Dara kompozıtor dáripteldi

Juldyzdy belgini ashýmen qatar, eske alý keshi kópshilik nazaryna usynyldy. Onda kompozıtordyń týyndylary da oryndaldy. Qyzy Láıla sóz alyp, Qurmet kitabyna ákesiniń esimin jazdy.

– Ár jaǵdaıdyń óz orny,  ýaqyty bar. Bú­gingi shara sol óz ornynda, óz ýa­qytynda iske asyp otyr­ǵandaı. 100 jylǵa jýyq buryn osy topyraqta uly kompozıtor, meniń ákem Sydyq Muha­med­janov dúnıege keldi. Qara­ǵan­dy shahary – rýhanı-mádenı ortalyq. Meniń ákem ómirge kelgen oblys ortalyǵynda turatyn, osy qalany órkendetýge bar úlesin qosyp júrgen jerlesterime rızamyn. Birer jyldan keıin týǵanyna 100 jyl tolatyn ákemniń ataýly mereıtoıy qar­sańynda mynadaı ıgi isti júzege asyrǵan barshańyzǵa al­ǵy­sym sheksiz, – dedi qyzy Láıla Sydyqqyzy.

Aıtýly sharaǵa arnaıy kelgen belgili opera ánshisi Kenjeǵalı Myrjyqbaı kom­pozıtordyń tól týyndylaryn alǵashqylardyń biri bolyp oryndaǵanyn eske alady. Sondaı-aq has talanttyń eskertkishi Qaraǵandyda ornatylyp, konsert zalyna esimi berilse deıdi.

– 1981 jyly Ǵabıt Músi­repov lıbrettosyn jazǵan Sydyq Muhamedjanovtyń «Aqan seri – Aqtoqty» ope­ra­­syndaǵy bas keıipker par­­tııasynyń alǵash­qy oryn­daýshysymyn. Orato­rııa­syn, «Jum­baq qyz» operasyn­da Adaq­ty, Abaı óleńine jaz­ǵan sıklin oryndadym. Alda kom­pozıtordyń 100 jyl­dyǵy kútip tur. Soǵan oraı Qa­ra­ǵandynyń bir áıdik ǵıma­ra­tyna, ol «Shalqyma» konsert zaly ma, álde basqa óner oshaǵy ma, úlken ordaǵa esimin berip, týǵan jeri Qaraǵandynyń qaq tórinen eńseli eskertkishin ornatý kerek. Kompozıtor atynda respýblıkalyq ánshiler baı­qaýyn uıymdastyrý qa­jet dep bilemin. Tuńǵysh «Aı­sulý» operasy Qaraǵandy aka­demııalyq mýzykalyq komedııa teatry repertýaryna turaqty bekitilip, sahnaǵa shyǵyp tur­ǵany jón. 100 jyldyǵynda as iship, aıaq bosatýmen shektelmeı, barlyq shyǵarmalary respýblıkalyq deńgeıde nasıhattalyp, oryn­dalýǵa tıis, – dedi Kenjeǵalı Myrjyqbaı.

Sydyq Muhamedjanov Qa­raǵandy oblysy, Shet aýda­nynyń týmasy. Qurmanǵazy atyndaǵy Almaty memlekettik konservatorııasyn professor E.Brýsılovskııden kom­po­­zısııa klassy boıynsha bi­tirgen. Kompozıtordyń «Aı­sulý», «Jumbaq qyz», «Aqan seri-Aqtoqty» operalary, «Ǵa­syrlar úni», «Shattyq mekeni» sımfonııalary, «Darhan dala» sımfonııalyq kúıi, «Dom­byraǵa arnalǵan konsert­ter», «Qobyzǵa arnalǵan kon­sertter» týyndylary, skrıpka, qobyz, dombyraǵa ar­nalǵan konsertteri qazaq mýzy­ka­syn­daǵy iri qubylys dep baǵalaıdy ónertanýshylar.

Aıta ketý kerek, 2024 jyly kompozıtordyń týǵanyna 100 jyl tolady.

Qaraǵandy oblysy