Kredıtke jomart bank

Jyldyq dınamıkada eń joǵary kórsetkishti Jusan Bank kórsetti: 2,4 ese ósim bar. Berilgen zaım kólemi 1,1 trln teńgege jetken. Tamyz boıynsha banktegi ósim – 0,3 paıyz. Ekinshi orynda – turǵyn úı naryǵyndaǵy belsendi zaım berýshi «Otbasy bank» (+53,5 pa­ıyz, 2,7 trln teńgege deıin). Úzdik úshtikte qaryz portfelin 1,8 trln teńgege deıin keńeıtken «Bank SentrKredıt»-te bar.

Bankterdegi keshiktirilgen tólem kólemi 1,5 trln teńge boldy.  Bul – qaryz portfeliniń 7 paıyzy. 90 kúnnen assa da tólenbegen qaryz mólsheri 786,8 mlrd teńgege jetip, portfeldiń 3,6 paıyzyn alyp tur.

Sońǵy eki-úsh jyl bederinde ornaǵan daǵdarysqa qaramastan, qazaqstandyq bankterdiń aktıvi sońǵy bir aıda – 2,9 paıyzǵa, al sońǵy bir jyl ishinde 18,3 paıyzǵa kóterilgen. Sóıtip, kúz qarsańynda 41,5 trln teńgege jetken.

Úzdik ondyqtaǵy bankter ishinde eń úzdik aılyq ósim dınamıkasyn Bank RBK (+7,8 paıyz, 1,7 trln teńgege deıin) kórsetken. Banktiń jyldyq dınamıkasy da joǵary (+37,5 paıyz). Sáıkesinshe, banktiń qaryz portfeli de birshama ósken. Sońǵy bir aı ishinde 2 paıyzǵa joǵarylap, 793,7 mlrd teńgege deıin jetse, sońǵy bir jylda 42,7 paıyzǵa kóbeıgen. Bul bank korporatıvtik baǵytta da, jeke baǵytta da belsendi jumys isteıdi. Ekinshi orynda – «Bank SentrKredıt» (+4,9 paıyz, 3,4 trln teńgege deıin). Bul qarjy ıns­tıtýtynyń qaryz portfeli bir aıda 7,5 pa­ıyzǵa ósip, 1,8 trln teńgege jetti. Úshin­shi orynda – Altyn Bank (+4,1 paıyz, 936,2 mlrd teńgege deıin). Qaryz port­feli 1,4 paıyzǵa artyp, 300,2 mlrd teńgege taıaǵan.

О́timdi aktıvterdiń 5,7 paıyzǵa nemese 1 008 mlrd teńgege ulǵaıýy jáne qaryz portfeliniń 1,1 paıyzǵa nemese 246 mlrd teńgege deıin kóbeıýi aktıvterdiń jalpy kóleminiń artýyna jol ashqan. Bankterde jınaqtalǵan ótimdiligi joǵary aktıv quny 12,6 trln teńgege baǵalanady, sáıkesinshe, ótimdiligi joǵary aktıvter jalpy aktıvtiń 30,4 paıyzyn alady. Bul óz kezeginde bankterdiń klıent aldyndaǵy mindettemesin tolyǵymen oryndaýyna múmkindik beredi.

2022 jyldyń tamyzynda ekonomıkaǵa nesıe berý úlesi 1,6 paıyzǵa artyp, 20,7 trln teńgeni qurady. Qarjy naryǵyn retteý jáne damytý agenttiginiń aqparaty boıynsha, atalǵan kórsetkish ósimi jyl basynan beri 11,8 paıyz nemese 2,2 trln teńge kóleminde bolǵan. Aıta ketý kerek, ekonomıkaǵa berilgen nesıeniń basym bóligi, ıaǵnı 19,0 trln teńge ulttyq valıýtamen rásimdelgen. Tek 1,7 trln teńge ǵana shetel valıýtasymen usynylypty.

Infografıkany jasaǵan Amangeldi Qııas, «EQ»

Jyl basynan beri iri bızneske berilgen zaımdar 4,0 paıyzǵa, 3,4 trln teńgege deıin ulǵaıǵan. Al shaǵyn jáne orta bızneske (jeke kásipkerlerdi qosa eseptegende) berilgen qaryz kólemi 3,3 paıyzǵa, 5,4 trln teńgege deıin artty. Zańdy tulǵalarǵa berilgen nesıeniń negizgi úlesi – ónerkásip (34,3 paıyz), saýda (21,1 paıyz), qurylys (7,6 paıyz) jáne transport (5,8 paıyz) salasyna tıesili.

Zańdy tulǵalarǵa berilgen kredıtter 2022 jylǵy tamyzda 0,5 paıyzǵa tómendep, 7,9 trln teńgeni qurady. Bul rette jyl basynan bergi kórsetkishtiń ósýi 2,3 paıyzdy qurady (2021 jylǵy osyndaı kezeńde 1,8 paıyzǵa ósti). Zańdy tulǵalarǵa kredıtterdiń tómendeýi jańa nesıe berýden asyp túsken iri óteýler nátıjesinde oryn aldy. Osy jyldyń tamyz aıynda zańdy tulǵalarǵa 973 mlrd teńge somasyna qaryzdar berildi, bul 2022 jylǵy shildemen salys­tyrǵanda 11,2 paıyzǵa artyq.

«Jeke tulǵalarǵa kredıtter 2022 jylǵy tamyzda 2,9 paıyzǵa ulǵaıyp, 12,7 trln teńgeni qurady (Jyl basynan beri 18,7 paıyzǵa ósti). Jeke tulǵalarǵa kredıtterdiń ósýine jeńildetilgen memlekettik ıpotekalyq baǵdarlamalardy iske asyrýdy jalǵastyrý nátıjesinde ıpotekalyq kredıtteýdiń 3,1 paıyzǵa, 4,1 trln teńgege deıin ulǵaıýy, sondaı-aq  tutynýshylyq qaryzdardyń, onyń ishinde jeke kásipkerlerge bıznes maqsattarǵa arnalǵan qaryzdardyń, 2,3 paıyzǵa, 7,0 trln teńgege deıin ósýi sebep boldy», delingen habarlamada.

Sondaı-aq agenttik nesıe portfeliniń sapasy birshama jaqsarǵanyn da atap ótedi. 2022 jylǵy 1 qyrkúıekte bank sektory boıynsha NPL qaryzdarynyń deńgeıi bir aıda 0,2 paıyzdyq tarmaqqa nemese 41 mlrd teńgege azaıyp, 787 mlrd teńgeni nemese jalpy nesıe portfeliniń 3,6 paıyzyn qurapty (2022 jylǵy 1 qańtarda – 3,3 paıyz nemese 669 mlrd teńge bolǵan). Zańdy tulǵalardyń port­felinde 90 kúnnen astam merzimi ótken bere­shegi bar qaryzdardyń deńgeıi – 3,6 paıyz nemese 353 mlrd teńge. Jeke tul­ǵalardyń portfelinde – 3,6 paıyz ne­mese 434 mlrd teńge. Jumys istemeı­tin qa­ryzdardy provızııalarmen jabý joǵa­ry bolyp saqtalyp, 72,3 paıyzdy quraǵan.

«Bankterdiń menshikti kapıtaly osy jyly tamyzda 2,5 paıyzǵa, 5,0 trln teńgege deıin ósti. Negizgi kapıtaldyń jetkiliktilik koeffısıenti (k1) – 17,6 pa­ıyz­dy, menshikti kapıtal (k2) 20,9 paıyz­dy qurady. Bul zańnamada belgilengen nor­matıvterden edáýir asyp túsedi jáne bank sektoryndaǵy yqtımal táýekel­derdi jabýdy qamtamasyz etedi. Sektor mindet­temeleri 2022 jylǵy tamyzda klıentter salymynyń 1,9 paıyzǵa, 28,3 trln teńgege deıin ulǵaıýy nátıjesinde 3,0 paıyzǵa, 36,5 trln teńgege deıin ósti», dep málimdedi agenttik.

Sonymen birge bazalyq mólsher­lemeniń artýy aıasynda qorlan­dyrý quny da ulǵaıǵan. Banktik emes zańdy tulǵalardyń ulttyq valıýtadaǵy mer­zimdi depozıtteri boıynsha ortasha aly­n­ǵan syıaqy mólsherlemesi 2022 jylǵy tamyzda 12,4 paıyz (2021 jylǵy jeltoqsanda – 7,4 paıyz) bolsa, jeke tulǵalardyń depozıtteri boıynsha 11,7 paıyzdy (2021 jylǵy jeltoqsanda – 8,0 paıyz) qurady.

2022 jyldyń 1 qyrkúıegindegi jaǵdaı boıynsha Qazaqstannyń bank sektorynda 22 qarjy ınstıtýty jumys isteıdi.