Memleket basshysy Túrikmenstan Prezıdentine iltıpat bildirip, eki eldiń halqyn tarıhı jáne týystyq qatynastar baılanystyratynyn atap ótip, qazaq-túrikmen yntymaqtastyǵyn odan ári damytý úshin munyń máni zor ekenin jetkizdi.
– Túrikmenstan – Qazaqstan úshin baýyrlas memleket. Bizdiń tarıhymyz ben shekaramyz ortaq. Bizdi mádenı-gýmanıtarlyq salalar jáne ekonomıkalyq múdde sekildi kóp baǵyttar baılanystyrady, – dedi Prezıdent.
Qasym-Jomart Toqaev pen Serdar Berdimuhamedov Qazaqstan men Túrikmenstan arasyndaǵy yntymaqtastyqty damytý perspektıvalaryn talqylady. Saýda-ekonomıkalyq qarym-qatynastardy keńeıtýge, sonyń ishinde energetıka, kólik jáne logıstıka, ónerkásip, aýyl sharýashylyǵy salalaryna erekshe nazar aýdaryldy.
Serdar Berdimuhamedov Qasym-Jomart Toqaevqa elimizge saparmen kelýge shaqyrǵany jáne qazaq jerinde qonaqjaılyq kórsetkeni úshin alǵys aıtty.
– Bul – meniń Qazaqstan Respýblıkasyna alǵashqy memlekettik saparym. Biz bul sapardy elderimizdiń arasyndaǵy ekijaqty baılanystardy damytýdyń mańyzdy kezeńi retinde qarastyramyz, – dedi Túrikmenstan Prezıdenti.
Sondaı-aq ol bıyl dıplomatııalyq qatynastardyń ornaǵanyna 30 jyl tolǵanyn atap ótti.
– Osy jyldarda eki el arasyndaǵy qatynastar keń aýqymdy baǵyttar boıynsha tabysty damydy. Osy múmkindikti paıdalana otyryp, Sizdi atalǵan mańyzdy datamen quttyqtaǵym keledi, – dedi Serdar Berdimuhamedov.
Túrikmenstan Prezıdenti Qasym-Jomart Toqaevqa Túrikmenstannyń Mıllı Gengeshi Halk Maslahatynyń tóraǵasy Gýrbangýly Berdimuhamedovtiń sálemi men izgi tilegin jetkizdi.
