Toqsan aýyz sózdiń tobyqtaı túıini – bul kúnderi tanymal qylqalam sheberleri Alpysbaı Qazyǵulov, qyrǵyz sýretshisi Jánibek Berdikeev pen ózbek sýretshisi Nodır Bobomuradovtyń týyndylary Almatydaǵy «Almaty Resort» shıpajaıynda ashylǵan kórkemsýret galereıasynan oryn aldy. Túrki áleminiń úsh zamanaýı ókili, beıneleý óneri maıtalmandarynyń týyndylary Qazaqstan, Qyrǵyzstan, О́zbekstanda ǵana emes, AQSh, Japonııa, Ulybrıtanııa, Túrkııa, Qytaı men Belgııa murajaılarynda da menmundalap tur.
Qarap otyrsaq, Eýropadaǵy shıpajaılarda mundaı kórmeler ótip turady. Bul em alýǵa, demalýǵa kelgen jandar úshin taptyrmaıtyn ári ýaqyt únemdeıtin tamasha múmkindik. Al Almatydaǵy shıpajaıdyń joǵary qabatyn túgel alyp jatqan alǵashqy kórmeni uıymdastyrýǵa álemdik beıneleý ónerine qosqan úlesi úshin Eýropa óner odaǵynyń syılyǵyn alǵan, Qazaqstan Sýretshiler odaǵynyń múshesi Alpysbaı Qazyǵulov uıytqy boldy.
– Meniń týyndylarymdy túsiný úshin kórermenge ýaqyt kerek. Shıpajaıda demalýshylarda bul múmkindik bar. Al О́zbekstan, Qyrǵyzstan sýretshileriniń kartınasynda ıdeıa aıqyn, túsinikti jáne jan jadyratady. Sondyqtan galereıadaǵy týyndylar ózara úılesim taýyp tur. Salvador Dalı aıtqandaı, sýretshi retinde jetile berýden qoryqpaý kerek, báribir ónerdiń túbine jetpeısiń. Al sýretshige qarapaıym shynshyldyq jáne óz ıdeıalaryńa satqyndyq jasamaý kerek dep esepteımin. Men ózimdi 45 jyl boıy izdedim, beıneleý ónerindegi óz qoltańbamdy qashap shyǵarý úshin osynsha jyl izdendim, bastapqyda natýra salatynmyn, qazir bári júregimnen shyǵady.
– Sýretshige óz erkindigi men azattyǵyn saqtap, suranysqa da ıe bolýy úshin ne qajet?
– Birde tapsyryspen 20 kún tapjylmaı natıýrmort salǵanym bar, alaıda ol tapsyrys ıesine unamaǵannan keıin, ózime qaldyrdym, biraq ózime unady. Bulaı jumys istegen óte qıyn, tapsyrys berýshilerdiń áıteýir birdeńege kóńili tolmaıdy, erkindigińdi shekteıdi, boıaýyn qalyńdatqysy keledi. Portret salǵyzsa, kózimdi úlkeıt, kóılegimdi ózgert degen sııaqty talaptar qoıa bastaıdy. Men bulaı jumys isteı almaımyn, ónerden tabys tabý úshin jádiger jınaýmen aınalysamyn. О́z ıdeıalaryńa adal bolyp qalý úshin kez kelgen tyǵyryqtan shyǵýǵa bolady, – deıdi tanymal ımpressıonıst Alpysbaı Qazyǵulov.
Bıyl 55 jyldyǵyn atap ótetin Almaty resort shıpajaıynda saltanat quryp turǵan kórmege osy bastamaǵa uıytqy bolǵan metrdiń tańdaýymen, beıneleý óneriniń beldi ókilderinen bólek, jas sýretshilerdiń de jumystaryna da oryn berildi.
ALMATY
