Maýsymnyń jabylý rásimine jınalǵan ulttyq sport jankúıerlerin oblys ákiminiń birinshi orynbasary Ǵaýez Nurmuhambetov pen Qostanaı oblystyq at sporty federasııasynyń vıse-prezıdenti Nurbol Ábdirahmanov quttyqtady.
Ǵaýez Torsanuly bıylǵy jaz bútindeı Qostanaı tuqymdy tulparlardy nasıhattaýǵa arnalǵanyn jáne qazirgi tańda osy tuqymnyń qanyn taza saqtap, meılinshe kóbeıtip alýdyń joldary izdestirilip jatqanynan habardar etti.
– Qostanaıda on toǵyzynshy ǵasyrdyń aıaǵyna taman qazaqtyń qazanatynyń negizinde jylqy zaýyty ashylyp, alpys jylǵa jalǵasqan úzdiksiz kúrdeli býdandastyrý jumystary júrgizilgeni belgili. Nátıjesinde, alynǵan Qostanaı qazanaty 1951 jyly resmı túrde jeke tuqym retinde tirkeldi. Bitimi bólek, denesi shymyr, súıekti, sińirli, bolat tuıaq asyl tuqymdy bul tulpardyń sany kezinde 44 myńǵa deıin jetken. О́kinishke qaraı, búginde múlde azaıyp ketti. Sondyqtan atalarymyzdan qalǵan asyl tuqymdy sáıgúlikti saqtap qalý mindet, – dedi oblys ákiminiń birinshi orynbasary.
Bul jolǵy báıgede Qostanaı qazanatyna aıryqsha mán berilip, tek osy tuqymǵa arnalǵan 2 400 metrlik ushqyr jarys, 5 shaqyrymdyq qunan báıge jáne 18 shaqyrymdyq alaman uıymdastyryldy. Munyń syrtynda, aralas tuqymdy sáıgúlikterdiń 4 shaqyrymdyq qunan jarysy men 16 shaqyrymdyq alaman báıgesi ótti.
Uıymdastyrýshylardyń aıtýynsha, óńirde ulttyq sportqa degen qyzyǵýshylyq jyldan-jylǵa artyp keledi. Qazir oblysta 13 myńnan astam adam ulttyq oıyn túrlerimen aınalysady eken. Al bıylǵy maýsym olar úshin nátıjeli boldy deýge tolyq negiz bar. Máselen, Tobyl óńirinde mamyr aıynan beri segiz báıge ótkizilgen. Bul jarystardy bas báıgege tigilgen avtokólik pen júldegerlerge tabys etilgen qarjylaı syılyqtyń kólemi 90 mıllıon tengege mańaılap qalady. Syılyq qory keler jyly da qomaqty bolmaq.
– Aldaǵy maýsymda da dál osy bıylǵydaı 7-8 báıge ótkizemiz dep josparlap otyrmyz. Sońǵy jyldary aımaqta at sportyna degen qyzyǵýshylyq erekshe. Júırik jylqy satyp alyp jatqan, at baptap, báıgege qosyp jatqan azamattardyń qatary kóbeıip kele jatyr. Bizdiń aldymyzda turǵan eń basty josparymyz osy ǵoı, – deıdi at sporty federasııasynyń vıse-prezıdenti.
Maýsymdy qorytyndylaǵan báıgege elimizdiń birneshe óńirinen 30-ǵa jýyq sáıgúlik qatysty. Taza Qostanaı qazanattary arasynda ótken 20 shaqyrymdyq alamanda Aqmola oblysynyń sáıgúligi aldyna qara saldyrmady.
– Tulparlarymyz talaı jarysta top jaryp júr. Bul joly da júldeli oryndardan kórindi. Jaqsy oryndardy alyp jatyrmyz. Eki avtokólik uttyq. Munyń syrtynda, ekinshi, úshinshi oryndarǵa jetip jatyrmyz. Mundaı báıgelerge eshkim osal at qospaıdy. Qazaqtyń «Baq shaba ma, bap shaba ma degeni osy ǵoı, ózgelerge de juǵysty bolsyn dep tileımin, – dedi aty ozǵan aqmolalyq atbegi Ádilet Tasmuhambetov.
Búginde elimizde Qostanaı tuqymyna jatatyn jylqynyń sany 173-ke jetipti. Uzaq jyldar boıy júrgizilgen seleksııalyq jumystardyń nátıjesinde alynǵan qazaq qazanatynyń kúsh-qýatyna, bitimine sheteldik mamandar da joǵary baǵa berip otyrǵan kórinedi. «Qazaq tulpary» JShS basqarma tóraıymy Aıgúl Amandyqovanyń aıtýynsha, Qostanaı tuqymdy sáıgúlikter ushqyrlyǵy jaǵynan álem boıynsha ekinshi orynda tur. Alysqa salýǵa da asa tózimdi keledi.
Maýsym qorytyndysy boıynsha ár qashyqtyqta júldeli oryndardan kóringen shabandozdarǵa qomaqty qarjylaı syılyqtar tabys etildi.
Qostanaı oblysy
