Tımýr jáne onyń komandasy

Qostanaıdaǵy «Tobyl» men «Aqtóbe» matchy osy týrdyń eń mańyzdy oıyny bolǵanymen, qazaq­standyq fýtbol jankúıer­leri «El-Klasıko» dep aıdar taqqan «Qaırat» pen «Astana» kez­desýi de dál osy týrǵa tuspa-tus kelgendikten, elimizdiń eń mań­daıaldy komandalarynyń aras­yndaǵy tartysty 23-týrdyń ortalyq oıyny boldy deýge tolyq negiz bar. Keıingi birneshe jylda eki ujym ortasyndaǵy match jankúıer qaýymynyń delebesin qozdyrǵan derbı-dodaǵa aınalyp úlgerdi. Ispanııadaǵy Madrıdtiń «Realy» men Katalonııanyń «Barselonasy» arasyndaǵy «El-Klasıko» sııaqty bizdiń eldiń «El-Klasıkosy» da jyl sa­ıyn fýtbol jankúıerleri asyǵa kú­tetin matchqa aınalǵaly qashan.

«Qaırat» pen «Astana» osymen bıyldyqqa ekinshi már­te kezdesti. Alǵashqy oıyn ma­myr aıynda elordadaǵy «As­tana Arena» stadıonynda ótip, sol kezde alań ıeleri al­maty­lyqtardy 6:0 esebimen tize búk­tirgen bolatyn. Matchtan keıin «Qaırat» jankúıerleri oıynnyń esebi kezdeısoq nátıje ekenin, «Qaırat» Almatydaǵy matchta «Astananyń» «sazaıyn» beredi dep málimdegen edi. О́zge klýbtyń jankúıerleri de «Qaırat» pen «Astana» arasyndaǵy matchtyń qarymtasy qalaı bolar eken dep, asyǵa kútti.

Degenmen jankúıerler kút­ken bul kezdesýdiń de al­ǵashqy «El-Klasıkodan» esh aıyr­mashylyǵy bolǵan joq. Tek match­tyń ótken orny ózgerdi deme­seńiz, tablodaǵy esep dál bi­rinshi matchtaǵy nátıjege uqsas boldy. «Ortalyq» stadıondaǵy básekede «Qaırat» «Astanadan» taǵy da iri eseppen utyldy – 0:4. Eki oıynnyń nátıjesi boıyn­sha 10:0 esebimen jeńilgen almatylyqtar 180 mınýt boıy «Astana» qaqpasyna birde-bir gol soǵa almady. Mamyrdaǵy matchta «Astana» sapynan Marın Tomasov het-trıktiń, Pedro Eýjenıo dýbldiń avtory atanǵan bolsa, qazir Reseı chempıonatyndaǵy «Ýral» klýbynda óner kórsetip jatqan shabýylshy Raı Vlýt bir márte mergendigimen kózge túsken edi.

Araǵa tórt aı salyp Alma­tydaǵy qarymta kezdesýdiń taǵdy­ryn «Astananyń» qorǵaýshysy Tımýr Dosmaǵanbetovtiń bir ózi sheship tastady. Kezdesýdiń 10-mınýtynda esepti ashqan «As­tananyń» qorǵaýshysy ekin­shi taımnyń 59, 88 jáne 90-mı­nýtynda taǵy da úsh márte «Qaı­rat» qaqpasynan sańylaý taýyp, pokerdiń avtory atandy.

T.Dosmaǵambetovtiń keshegi benefısinen keıin esimizge osydan 58 jyl burynǵy oqıǵa tústi. 1964 jyldyń 26 tamyzynda odaq chempıonaty aıasynda Máskeýge sa­par shekken Almatynyń «Qaı­raty» jergilikti «Spartak» klý­­bymen kezdesip, sol machta qazaq­tyń dańqty aıaqdop sheberi Tımýr Segizbaev erekshe ónerimen daralandy. Alań ıeleriniń qaq­pasyna jaýapsyz eki gol soqqan Tımýrdyń erligine tánti bolǵan keńes odaǵynyń «Fýtbol» apta­lyǵy basylymy matchtyń ertesi kúni «Tımýr jáne onyń koman­dasy» degen taqyryppen kólemdi maqala jarııalaǵan edi. Mine, sol qazaq fýtbolyndaǵy Tımýr­lardyń jalǵasy bolǵan Tımýr Dosmaǵanbetov keshegi matchta bir ózi «Astanany» órge súırep, komandasyn chempıondyqqa taǵy bir qadam jaqyndatty.

«Astana» jankúıerleriniń qýa­nyshyna qaraı, týrnır keste­sinde kósh bastap turǵan «Aqtóbe» keıingi úsh týrda osymen ekinshi márte upaı joǵaltty. 20-týrda «Aqjaıyqtan» 3:1 esebimen je­ńilip qalǵan Andreı Karpovıch shákirtteri bul týrda syrt alańda Qostanaıdyń «Tobylynan» utyldy – 1:0. Chempıondyqqa talas júrgizip jatqan eki ujym arasyndaǵy match «Aqtóbe» qaqpasyna penaltı belgilengenge deıin teń dárejede ótip jatqan edi. Kezdesýdiń 81-mınýtynda qonaq komandanyń fýtbolshylary óz alańynda tártip buzyp, bas tóreshi Stas Pokatılov qaqpa­syna 11 metrlik aıyp dobyn bel­giledi. «Tobyldyń» kapıtany Serikjan Mujyqov alǵashqy múmkindiginde dáldik tanyta almaǵanymen, tóreshi penaltı oryndaý sátinde qonaqtar taǵy da ereje buzdy dep, Mujyqovqa ekinshi ret penaltı tepkizdi. Kapıtan bul joly bilgeninen jańylǵan joq – 1:0. Match sońyna deıin tarazy basyn teńestire almaı, úsh upaıdan qaǵylǵan «Aqtóbe» Qostanaıdan qur qol qaıtty. «Aqtóbelikterdiń» upaı joǵaltqanyn tıimdi paıdalanǵan «Astana» aradaǵy upaı sanyn bireýge deıin qysqartty.

Sondaı-aq «Kaspıı» men «Maqta­aral» arasyndaǵy matchta da tosyn nátıje tirkeldi. Bul kezdesýde «Kaspııge» qaraǵanda kósh sońyndaǵy «Maqtaaralǵa» úsh upaı aýadaı qajet edi. Alaı­da matchtyń alǵashqy taımynda alań ıleri qonaq komanda qaqpa­syna eki gol salyp, birinshi taım­dy óz paıdasyna aıaqtady. Byl­tyr «Maqtaaraldy» joǵary lıgaǵa shyǵarǵan bilikti bapker Konstantın Gorovenko úzilis ýaqy­tynda shákirtterine kerek­ti aqyl-keńesin aıtyp, fýtbol­shylardyń namysyn jaǵa aldy. Ekinshi 45 mınótte Túrkistan oblysynyń komandasy match sońyna deıin «Kaspıı» qaqpasyna tórt gol soǵyp, tamasha kambek jasady – 2:4. Mańyzdy úsh upaıyn ıelengen «Maqtaaral» týrnır kestesinde bir saty joǵarylap, 13-orynǵa kóterildi. Al syrt alańda «Tarazben» teń oınaǵan (0:0) «Aqjaıyq» 14-orynǵa syrǵydy.

Sonymen qatar bul týrda «Qy­zyljar» óz alańynda «Aty­raýdy» tize búktirse (3:1), «Orda­basy» da Shymkentte «Shah­ter­den» aılasyn asyrdy – 1:0. «Aqsý» Túrkistanda jergilikti «Tu­randy» bir dop aıyrmasymen qapy qaldyrdy – 0:1.

Kelesi XXIV týrda «Maqta­aral» – «Tobyl», «Aqjaıyq» – «Qy­zyljar», «Astana» – «Aty­raý», «Shahter» – «Qaırat», «Taraz» – «Kaspıı», «Aqtóbe» – «Turan» jáne «Aqsý» – «Ordabasy» klýbtary kezdesedi.

Týrnır kestesi