meńgerýshisi Talǵat Kerimbaevtyń aıtýynsha, kúrdeliligi men qaýiptiligine baılanysty mundaı operasııalar tek jetekshi mamandandyrylǵan klınıkalarda jasalady jáne aıtarlyqtaı sırek kezdesedi.
«Biz balaǵa asa kúrdeli operasııa jasadyq. Qyz balada moıyn-jelke omyrtqalarynyń kóptegen týabitken aqaýlary boldy. Sol sebepti julyn men mı baǵanasy qysylǵan. Osyǵan baılanysty, 6 jasqa deıin bala ózdiginen júre almady, erkin qozǵala almady, kıinip, shalqasynan jata almady. Nevrologııalyq sımptomatologııany jáne MRT zertteý nátıjelerin eskere otyryp, neırohırýrgter tobynyń sheshimi boıynsha bas pen moıynnyń qalypty anatomııalyq araqatynasyn qalpyna keltire otyryp, moıyn-jelke aımaǵynyń omyrtqalaryn qalpyna keltirý, sodan keıin S1, S2, S3, S4, S5, S6 omyrtqalaryn transartıkýlıarly, transkortıkaldy bekitý operasııasy jasaldy», dep túsindirdi T.Kerimbaev.
Qyzdyń anasynyń aıtýynsha, bes jasqa deıin qyz tolyq júre almaǵan, balerına sııaqty aıaqtyń ushymen júrdi. Alty jasynda, qyzdyń boıy kúrt ósken kezde, aıaqtyń ushymen júrýdi toqtatyp, tolyǵymen tósekke tańyldy.
«Biz balamyzdyń týabitken patologııasy týraly bilgen kezde buǵan deıin de osy ortalyqqa júgingen edik. Biraq dárigerler súıekterdiń azdap nyǵaıýy úshin biraz ýaqyt kútý kerektigin aıtty, operasııa keıinge qaldyryldy. Endi osy ortalyqqa operasııa jasatýǵa keldik. Munda operasııaǵa arnaıy daıyndyq sharalary ótti. Bir apta buryn balama operasııa jasaldy. Júrýge áli erte, degenmen qazir balamnyń aıaǵynda jıyrylý joq ekenin baıqadym. Aıaqtyń tabany bosańsyǵan, burynǵydaı tartylyp turǵan joq. Endi qyzymyzdyń alǵashqy qadamdaryn jasaı alatyn sátterin asyǵa kútýdemiz!», dedi kishkentaı naýqastyń anasy.
Balalar neırohırýrgııasy bólimshesiniń neırohırýrg dárigeri Saparbek Seıitbekovtiń aıtýynsha, operasııa kezinde negizgi mindet qysylǵan julyndy sátti bosatý, fızıologııalyq lordoz jasaý jáne moıyn omyrtqasyn bekitý boldy.
«Operasııa kezinde omyrtqalardyń aýytqýy tehnıkalyq turǵyda qıyndyq týǵyzdy. Mı baǵanasynyń, julyn men qan tamyrlarynyń zaqymdaný qaýpi óte joǵary boldy. Osy ómirlik mańyzdy ortalyqtar zaqymdanǵan jaǵdaıda pasıent sal aýrýyna shaldyǵýy múmkin nemese, tipti pasıent ólimimen aıaqtalýy da ábden múmkin edi. Baqytymyzǵa oraı, bári oıdaǵydaı ótti. Balanyń qımyl-qozǵalysqa beıimdelýi rettele bastady, qazir jıyrylý regressııasy jáne aıaqtyń bulshyq etteriniń kúsh alý dınamıkasy baıqalady», dedi S.Seıitbekov.
MÁMS aıasynda júrgizilgen operasııa 4 saǵatqa sozyldy. Operasııany professor, UJǴA akademıgi Talǵat Kerimbaev, praktıkalyq jumys ótili 30 jyldan astam, neırohırýrg dáriger, PhD Vıktor Aleınıkov jáne Balalar neırohırýrgııasy bólimshesiniń neırohırýrg dárigeri Saparbek Seıitbekov jasady.
