Bıyl sáýir aıynda anasy balanyń ishi tym úlkeıe bastaǵanyn baıqap, júkti áıelge uqsaýyna alańdaǵan. Sodan keıin jasalǵan medısınalyq zertteýler ishtiń keń túzilýin kórsetken. Nátıjesinde, balany Astanaǵa aparyp, shuǵyl túrde №2 qalalyq balalar aýrýhanasyna jatqyzdy. Naýqas aýrýhanaǵa aýyrsyný sındromy, tómen gemoglobın deńgeıi, ortasha aýyrlyq jaǵdaıymen túsken. Ishindegi isiktiń tym úlkeıip ketkeni sonshalyq, basyn kóterip júrýi qıyndyq týǵyzdy.
Sodan laparoskopııalyq operasııa kezinde 8 lıtrden asa suıyqtyq alynyp tastaldy. Isik oń jaq analyq bezde paıda bolǵan. Oń jaq analyq bezdiń tinderi ózgergendikten, dárigerler balanyń densaýlyǵyna qaýip tóndirmeýge sheshim qabyldap, oń jaq analyq bezdi tútikpen alyp tastady.
Josparly hırýrgııa bóliminiń meńgerýshisi Azamat Orazalınovtiń aıtýynsha, dárigerler asa kúrdeli operasııa jasaǵan. «Naýqastyń reprodýktıvti fýnksııasy zardap shekken joq, óıtkeni ekinshi analyq bez jumys istep tur. Asa uqyptylyqpen úsh tesik jasalyp, 3 sm-ge deıin kesildi. Qazir jetkinshek aýrýhanadan shyǵaryldy, endi óz qalasynda gınekologtiń baqylaýynda bolady», deıdi ol.
Anasy operasııa jasap, úlken kómegin kórsetken dárigerlerge alǵysyn jaýdyrdy. Ásirese, shuǵyl túrde sheshim qabyldap, operasııany sapaly ári sátti jasap shyqqan mamandardyń kásibıligin erekshe atap ótti.
Buǵan qosa elordalyq hırýrgter bes jasar balaǵa sırek kezdesetin perkýtandy gastrostomııa boıynsha taǵy bir operasııa jasady.
Tabıǵı jolmen tamaqtanýǵa múmkindik bermeıtin birqatar nevrologııalyq aýrýlar bar. Gastrostomııany oryndaý aýyr aýrýlary bar naýqastardyń tolyqqandy durys tamaqtanýyna múmkindik beredi. Astanalyq hırýrgter dál osyndaı operasııa jasap, gastrostomııalyq tútikti ornatý arqyly naýqastyń durys tamaqtanýyn qalpyna keltirdi.
