Qazirgi halyq sany jyl basyndaǵy kórsetkishpen salystyrǵanda 163,7 myń adamǵa nemese 0,8%-ǵa ósti. Al ótken jyldyń sáıkes kezeńimen, ıaǵnı 2021 jyldyń qańtar-tamyz aılaryndaǵy derekpen salystyrǵanda, el halqynyń tabıǵı ósimi 3,6%-ǵa (178,9 myń adam) tómendep, 172,4 myń adamdy qurady. 1 myń turǵynǵa shaqqandaǵy tabıǵı ósimniń jalpy koeffısıenti 13,19 adamdy qurady.
AHAT organdary usynǵan azamattyq hal-aktilerininiń jazbalaryndaǵy málimetterge sáıkes, bıyl qańtar-tamyz aralyǵynda 263,8 myń sábı dúnıege keldi. Bul 2021 jyldyń tıisti kezeńine qaraǵanda 11%-ǵa az (296,5 myń adam). 1 myń adamǵa shaqqandaǵy jalpy týý koeffısıenti 20,19 sábıdi qurady.
Al «Týmaq barda – ólmek bar» degendeı, qarastyrylyp otyrǵan kezeńde qaıtys bolǵandardyń sany – 91,4 myń. Bul ótken jylǵa qaraǵanda 22,3%-ǵa az (2021 jyly – 117,6 myń adam). О́lim-jitimniń jalpy koeffısıenti 1 myń adamǵa 7 marqumdy qurady.
Sondaı-aq bıyl qańtar-tamyz aralyǵynda 1 jasqa deıin shetinegen 2 208 náreste tirkeldi jáne 2021 jylǵy tıisti kezeńmen salystyrǵanda (2 345 shetinegen náreste) kórsetkish 5,8%-ǵa kemidi. Náreste ólim-jitiminiń koeffısıenti 1 myń týǵandarǵa shaqqanda 8,37 oqıǵany qurady.
Búginde aınalamyzdaǵy shıelenisken jaǵdaılarǵa baılanysty halyq sany kelimsekterdiń esebinen kóbeıip jatqan joq pa degen suraqtyń týyndaıtyny da anyq. Biraq Kóshi-qon qyzmeti organdary usynǵan málimetterge súıinsek, buǵan alańdaýǵa negiz joq sııaqty. Aıtalyq, bıyl qańtar-tamyz aılarynda elimizge turǵylyqty turýǵa kelgen 9 595 adam tirkelgen eken. Alaıda elimizden 18 275 adam ketipti. Mundaǵy kóshi-qon aıyrymy – 8 680 adamǵa kem.
Kóshi-qonnyń negizgi almasýy TMD memleketteriniń arasynda ekeni túsinikti. Onda ketip jáne sol jaqtan kelip kóship-qonýshylardyń jalpy sanynan úlesi 85,1% jáne 84,4%-dy qurady.
El ishinde qonys aýdaratyndardyń sany 2,1%-ǵa kemidi. О́ńiraralyq qonys aýdarý boıynsha halyq kóshi-qonynyń oń aıyrymy elimizdiń 3 óńirinde – Almaty (24 711 adam), Astana (22 960 adam) jáne Shymkent (2 154 adam) qalalarynda baıqaldy.
