QR Prezıdentiniń Is Basqarýshysy Aıbek Dádebaev osy kúnge oraı «Býrabaı» ulttyq parkiniń ujymyn quttyqtady.
– Halqymyzda «Atadan mal qalǵansha – tal qalsyn» degen danalyq sóz bar. Orman – bizdiń baǵa jetpes baılyǵymyz, halqymyzdyń en dáýleti. Prezıdent Qasym-Jomart Toqaevtyń ózi tal egý, ormandy alqaptardy ulǵaıtý isine tikeleı nazar aýdaryp otyr. Bul oraıda, «Býrabaı» ulttyq saıabaǵynda eńbek etetin 500-den astam bilikti de jaýapty mamandar asa mańyzdy jumysty adal atqaryp júrgeni sózsiz.
Sizder qystyń qaqaǵan aıazy men burqaǵan boranynda, jazdyń aptap ystyǵynda tabıǵattyń osynaý keremet syıyn kózdiń qarashyǵyndaı qorǵaısyzdar. 129 myń gektardan astam alqapty tabıǵı jáne adam qolymen jasalatyn apattardan aman saqtaý ońaı sharýa emes, – dep jazdy ol óziniń telegram arnasynda.
A.Dádebaev ormanshylardyń Smart Burabay júıesin tıimdi paıdalanyp, orman órtiniń taralýyna jol bermegenin, sonyń arqasynda keıingi eki jylda órtengen jerdiń kólemi 13 ese tómendegenin erekshe atap ótti. Sondaı-aq elimizde orman alqaptaryn keńeıtýge «Býrabaı» qyzmetkerleriniń qomaqty úles qosyp jatqanyna toqtaldy. Onyń aıtýynsha, byltyr ulttyq parkte 66 gektarǵa 500 myń túpten artyq aǵash egilse, bıyl taǵy 550 myńnan astam qaraǵaı men qaıyń kósheti otyrǵyzylǵan.
Quttyqtaýda aıtylǵandaı, búginde yntymaǵy jarasqan tatý ujymda ormanshylyqty atakásipke aınaldyrǵan Abdrahmanovtar, Ábildınovter, Dorogovtar, Krasnoýsovtar, Mahmetovter, Omarovtar, Rahmatýlınder syndy eńbekker áýletter bar. Sanaly ǵumyryn osy salaǵa arnap júrgen Qabdrashıt Mahmetov, Aleksandr Makarenko, Vladımır Kansev jáne basqa da ardagerlerdiń eńbegi bir tóbe.
– Sulý Kóksheniń jaıqalǵan jelegin, jan-janýarlaryn halyq ıgiligine jaratý jolynda atqaryp júrgen eren eńbekterińiz úshin ózderińizge shyn kóńilden rızashylyǵymdy bildiremin, – delingen quttyqtaýda.
Aıta keteıik, «Býrabaı» ulttyq tabıǵı parki respýblıkalyq mańyzy bar erekshe qorǵalatyn tabıǵı aımaq júıesine kiretin memlekettik tabıǵat qorǵaý mekemesi. Ol QR Prezıdenti Is Basqarmasyna qaraıdy.
